خلطه من المنتدى إعتمدتها حولت شعري من مطعج ومنفوش إلى0000

بسم الله الرحمن الرحيم
السلام عليكم ورحمة الله جميعاً

في البدايه أبي من كل وحده تدخل دعوه صادقه لي صاحبة الخلطه والله ناسيه إسمها
وأنا الفقيره لله بالمغفره والرحمه والستر
شعري يابنات كان يهبل نعومه وطول ومن ثلاث سنوات أهملته ماعد أزيت ولا أهتم وفوق كذا الصبغات اللي كسرته
وصار شعري مطعج زي المطبات فيه من فوق لتحت وواقف مافيه حياه ولالمعه الشعره نفسها يابسه وباهته لدرجة إن زوجي بدى يلمح لي وبعدها بدى يصرح بالكلام يقول شعرك خشن ماكان كذا
المهم من بعدها بس أبحث عن وصفات للشعر وتغذيته وأطيح بذيك الوصفه اللي دخلت مخي وغير كذا سهله وممكن تكونون قريتوها بس ماجا بالكم تستخدموها

الوصفه راح تغنيك عن الإستشوار إذا إستمريتي عليها أنا بانت النتيجه معي من ثالث مره
عباره عن
زبده
سمن مازولا أو شوكه وملعقه
زيت (اللي عندك سمسم ولا نارجين ولا لوز أنا ماعندي إلا عافيه وحطيته )

المقاديرعلى طول شعرك
أنا حطيت نص إصبع زبده وملعقتين كبار سمن وفنجال قهوه زيت أدهن شعري من الجذور للأطراف والزياده خليها بقاروره للمره الجايه لأنها وفره ماشاء الله
طيب بعدين غلفي شعرك بالقبعه البلاستيك أو بتغليف النايلون وإلبس فوقه شيله ولاقبعه صوف طبعاً هي كاتبه إنك تنفخين الماسك بالإستشوار أو تحطين فوطه ساخنه
أنا ماسويت الخطوه هذي وخليه بشعرك لمدة 6 ساعات وغسليه
والله يابنات كاني حاطه بلسم وأنا بالحمام شعري يتزحلق من يدي
شفت النعومه والطراوه من ثالث مره شعري إنفرد حتى الرجال لاحظ النعومه
وعلى فكره الأخت كاتبه ماسك ثاني كانت تستخدمه مع هذا بس الأغراض ماتوفرت عندي ولاسويته
عباره
أملج مطحون
محلب مطحون
زيت نارجين أو أي نوع تستخدميه
وبنفس الطريقه كانت كل مره تحط ماسك الزبده بعده بيومين ماسك المحلب لمدة 3 شهور وتغير شعرها من متقصف ومتنتف ومتقطع إلا شعر ناعم وصحي وكثير

الطريقه مجربه وإعتمدتها مرتين بالإسبوع مو منقول ولاكلام وحده غيري مجربته

دعواتكم بصلاح النيه والذريه وتسخير زوجي وربي يرزقني بالوظيفه الرسميه
يالله على بابك ياكريم