والخلـــــــــــــــــطة هي :
خلال هالفتره اللي غبت فيها عنكم كنت اسوي سيرج عن اكثر المواد الآمنه اللي ( تفتح )
انا قلت تفتح لاني ماحب اقول تبيض صراحه كل ما اقول تبيض اتذكر كلوركس وتايد وهالسوالف
لوووووووول
المهم طبعا المادة اللي تحتل المرتبه الاولى بالتفتيح اهيا :
1- الالفا اربوتين ( alpha arbutin )
طبعا هالماده غااااااااليه ومو متوفر كخام عندنا
الثانيه :
2- حمض الكوجيك ( kojic acid )
تقدرين تلقينه كسيروم او كريم بالصيدليات بس مادري اذا موجود او لا بس
ماينفع البشره الحساسه والجافه لان يمكن يتحسسون منه
و من ضمن الشغلات اللي تفتح اللي لقيتها وسويت عليها سيرج وشفت انها من مكونات
اغلب كريمات التفتيح والصوابين واللي استعملته بخلطتي اهوا :
العرقسوس ( licorice )
هذي صورته واهوا مطحون :
وبنقل لكم فقره عنه لقيتها بمنتدى عروس من العضوه منووووشه كاتبه عنه :
((العرقسوس أو أصل السوس نبات شجري معمر ينبت في كثير من بقاع العالم مثل سوريا ومصر وآسيا الصغرى وأواسط آسيا وأوروبا.
تستخرج من جذور الشجرة مادة العرقسوس، وهي أكثر حلاوة من السكر العادي ويمكن مضغها أو تؤكل كحلويات. وهناك 12 نوع من جذور العرقسوس تختلف في الطعم
المادة الفعالة في السوس هي الكلتيسريتسن، وثبت أن عرق السوس يحتوي على مواد سكرية وأملاح معدنية من أهمها البوتاسيوم، الكالسيوم، المغنسيوم، الفوسفور، ومواد صابونية تسبب الرغوة عند صب عصيره، ويحتوي كذلك على زيت طيار. ففي عام (1955- 1960) تم فصل مركب سيترويدي أطلق عليه اسم
حمض الجلسريزيك glycerrhysic acid من جذور نبات العرقسوس وقد تبين أن هذا الحمض يشبه في بنيته الكيميائية مركب الكورتيزون المعروف إلا أنه يتميز عنه بخلوه تماما من الآثار الجانبية المعروفة عند التداوي بالكورتيزون خصوصا لمدة طويلة.
يحتوي مستخلص عرق السوس (Licorice extract) علي مادة الجلابريدين، وهي مادة آمنة لتبييض الجلد، حيث تمنع كثرة التصبغ بمادة الميلانين عن طريق منع تخليق إنزيم التيروزيناز، ويعتبر هذا الإنزيم هو المسؤول عن تخليق صبغة الميلانين، كم أن مستخلص عرق السوس له تأثير فعال كمضاد للالتهابات.
وهو مضمون من ادارة الغذاء والادويه الامريكيه fda وقد ادرج فى قائمه الاعشاب آمنه الاستعمال بصورة عامه
ويدخل مستخلص عرق السوس فى مستحضرات التجميل ويعالج حب الشباب ويقلل من حروق الشمس ويساعد فى علاج تلون البشرة الداكنه الكلف . وفى اخر دارسه اجرتها جامعه كاليفورنيا اتضح ان عرق السوس له اثر كبير فى منع تسوس الاسنان))
عشان جذي سميتها خلطة الكورتيزون الطبيعي طبعا انا سويت كريم للجسم وصابونيه وسنفره
اول شي
1- كريم الجسم :
علبة جليسوليد 250 مل تحطينها كامله
http://forum.****.com/imgcache/2/448204women.jpg
كوب واحد من مستخلص العرقسوس ( راح اكتب شلون تسوونه )
زيوت ( زيت لوز - زيت افوكادو - زيت جوجوبا - زيت جلسرين ) من كل زيت ملعقتين كبار
الطريقه :
اول شي تشترين عرقسوس مطحون وتاخذين منه مقدار ملعقتين وتصبين عليه مقدار كوب ماي
وتخلينه ينقع بالثلاجه يوم كامل , تالي صفي المنقوع بقماش واخذي مايه , اخذي الجليسوليد و
حطي عليه كوب مستخلص العرقسوس مع الزيوت من كل زيت ملعقتين وخلطيهم بخلاط الكيك
راح تطلع النتيجه جذي :
2- الصابونيه :
انتي حره باستخدام الصوابين اللي تبينهم بس انا بكتبلكم اللي انا افضله
وماتزيدين عن 3 صابونات
انا اخترت الصابون السائل الافريقي ( اذا استعملتي الافريقي تزيدين عليه صابونه وحده كافي )
( التاجره Grass تبيعه )
مع
صابونه بالمرز بزبدة الككاو ( موجوده بلولو هايبر وفي منها بزيت الزيتون )
او
صابونة سكن سكسس ( موجوده بلولو هايبر )
او
صابونة فير اند وايت ( so white ) ( طالبتها من النت )
كلهم مجربتهم وحلوين
الطريقه :
تاخذين العرقسوس المطحون وتطحنينه زيااااده لين يصير ناااعم انعم من اللي شريتيه اوكي
تقطعين الصابون الافريقي قطع صغيره كلش وتبشرين معاه صابونه وحده من اللي حطيتهم لج
تالي بعدين حطي 4 ملاعق من العرقسوس الناعم وصبي عليهم 2 كوب ماي وخلطيهم بملعقه
عاديه وخليه ينقع بو جم ساعه اللي مافيها صبر لووووول تحطه بخلاط العصير سيدا مو مشكله
بعدين عبيه بعلبه وحطيها بالثلاجه يوم كامل بعدين استعمليها
هذي صورتها :
طبعا اهيا يوم عن يوم راح يصير لونها غامج من العرقسوس يتركز فيها اكثر فا عادي لا تخافون
مو عبالكم اختربت
وهني صورة الكريم مع الصابونيه
بالنسبه للسنفره اختاري اي سنفره تعجبج ستيفز وربعها وضيفي عليها العرقسوس المطحوون
الناااااعم وخلطيهم عدل واستعمليها بس خليها يوم كامل بدون استعمال عشان يتركز فيها وبس
واذا تبين تضيفين لها زيوت مو مشكله
وتقدرين تسوين تونر حق جسمج منه تنقعينه وتاخذين مايه وتحطينه فبخاخ كبير وبخي فيه
جسمج بعد السبوح
الحين نيي للبرنامج اللي بتمشون عليه سهل وايد :
1- تتسبحين بالصابونيه وتتفركين فيها وتخلينها شوي على جسمج بو 5 - 10 دقايق تالي غسلي
وتسنفري و غسلي ونشفي وجان تبين بخي من التونر وخليه ينشف على جسمج
2- اخذي الكريم وتدهني منه على كامل جسمج ونطري شويه تتشربه البشره ولبسي ملابسج
وكل يوم جذي لمدة شهر وبتشوفين شي يسرج ,طبعا كل وحده على حسب جسمها تبين النتيجه
ملاحظه :
قبل لا تسوين هاللي قلته كله نقعي العرقسوس واخذي مايه وسوي تست ( تجربه ) حق جسمج
شوفي تتحسسين ولا لا اوووووووكي مو تقولون ماقلت
اي صح نسيت اقول تحفظون الكريم والصابونيه بالثلااااااااااااااجه عشان ماتخترب وتكون فرش
حزت السبوح اخذي منها اللي يكفيج فباديه ورجعيها الثلاجه مو تبربسون فيها لووول ومدة الحفظ شهر
وهذي النتيجه بعد الانتظام والاستمرار لمدة شهر بعد اسهل من جذي برنامج ماكو لوووول
على فكره ترا انا ما اسوي مغربي ولا احط خلطات قبل السبوح الله يخلي الماجيك بيلنق و
بخار الحمام
ترا واااايد حلوه الخلطه اقوى من خلطة فيتامين سي
لمعه
نعومه
تفتيح
صفاء
واتمنى تجربونها وتعجبكم وبس خلصت
واسفه اذا الموضوع مو مرتب
هي حاطة صور قبل وبعد بس ماادري اذا الصور خاصة لها او لا علشان كدا ماقدرت احطها
ادعوا لصاحبة الموضوع وادعولي ربي يحقق اللي في بالي