خلطة لتنشيط المبايض وتنظيف الرحم اخذتها شخصيا من المراخة المعروفه ام سعيد

السلام عليكم ورحمة الله وبركاته
انا من المقيمات بقسم تاخر الحمل..طبعا انا متاخره عن الحمل 4سنوات بعد ولدي ربي يخليه لي ويبارك لي فيه
ومااستخدمت موانع من جبته هو عمره الحين 6 سنوات تقريبا ..ومافكرت احمل الا بعد ماصار عمره سنتين
ومن يومها وانا نفسيتي تعبانه ومشاكل مع زوجي لان زوجي مو متعاون ابدددد ربي يسخر لي ولكم المهم..
وماخليت حاجه ماعملتها ومابقى طبيبة في الرياض مارحت لها...رحت لمركز افنيو وذرية ...ومراكز كثير مشهوره ..ثم رحت مراخات كثير اللي قالت سليمه واللي قالت رحمك مقلوب واللي قالت رحمك مايل والحمد لله على كل حال ربي ماكتب لي حمل
وبعد مشوار طويل من ابر التفجير والكلوميد
استخرت ورحت للمراخه ام سعيد لان اختي قعدت 15 سنه وماحملت وسبحان الله بعد تمرخيها ولشهر واحد حملت..لكن ربي يعوضها سقطته ..
مالكم بالبربره #وش عقبه:icon35:
رحت لها ومرختني وقالت لي فيك ميل شديييدد وتعبت بعد التمريخ بصراحه لان اكيد وضعي مستفحل لاني مماهتم بنفسي صراحه بوقت الدوره حتى الثقيل اشيله..طبعا بعد التمريخ منعتني من الحركه والمشي الكثير حتى الكوي تقول ممنوع لمدة اسبوع...
وطلبت منها حاجه تنزل الدوره زين لان دورتي قليله
فكتبت لي هذه الخلطه ..وقررت انقلها لكم لاني احب لكم مماحب لنفسي ويمكن ربي يسبب لوحده الحمل من هالخلطه واكسب بها دعوة منكم اخواتي
الخلطه هذي تنشط المبايض وتنظف الرحم زين من الدوره واوساخ الدوره السابقه ووهذا كلام ام سعيد نفسها:dozey:..


بسم الله:
كيلو شمر حب
نص كيلو يانسون حب
نص كيلو كراويه حب
ربع كيلو كمون حب
ربع كيلو نانخه حب
ربع كيلو مره تدق ما تطحن
نص كاس حبة سوادء
يخلط الجميع مع بعض والاستعمال من اول يوم للدوره الى اخر يوم منها..
يوخذ ملعقه كبيره وتغسل في مشخل
وتنقع في كاس ماء مغلى مدة عشر دقائق ثم تصفى وتشربي مرتين ..مره على الريق ومره قبل النوم
والباقي من الخلطة يحفظ في الفريز للدوره القادمه..
هذه الخلطه اخواتي ومااابي منكم الا الدعاء ان ربي يرزقني بالذرية الصالحه عاجلا غير اجل ويحفظ لي وليدي ويرزقني بره :21:
واللي تحب تنقلها لمنتدى ثاني عادي لكن تذكر انها منقول مني لانها وربي جهد شخصي ..
واي استفسار حبيباتي انا بالخدمه لكن على الخاص
وعذرا على الاطاله