خلطه طبيعيه 100% لتوحيد وتفتيح اللون وازالة السواد والآثار من الجسم

أخواتي الحوائيات العزيزات
جايبالكم خلطه طبيعيه 100% لتوحيد وتفتيح اللون وازالة السواد والآثار من الجسم وكل موادها موجوده في البيت وتعطي نضاره فظيعه.
الخلطه ادتني هي صديقتي وقالت لي لازم تجربيها لأنه نتيجتها تظهر من أول استخدام
وأنا بصراحه كنت ناويه أجربها وبعدين أنزلها في المنتدى بس للأسف ما لقيت وقت فقلت خليني انزلها عشان البنات يستفيدوا خصوصا ان الصيف على الأبواب واللي تجربها تقولنا على النتايج.

نيجي لمكونات الخلطه
رز "يستحسن رز مصري"
جزر
بطاطس
عدس "البرتقالي" مطحون
حلبه مطحونه
قشر برتقال مطحون بس حاولي تشيلي اللب الأبيض اللي في القشر وخلي الجزء البرتقالي فقط
المقادير أنا سألتها قالت لي على راحتك يعني حطي الكميات الموجوده عندك من كل نوع بس قالتلي بالتقريب كده ممكن تحطي الأشياء المطحونه تقريبا كوب شاي صغير أو نص كوب كبير والأشياء الثانيه براحتك يعني ممكن كوب رز وثلاث أو أربع جزرات وحبتين أو ثلاثه أو أربعه بطاطس حسب حجمها.
الطريقه:
حاسه نفسي قاعده أسوي طبخه :hahaha:
جيبي قدر وحطي فيه مويه وأبدئي بسلق الجزر في الأول لأنه ياخذ وقت وبعدين حطي الرز والبطاطس لغاية ما ينسلقوا شويه وقبل مايخلص سلقهم بشويه حطي الأشياء المطحونه (الحلبه + العدس + قشر البرتقال) بحيث انهم ينضجوا شوي في النار عشان ما يخربوا لما يتحطوا في الثلاجه وبعدين خذي الخليط هذا وحطيه في الخلاطه أخلطيهم الين ما يمتزجوا مع بعض تماما وحطي الخليط في علبه وحطيه في الثلاجه وخرجيه بس وقت الإستخدام عشان ما يخرب.
ملحوظه وانتي بتسلقي الخلطه خلي قوامها يكون شوي سائل بحيث انه تقدري تخلطيه في الخلاطه.

نيجي للإستخدام
امسحي الخلطه على جسمك واستني شويه لغاية ما تنشف على جسمك وممكن تفتحي المروحه عشان تنشف بسهوله وبعدين حيبدأ:06: الدلك والشغل أبدأي دلكي جسمك عشان تطلعيها حتلاقيها ما بتطلع بسهوله بس استمري في الدلك الين ما تطلع وإذا غلبتك جيبي شوية زيت زيتون أو أي زيت تاني وأمسحي على جسمك وطلعيها حتطلع معاكي.

على فكره البنت اللي أعطتني الوصفه تقولي انها فظيعه لدرجة أن حتى الآثار اللي كانت في أقدامها من لبس الجزمه الله يكرمك تقولي راحت من أول استخدام وتقول انها تعطي نضاره ولمعه فظيعه للجسم وتفتح اللون هذا الكلام على ذمتها.
ويالله جربوها وقولولنا النتايج عشان إذا كانت صديقتي تكذب عليه أروح أهاوشها :mad:.
وقبل لا أنسى ممكن تحطي منها على الوجه بس لما تيجي تطلعيها أغسليها عادي عشان بشرة الوجه حساسه.