بسم الله الرحمن الرحيم
و الصلاة و السلام على خير الانبياء و المرسلين
و الله العظيم هذي الخلطة ماشاء الله تبارك الرحمن هدية من الله تعالى لي و اذكر وقتها كنت ملازمة الاستغفار 1000 مرة باليوم 30 مرة بالمسبحة الصفرا ام 33 خرزة و تعرفون ان الاستغفار يفتح بيبان الفرج الحمد لله
و ملازمة البقرة يوميا حتى بايام الدورة و ببعض الايام اكسل
و احسها بركات من العلي القدير لاني و انا استغفر انوي كذا نية بكل مرة شي و باحد المرات نويت يكثف شعري الحمد لله
للامانة الزيت الي فيه الحلبة المحموسة و المطحونه المجروشة هذا من زوجة حما اختي الي شعرها كثف بعد الزيت هذا
هي قالت جيبي زيت جوز الهند الي بالقوطي الحديد مدري الاخضر ولا البنفسجي هي امدحت واحد منهم
و حطي فيه حلبه محموسه ماقالت مطحونه بس انا الحمد لله طحنتها جرشتها مو حيل ناعمة و نقعتها بزيت جوز الهند لحاله و هم نقعتها بانواع عديدة من الزيوت بس لحالهم منهم زيت الخروع
و كل زيوتي جاهزين الي بالزجاج مو تعبئة و اكثرهم من معاصر الاحلام
خليت الخلطة على تجربتين مختلفتين لان الاضافات تغيرت
التجربة الاولى:
حطيت حنه حمرا حنة المدينة من سوق حجاب او النسيم جيبو الورق و اطحنو عند الطحان عشان لا يغشونكم
و ماي حار يغلي اول احط ماي الشاي الحين لا عشان كل فايدة الحنه تمسك معاي و حطيت الزيت المشبع بالحلبة كان جوز هند ووكم ملعقة سدر سدر و بس وتخمرت بروحها يوم كامل و حطيتها بالليل و كثف الحمد لله شعري و حسيته قوي طبعا قعدت على شعري فوق ال8 ساعات
______________________________ _
بس امس حطيت اضافات جديدة و ما تخمرت لحالها يوم كامل كالعاده
خليتها تتخمر على راسي
انا عجنتها الساعة 7 و نص بالليل و حطيتها 9 الليل يعني مثل كلام صاحبات اختي الصغيره فورا حطيها على الراس عليه تتخمر و طلع و الله كلامهم صواب ماشاء الله تبارك الرحمن فورا مو معناه حيل حارة و تحرق فروتكم انطروها تدفى
ما عليه اشرح بالتفصيل للي ما عندهم خبرة
من تجاربي بالليل افضل لان مسامات الشعر و البشرة و الخلايا تنمو و تتجدد باليل مو بالنهار فاي تفاعل او استفاده لازم نحطه بعد الساعة 9 باليل و هي المعلومة قريتها كذا مرة و بان صدقها علي كذلك الامر لاقنعة الوجه
لاني لما احط الحنة بالنهار و اغسلها بعدين ما احس شعري استفاد كثير
بس ماشاء الله تبارك الرحمن امس بعد الاضافات حسيت شعري ثقيل لما اهفه ،حسيت بثقل على اكتافي ماشاء تبارك الرحمن ولا حول ولا قوة الا بالله العلي العظيم و حسيت الشعره زايد سمكها و حسيت بطوله
التجربة 2
المكونات و شعري متوسط لين بداية اكتافي:
12 ملعقة طعام عادية لا مسح ولا حيل متروسه من حنة المدينة الحمرا الي من سوق حجاب.
4 ملاعق ترس سدر ترس يعني مليانه حبتين
4 ملاعق ترس مايونيز الحياة كان دسمه قليل جدا خالي من الكسترول و بالمرة الجاية ان شاء الله بحط الي فيه دسم لان شعري طلع جاف بعدها
ماي مغلي بالمقدار الي يطيب عليه الكيف
صبيت من زيت الخروع الي منقعه فيه الحلبة المحموسة اولا ثم المجروشة تقريبا 3 ملاعق ولا ثنتين.
ايضا صبيت من زيت الجرجير الي منقعه فيه الحلبة المحموسة اولا ثم المجروشة نفس كمية زيت الخروع تقريبا
خل ابيض ماركة بيدر مليت الغطا و بس لاني قريت الحامض يزيد من سرعة الامتصاص ما عندك خل حطي ليمون بس الرسول صلى الله عليه و سلم مدح الخل.
اقعدت ساعه و نص بعدين حطيتها و كانت بارده شوي المفروض بعد ساعه احطها على شعري
غسلتها بكرة الظهر الساعة 11 و نص يعني نمت فيها الحمد لله و كل فتره الليل كانت خلاياي تتجدد بالحنه و السدر و المايونيز و الزيوت و معروف الخروع و الجرجير للتكثيف بس مو بروحهم بعض الشعور تطيح من الزيوت لحالهم لازم تخلطينهم مع شي اما مع حنة ولا سدر
انا اول شعري يتحمل الزيوت لحالهم بس لما كبرت تغيرت طبيعته قام يطيح من الزيوت لحالهم انا حذرت و كذلك شعر اخواتي تغير عن اول
ملاحظة هامة عشان لا تتخرعون خصوصا للمبتدئات:
و انتو بكرامة الي يحط حنه بوله يتغير يصير لونه رمادي على اخضر
باول مرة كانت بولتي خضرا هاها حلوه بولتي
بالمرة الثانية بالضحى صارت رمادية حيل لاول مرة بحياتي كذا؟؟؟ يمكن كنت اول احط ماي الشاي المغلي و الحين بطلت .
ماشاء الله تبارك الرحمن ولا حول ولا قوة الال بالله العلي العظيم قولو ماشاء الله
ايضا السر الثاني وراء ان شعري رجع و قام يطول
حبوب الزنك بس يا حلوين تمتن و كل على حسب جسمه ما عليه تحملو كم شهر تمتنون لين ترد عافية شعوركم بعدين سوو رجيم
انا حللت عند الطبيبة واوصفتهم لي تقريبا 6 شهور و الحين قطعت من الطبيبة لان صعب اراجع ما عندي مين يوصلني دعواتكم اتزوج و زوجي يوصلني و يدللني هاها و الله طالعة برا يا قلبي علي
بس الحمد لله و لا تقطعون فورا بعد ال6 شهور انا قعدت 3 شهور تقريبا بعد ال6 شهور ادرج جسمي
على تركها اقعدو اخذو نص حبة يوميا لمدة شهر بعدين كل يوم و ترك نص حبه بعدين كل 3 ايام بعدين كل اسبوع لين ما تقطعونها الحمد لله
انا شريت الحبوب من بنده الاولية الي جنب جرير الحين شالوها محلات جي ان سي على ما اظن كذا اسمها
حبوبي قوتها مية ترا فيه درجات مو تاخذون و بس الا لما تسوون تحاليل
السر الثالث ترالالالالالالا
و هو بفضل الله عز و جل اولا ثم بفضل البنت الي حطت تجربتها بمنتدانا الغالي الله يعافيها و يبارك فيها يارب و بكل القائمين على المنتدى
تدرون وشو؟ شي لا على البال و لا على الخاطر قولو عفية و اقول
خلاص كسرتو خاطري السر هو
تونك فازلين الازرق المنعش المنشط لفروة الشعر انا شريت الكبير يمكن ب14 ريال
الله يسلمكم بعد كل ترويشة تحطون على الجذور و تدلكون و الافضل باليل و شوفو النتايج
اول شعري واقف ما يطول و ما احسه يكثف بس بعدين الحمد لله شعري قام يتلحلح
حتى اختي ملاحظة ماشاء الله تبارك الرحمن ولا حول ولا قوة الا بالله العلي العظيم قولو ماشاء الله يا بنات و الله لو ما انتو غاليين علي و الله ما علمتكم اسراري و الله الحامي يحميني و يحميكم من كل عين
الرسول صلى الله عليه و اسلم يقول بمعنى الحديث احب لاخيك ما تحبه لنفسك
فيه بنات لئيمات ما يعلمنون اسرارهن كله من الحسد ما يبون احد عنده شي حلو الا هم اللهم لا شماته الله يطهر قلوبنا من الغل و الحسد
و عندي بعد الصبار مثلجته و احيانا استعمله احرره بالفرن و اذا ذاب اخذت العصارة شارية صباره كبيره ب 25 و قطعت الاوراق و غسلتهم بالماي و ثلجتهم
و عندي كثيرة يعني كثيراء للي مو سامعين فيها بعد بس للامانة هذول مو مداومة عليهم
مداومة على الحنة و السدر و الزيوت الي منقعه فيهم الحلبة و تونك الفازلين
ايضا تعلمت من البنات كريم ماكسام الاصلي و الله يلم الشعر بس ماسويت قناع منه بروحه.
لكن السر ثم السر ثم السر الاعظم بالمداومة على الاستغفار
و الله يا بنات سنين و انا احورف بشعري و سنين و انا افرفر بالمنتديات و اجرب خلطات و داري مليانة زيوت و اشياء للشعر
و لكن كان شعري يتقدم ببطأ مثل السلحفاة و احيانا يتقدم بشكل زين يعني متقلب
لكن بعد الاستغفار و البقرة و الاستغفار بروحه يكفي بعون الله للعجازات
و الله النتايج مذهله و انتو تستغفرون غمضو عيونكم و اعقدو النية و تاكدو من ان النية بتصير بحول الله و قوته سواء تكثيف شعر تعديل بشرة تنزيل وزن زواج ولادة توظيف تفريج هم الي هو لان ايات الاستغفار عامة بكل شي لم يرد فيها تخصيص الحمد لله
و هذا شوي من فضل المنتدى و بنات المنتدى علي
وماراح يكون فيني خير لو خبيت عنكم اسراري بالجمال لانكم ياما علمتوني
الله يبارك بكل من تسوي خطواتي
السر الرابع
كل يوم اتبرع بالي اقدر عليه بريال او بشي ابر فيه كبار السن او بدعوة صادقة او ببسكوت اعطيه للشغاله اهم شي المداومة او ببر الوالدين الله يخلي لنا والدينا ووالدين المسلمين يارب و يفحهم الله فينا عاجلا غير اجل يارب
دعواتكم لي ان الله تعالى يرزقني عاجلا بالزوج الصالح المصلح الي احبه و يحبني على ما يحبه الله و بالطريقه الي يحبها الله و يكون قرة عين لي و اكون قرة عين له و نكون ازواج صالحين لبعض و يرزقنا على عجل بعبد العزيز و اخوانه و اخواته و يكونون اسود و ينصرون الاسلام اللهم امين.
احيانا ما ارجع لمواضيعي فعندكم الخاص يا عسولات اي سؤال لا يردك شي .
التوقيع: ادري قرقه و اطول بس و الله شوفوني بالواقع كلامي عادي او حتى قليل بس على الورق ابدع.
و الي عندها اسرار للجمال لاتبخل علينا حتى الله تعالى يكرمها بزيادة
اخر شي ادعو لاختنا و حبيبتنا ضيم السنين بالشفاء العاجل انا احب اسميها احلى امل و كل المسلمين
دعواتكم انخطب و يفتكون اهلي من تخابيصي بالمطبخ
حرام صار لهم سنين و هم ضحايا بحاجة لضحية جديدة
لعنبوه من حال واقف لا شغل ولا رجل استغفر الله اخاف جملتي حرام
ايه الله كريم الي اعطاهم يعطينا
مدري شلون ابتدا الموضوع بخلطات و انتهى بدراما
الظاهر عقدة الكتابة ما تطلع الا عليكم يا حبيباتي
سامحوني على الاطالة و التخبيص دخلت كذا موضوع بموضوع واحد
انا مجموعة طاقات كتابية محبوسه ودي اروح لهوليود و اسوي افلام انصر الاسلام دعواتكم
الملخص
السر الاول الاستغفار و البقرة
الثاني الحنه و الزيوت المشبعه بالحلبه و السدر
الثالث التونك
الرابع التبرعات منقووول للفائده :39: دعواتكم يالغوالي بالنسبه الحلوه والسعاده في الدارين
هذا الموضوع مغلق.
شوق العسوله
•
مشكورره
الصفحة الأخيرة