الحمـدلله ربي سهل علي ورحت موعدي وشاف الدكتور ايدي مشــاالله عليه تعامله مرن ويريح القلب


وحولني حق دكتور العلاج الطبيعي قالي خل يشوف الدكتور العصب والعضله وهالسوالف


ويحدد اذا فيه امل من العلاج الطبيعي والا اسويلج العمليه مبـاشره


وقالي مشـاالله وايد حالتج زينه ومن الناحيه التجميليه ماتحتاجين كلش لان ماكو فرق جبير بين جتوفج


واناجتوفي أثرت عليهم عوامل وبالذات جتفي الطبيعي الي شكله اعرض واكبر كنت دايما اشيل جناط ثجيله على هالجتف وما استغني عنهم حق السكول والدوام فإخفقت بجتفي شوي


ولما حركها وطلب مني أسوي حركات معينه قالي لا مشـاالله حالتج احسن بوايد مماتخيلت لانه يمرون علي حالات ماتتخيليين شكثر صعبه !؟


قلتله دكتور احس العلاج الي بقالي 20% جان يقولي مابي احطمج بس راح اكون معاج صريح لا يبيلها اكثر من 20%





ولماشافني دكتور العلاج الطبيعي قالي لا يبيلها علاج طبيعي لكنه راح يآخذ وقت


لانه فيها ضعف عضلي والمرفق بعد يبيله والعصب وحدد لي اشيـاء وايده بس ماركزت عالمصطلح الطبي


ولا طلب مني اسوي اشـعه ولا رنين مغناطيسي ابد


وبجذي راح يتم العلاج على مراحل وستبس وستب 1 العلاج الطبيعي والمده المتوقعه 3 شهور وطبع يعتمد على مدى استجابه جسمي


والمرحله التاليه العمليه


وطبعاالعمليه موأكيده لاني يمكن اتشافى من العلاج الطبيعي واسبق هالنقطه


وبعد كل هالاجراءات النتايج هيه الي راح تحدد لي الخطوه اليايه فماكو شي اكيد مجرد توقعات وخطط



واول وتالي يعتمد على ايدي نفسها يمكن العلاج الطبيعي مايفيد بالتالي راح اجرب بعد مره وتالي العمليه




وانا صراحتن متفاءله بالعمليه اكثر ,, وعسى ربي يسهل ويشافيني





ومن باجر على طول بلشت العلاج الطبيعي ,, يومين بالاسبوع


اول شي سوى لي الدكتور تمارين حق ايدي وقاس طول العضلات وشاف انه العظمه منكمشه وصغيره فيبيلها تمارين سترج عشان تنبني عالحجم الطبيعي


والتمارين كلها وانامنسدحه لانه سبحان الله حركه ايدي اسهل واكثر انسايبيه وانا نايمه اقدر ارفعها اكثر


وتالي حطلي آله على المفصل نفس الوخزات الكهربائيه تعطي ذبذات وتسوي مسـاج للإيد وحطلي فوطه مبلله بماي دافيه على كل ايدي وايد روعه وتريح وتلين الأيد

وخلتني احس بإيدي عدل لانه قبل بسم الله عليكم احساسي بإيدي مو سليم 100%


وآخر شي خلاني احرك ايدي على شكل دائري واناماسكه قضابه الي هيه الهاندل حق مجسم صاير على شكل سكان السفينه الخشبي واحركها


وعقبها حسيت انه ايدي صارت خفيفه ومرنه وايد


وقالي ماني مكثر عليج اليوم تونا اول يوم ومابيها تشد وتعورج لكن سوي هالتمارين بالبيت ودايما حركيها


والحمدلله على كل حـال


وشعوري ماينوصف اللهم لك الحمد حمدا كثيرا بقمه السعـاده


واحس بالي متطمن وضميري مرتاح وحتى لو مانحج العلاج وتمت ايدي على حالها لانه ربي كاتبلي هالشي


لكني حاولت ورحت وعابلت بعمري وماقصرت بشي والاهم من هذا كله دعاي ودعا حبايبي كلهم لي والي ماينسوني لابضيج ولاسعه


فديتهم وانتوا بعد ,, يزاآكم ربي ألف خير

الحمدلله صارلي 3 جلسـات عند Physiotherapy بالبـابطين


ومن ثاني جلسه قامت ايدي تعورني فيني عظمه بارزه بإيدي وشكلها غلط ومتحركه من مكانها وهذي الي قامت تعورني وايد


وساعات من كثر الالم ماااحس لكن مااشوف الا اني ماسكه هالمكان واقول آي اح ياااوج يعور


قلت حق الدكتور وقالي ممتاز هذا شي زين


وانا عن نفسي جدا جدا مستانسه من العلاج واحس انه ياب نتيجه حلوه وهذا بأوله الموضوع توني خالصه 3 جلسات


بس نفسيا رتحت بعد


وايدي قمت احركها تلقيائيا وانا ماادري ولله الحمد


كافي احساسي بوجودها وانها خفيفه ومرنه





وحبيت اقولكم عن طرق العلاج الي وصاني عليها الدكتور لتعم الفايده :



1) يسوي تمارين معينه عشان يحرك العضله وانا نايمه ; لانه سبحان الله اقدر ارفع ايدي وانا نايمه اكثر مما انا قاعده على حيلي او واجفه



2) بإستخدام مشين يحطه على جتفي ويشغله لمده نص ساعه يمكن .. تسوي مسـاج لإيدي وتفجج الإيد تحسون لانها ترسل مثل الاهتزازات والذبذبات الكهربائيه



3)وآخر شي يحطلي نفس سكان السفينه وله هاندل واحركه وانا واجفه



بس الشي اليديد هالمره سويت التمارين وانا قاعده بعد مو بس نايمه وشيلي اثال 1 كيلو وخلاني اسوي حركه نفس البش أب بس عالطوفه




والحمدلله نفسيتي مرتـاحه واحسه يايب معاي نتيجه اللهم لك الحمد حمدا كثيرا


وعسى ربي يشافيني ويشافي كل الي يعانون من اعاقتي ويشافي يميع مرضى المسلمين

وبالجلسه الثالثة زود لي الدكتور عدد الهرتز بالجهاز و زود علي التمارين



وحتى حاول انه يخليني ارفع ايدي لي ورا وانا نايمه على بطني لكني ماقدرت جان يقول تو النـاس عليج بهالحركه




وخلاني اشيل اثقـال 1 كيلو وقالي اشتري وسوي هالتمارين بالبيت




وخلاني افرد ايدي وهي مقلوبه وانا ماسكه اثقال 2 كيلو هالحركه جدا جدا متعبه ولازم يكون الجتف مشدود والإيد مفردوه عدل وستريت




لكن الحمدلله الحتحسن ملحوظ وانا مشكليت انه في عضله قصيره وكل مالي واحس فيها تطول




وبالنسبه للعمليه قال انهم يحطون لي ضلع زياده بظهري وانا مادققت عدل لانه بعدني بقت لي جلسـات وايده ولمده 3 اشهـر

وبـالجلسه الرابعه زوّد علي الدكتور الجيله يعني بكل شي شد وسواه إكسترا


وزيد عدد الهرتز بجهاز الذبذبات الكهربائيه و تعمق اكثر بالتمارين




وقام يعطيني دمبلز( اثقال) وزنهم 1 كيلو او نص كيلو اشيلهم وارفع ايدي وانا ماسكتهم بزاويه معينه


وسبحان الله عظمه ايدي الي ورا تتحرك معاه احس فيها تطقطق




وقالي سوي هالتمارين بالبيت وشيلي دمبلز (اثقال)


وقال الحين كل شي اوكي بس مشكلتنا لفه الايد اني مااقدر الفها يمين ولايسار





فياب لي سناديه وحطيت ايدي عليها وهيه ملفوفه وانا ماسكه الدمبلز الي وزنهم 2 كيلوز والف ايدي لي برا عشان اسوي لها سترج strech



وصاني بعد اني اشتري شمع البرافين الي يي معاه زيت البرافين وادهن ايدي فيه قبل التمارين


وقال ينباع بالصيدليات الجبيره



ولله الحمد الامور طيبه وسـالكه

وانا حاسه بإيدي انهاوايد متسنعه ولله الحمد قمت احركها تلقائيا وبالفعل احسها خفيفه ومونفس قبل زود ثجل علي


الله يتمم علي ويشافيني ويشافي كل مريض

واسم إعاقتي طبيا erb's palsy