سلام حوائيات
شخباركم؟
كلها كم يوم ويهل علينا شهر رمضان عسانا وياكم من صوامه وقوامه وكل وحدة فينها قاعدة تجهز لها بعض المفرزنات علشان تريحها من وقفة المطبخ وتختصر عليها الوقت في شهر رمضان . وقلت خلني انزل طريقتي في اعداد خلطة الثوم علشان البنات يستفيدون
وهذي الخلطة معتمدتنها من فترة ومريحتني صراحة من تفصيص الثوم يوميا واستخدمها في معظم أطباقي من كبسات وتتبيلة مشاوي وكشنات البصل
المقادير مثل ما هي واضحة بالصورة
1/2 كيلو ثوم - حبة ونصف زنجبيل - ليمونة - 3 حبات فلفل أخضر حار أو حسب الرغبة - زيت - ورق غار وفلفل احمر حار مجفف - كاري - كركم
طبعا تقدرين تضيفين نكهات غير حسب رغبتك مثل الدارسين أو ليمون اسود مطحون أو كزبرة مطحونة أو تقدرين تتكرينها بدون اضافات هذا شيء راجع لك
نقشر الثوم واني طريقتي في تقشيره احطه في كيس بلاستيك وأنزل فيه ضرب على الأرض لين يقول تكفين اعتيقيني :42: وهذي الطريقة ماخذتنها من عندأمي الله يحفظها
شوفي اهني بعد معركة الضرب شلون تفككت الفصوص عن بعضها وما عليك الا تنظفينه عن القشور >> طبعا راح ينهرس لك شوي بس ما يخالف لأن آخرته راح ينفرم
وهذا بعد ما نظفته عن القشور وغسلته وضروري يكون جاف عن الماء لأن اي نقطة ماء راح تعفنه خصوصا انه احنا راح نخليه في الثلاجة مو الفريزر
بعدين قشري الزنجبيل وعصري الليمونة واطحني ورق الغار مع الفلفل الجاف
جيبي الفرامة وحطي كل المقادير مع بعض والزيت اضيفي مقدار 2 من غطى الزيت ونصف ملعقة شاي كاري وملعقة شاي مملؤة كركم لإضفاء اللون الأصفر واضفت عليه فلفل اسود وشغلي الفرامة
واهني بعد ما فرمته وشوفي شلون صاير مثل المعجون واني افضله بهالطريقة وانتي تقدرين تفرمينه اخشن حسب رغبتك
وآخر شي عبيته في برطمان جبن وحطيت على سطحه شوية زيت والباقي حطيته بعلب بلاستيك وحدة لي راح احطها بالفريزر احتياط والثانية راح اعطيها بنت خالتي لأنها قالت لي اذا سويتين جيبي لي منها اجربها >> مسوية دعاية لخلطتي :42:
ملحوظة مهمة : اذا جيتي تاخذي من الخلطة استخدمي ملعقة نظيفة وجافة واذا خلصتي من استخدامها رجعيها مباشرة الثلاجة ولا تتركينها خارج الثلاجة علشان تطول عندك ولا تخترب
اتمنى موضوعي يعجبكم ولا تنسوني من دعائكم بالذرية الصالحة خصوصا في هالأيام الفضيلة