السلام عليكم ورحمة الله وبركاته
في البداية أحب أنوه على كم شغله:
1/ هذي أول مشاركة ليه في المنتدى ، فبليز أحتاج تشجيعكم أو توجيهكم أو انتقادكم أو
حتى تعليقكم
2/ كتبت هذا الموضوع ردا على موضوع جاني في الايميل اسمه(أحلى تحية لشعب
السعودية) لكاتبه رمزت لاسمها ب: نونا . وكانت تتكلم عن البنات اللي ينزلو صور لهم
زي شفايف وعيون أو مقفاهم وغيرها من الأشياء التافهة.
3/ أنا أرسلت موضوعي هذا للمضافيين عندي في الايميل ، وشجعوني على نشره
في أي منتدى لأنه يحمل أفكار حلوة بأسلوب حلو ، على حد كلامهم، فأخترت منتدى
عالم حواء لأنه قريب لقلبي كثير.
ما أطول عليكم..اليكم الموضوع.........
خلونا نبدأ
.
.
.
.
كان يا مكان
قبل شهر زمان
لما كانت غزة تنداس وتنهان
دق جرس الباب في عز النهار
فتحنا الباب وطلع الطارق شاب فنان
عنده لوح فنية يبغا يبيعها ويكسبله كم دولار
المهم يا اخوات ويا أخوان
طلع حضرت الشاب من اسرائيل
طبعا كان بإمكان الشاب انه يتجنبنا ويقول أوه آسف أنا غلطان
لأن أشكالنا واضحه اننا عرب ومسلمين كمان
لكن بكل ثقة وابتسامه عريضه قابلنا وحكالنا قصته
قال احنا مجموعة شباب فنانيين ..من اسرائيل جايين
نزور كذا مدينة في استراليا ونقعد فيها الى حين
ندق على البيوت ونروج للوحاتنا الفنية
بصراحه لوحاته كانت مرة حلوة ..وفيها رخص شوية
بس احنا رفضنا نشتري منه ، وقدمناله الأعذار
قال (أوكي هذا رقمي كلموني اذا غيرتو رأيكم) عن رضا خاطر وبكل احترام
سكرنا أنا وزوجي الباب و وجيهنا تعلوها كذا علامة استفهام
تبغو الصراحة ، أنا عن جد انقهرت من هالانسان
تعرفو ليه؟؟
أولا: لأن عنده هدف في الحياة وقاعد يسعى لتحقيقة ، بالرغم من انه هدف دنيوي
ثانيا: لأن اللي قاعد يسويه ما هو الا محاولة منه هوا والفنانيين اللي معاه انهم يحسنون سمعة بلدهم في الوقت اللي كانت أيادي بلدهم ملطخه بدماء الفلسطينين الأبرياء، وكأنهم يقولو للعالم ترى موكلنا كذا ، وفعلا وصلت رسالتهم
ثالثا: لأنه ما غلط ومعاملته كانت جدا راقية ، بالرغم من انه يهودي اسرائيلي دينه ما علمه حسن التعامل ومبادئ الأخلاق
وانقهرت أكثر وأكثر لمن قارنت بينه وبين حال أغلب شبابنا وبناتنا ..اللي تفكيرهم ما يتعدى شراء شنطة ماركة أو سيارة كشخة أو آخر جهاز جوال نزل للسوق أو ......غيره من الأشياء التافهة
وفي نفس الوقت أحزن عليهم..وأقول الذنب مو ذنبهم لحالهم
تسائلتي يا نونا كيف وصلنا لهذي الدرجة من فراغ الأخلاق؟؟؟
حقول لكم حقيقة مهمة ..لمن يكون كل واحد من الوالدين عايش حياته لنفسه .. الأب لاهي ورا لقمة العيش .. والأم من عند فلانه لعند علانه .. ويزيد الطين بله لمن تكون تشتغل
أنا مو ضد انها تشتغل .. ولا ضد ان الأب يسعى ورا لقمة العيش ..لكن لازم على كل واحد منهم يقوم بواجبه لعياله تحقيقا لسنة التوازن اللي قال عنها رسولنا الحبيب : ( الرجل راعٍ في أهله و مسئول عن رعيته، والمرأة راعية في بيت زوجها و مسئولة عن رعيتها) وقوله صلى الله عليه وسلم : (كفى بالمرء اثماً أن يضيع من يقوت ) يعني من يعول
يا جماعة ، في ظل غياب المربي تزل الأقدام .. وتنحرف القلوب .. وينقلب الحرام مباحا بلا حدود .. ويظهر في مجتمعنا بنات لا هم لهم سوى القشور
والطامة الكبرى لمن يعتقد الآباء والأمهات ان التربية هي تلبية النداء المادي لعيالهم وبس .. ويتجاهلو النداءات الأكثر أهمية مثل النداء الروحي والمعنوي والنفسي
لما تطلب البنت لاب توب يجيبولها اياه بدون ما يفكرو هل هو كويس لها أم بطال أهم شي يجيبولها زي صديقتها
طيب جبتو اللاب توب .. خلاص مهمتكم هنا انتهت؟؟
لااااااااااااااااااااا ما هكذا تورد الابل يا آباء و يا أمهات
واجبكم تخلو عينكم على بنتكم بدون ما تحسسوها انها مراقبة...كيف؟؟؟
يعني مثلا : يقعد الأب (أو الأم) مع بنته ويناقش معاها كذا موقع مفيد على الانترنت ويطلب منها انها تشترك في هالمواقع ، وبعد فترة يسألها عنها و أش سوت فيها و أش آخر أخبارها ، عشان يجس نبضها ..هل هي قاعدة تستفيد من اللاب توب ولا تضيع دينها وأخلاقها !!!!!!.؟
وبين كل فترة وفترة يجلسو معاها على الانترنت ويشاركوها هالمتعة
و أهم من كل شي ان الانترنت ما يكون على طول شغال ، يعني يحددو كم ساعة في اليوم يسمحو فيها بتشبيك الانترنت وبعدين خلاص .. لأنه يا جماعة الانترنت بدون رقابة ضياااااااااااااع
واذا انتم مو قد المسؤولية .. وما انتم قادرين تفرضوا قوانين وسياسات للانترنت داخل بيتكم عشان تحمي بناتكم .. لا تجيبو انترنت من أصله
شي ثاني يخليني ما ألقي بمسؤولية اللي صاير في الانترنت على عاتق هذولي الضعيفات وبس
لو قدرنا نعرف أعمار البنات اللي يسوو الحركات التافهة اللي تكلمت نونا عنها .. فأتوقع ان أغلبهم حيكون في سن من 14 الى 25 سنة
هذا سن مشحون بالطاقات .. ومليء بالنشاط ..وهو سن الثورة والحركة..وين راح يودو كل هذي الطاقات والنشاط؟
لما ما يلقو الأنشطة اللي تمتص طاقاتهم ويقدرو يفرغو فيها حركتهم ونشاطهم تتوقعو هالطاقات حتموت !!؟؟
لا ما حتموت .. لأن الله بقدرته سبحانه استودعها في أجسامهم الغضة ..فالطاقات فيهم فيهم .. وين يصرفوها؟؟مين اللي حيستوعبها؟؟ وكيف حيوجُهوها؟؟؟
من الطبيعي جدا اذا ما لقيو الطريق الصحيح اللي يفرغو طاقاتهم فيه أكيد حيتجهو لطريق ثاني وهوا الطريق الخطا .. وبالتالي من الطبيعي اننا نشوف أمثال البنات اللي قالتلنا عنهم نونا
اذن هنا المجتمع قصر في حقهم
أش فيها يعني لو فتحنا أندية نسائية مو بس مجهزة بأجهزة رياضية ومُدربة فلبينية أو مصرية وبس
لا ..ليه ما نحطلهم تنس؟؟..ليه ما نخليهم يلعبو كرة سلة؟؟.. ليه ما نخليهم يسبحو؟؟.. ليه ما نعلمهم يركبو خيل؟؟.. أش فيها يعني حرام ؟؟؟
ليه ما نخصص لهم مكان يسوقو فيه سياكل ؟؟ ويلعبو سكيتينج؟ و رولر بليدينج ؟؟
أش فيها يعني حرام؟؟؟
ليه ما نجهزلهم شاطيء بأحسن التجهيزات ونخليهم يسبحو في البحر .. ويسوقو الجت سكي.. ويركبو دبابات .. ويسوو حفلات شوي كباب وغيره؟؟ أش فيها يعني حرام ؟؟؟
عن جد يا جماعة يعني هذا شي حرام؟؟..اذا كان كل اللي قلته وفق ضوابط ديننا الاسلامي ..هل ممارسة المرأة للرياضة حرام؟؟
اذا مجلس الشورى السعودي بكبره لا يرى وجود ما يمنع ممارسة الرياضة للمرأة اذا لم تتعارض مع الشريعة الاسلامية .. وجابو شواهد و أدلة تدعو لممارسة الرياضة .. وحتى الأعضاء اللي عارضو الرياضة كان السبب قناعات مرتبطة بالتقالييد والعادات الاجتماعية مو لأنها تخالف الدين
اذن وين المشكلة ؟؟؟؟؟
واذا عرفنا ان الدولة ما حتقصر وحتسوي اللي عليها
اذن وين المشكلة ؟؟مين المقصر؟؟؟؟؟
احنا المقصرين
أنا وانتي وكل بنت في السعودية
عارفين ليه؟
لأننا ما نطالب المسؤولين بحقنا في تفريغ طاقاتنا ونشاطنا
توقفت عقولنا عند سواقة السيارة.. حنسوق ولا ما حنسوق؟؟
حيفتحولنا سينما ولا ما حيفتحو؟؟
حيخصصولنا مكان في الحفلات الغنائية ولا ما حيخصصو؟؟
ونطالب بأشياء تافهة اذا ما حترجعنا لورا ما حتقدمنا خطوة لقدام
المهم ما أبغا أتفرع عن الموضوع الأصلي.. خلونا في واجبنا كبنات و أمهات لبنات
حتقولو كيف نطالب المسؤولين؟؟ وكيف نوصل لهم؟؟
الجميييييييييع ممكن يشارك
الطالبات في المدرسة والجامعة ممكن يكتبو معروض لرئيس بلدية المدينة اللي هما فيها، يطالبوه فيها انه يفتحلهم نادي نسائي يمارسو فيه عدة رياضات مختلفة تنس..سلة..وغيرها
ما أقولكم انه من أول معروض راح يوافقو
في أول مرة حيشققو المعروض وهما يضحكو..لكن مرة فوق مرة فوق مرة حيعرفو ان المسألة جدية .. وكثرة الدق تفك اللحام .. ولا لأ؟؟
وكمان الموظفة في مستشفى من المستشفيات الكبيرة ممكن تقترح على صاحب المستشفى انه يفتح نادي رياضي تابع للمستشفى .. وتوضحله قد أيش المجتمع في حاجة له
وكمان الموظفة في بنك ممكن تعرض هالفكرة على سيدة أعمال ما تعرف من الأعمال الا انها تفتح مشغل نسائي
وكمان اللي أبوها أو أمها أو زوجها أو أخوها عنده حلال تطرح عليه هالفكرة
وبكذا كل وحدة في مجالها وتخصصها ممكن تسوي شي..حتى لو ما ينالنا منهم أي تصرف أو فعل فاحنا قدرنا أقل شي ننشر هذي الثقافة في أوساط المجتمع السعودي ..وبكذا نكون طلعنا أول درجة من السلم
الوضع يحتاج فترة طويلة الى أن يتغير .... لكن خلونا نبدا
اسمحولي أرجعكم حبتين لقصة الفنان الاسرائيلي
تتذكرو لمن قلتلكم ان من الأسباب اللي قهرتني منه انه حاول هوا والفنانين اللي معاه انهم يحسنو سمعة بلدهم الملطخة بدماء الفلسطينين الأبرياء؟؟
طيب ليه يحسنو سمعة بلدهم؟؟
أش تعنيلهم اسرائيل؟؟
يحبوها؟!يغارو عليها !؟ ما يبغو أحد يتكلم عنها بسوء!؟ يحاولو يخفو جرايمها!؟؟؟؟
طيب واحنا؟؟
مو من باب أولى أنو احنا اللي نحب بلدنا ..ونغار عليها .. ونذود وندافع عنها؟؟ لأنها بلد الاسلام؟؟
ولا عادي الناس يشمتو فينا؟؟
أنا أعيب على الكاتبة الدكتورة رجاء الصانع انها سمحت لروايتها بأنها تُترجم لأكثرمن 22 لغة
(اذا هيه فعلا سمحت، وفعلا تترجمت )
أنا مو ضد انها تناقش حالات موجودة في المجتمع السعودي بكل شفافية
لكني ضد وبقوة نشر الغسيل
وعلى قولة نونا البيت الواحد نلقى فيه الصالح والطالح
لكن ولا وحدة مننا ترضى ان اختها الصغيرة تروح تنشر غسيل بيتهم عند بيت عمها ولا خالها ولا الجيران.. فما بالكم بالأعداء؟؟؟
نناقش مشاكلنا زي ما نبغى ..وبدون أي تحفظات .. لكن مو لازم نسمّع الناس والأعداء اللي ما حيجينا منهم غير الشماتة والاستهزاء بديننا ..ولو في واحد منهم معجب بالمجتمع الاسلامي حيبطل يُعجب
ليه نسيء لديننا وبلدنا عشان غرض دنيوي حيزول بزوال أجسادنا عن الأرض؟؟
يا جماعة لازم نعرف ان الأضواء مسلطة علينا ..والمتآمرين يحيكون الخطط ضدنا .. ويفرحون لهبوط أخلاقنا ..لأنها وسيلتهم لتدميرنا .. واسقاط ديننا وحضارتنا..
فالله الله يا بنات الاسلام
لا تشمتو فينا الأعداء..ولا توقفو معاهم ضد وحدتنا
الله الله بالأخلاق الحسنة اللي تعكس عقيدتنا ومبادئنا
ترى انتم تمثلون دينكم
لا تتوقعو ان السخافات اللي قاعدة تصير احنا وبس اللي نشوفها!!! ترى ابليس وأعوانه من البشر مرة مبسوطين منكم
خلونا نزعلهم..خلونا نقهرهم
خلونا نغير اهتماماتنا الانترنتيه من تافهة لنافعة ومفيدة
وترى والله فرق كبير بين الاثنين..بدل ما تقومي من الانترنت وانتي ضايق صدرك وحاسة بهم وحسرة وندم واحباط وملل ودهشة من وقتك اللي مر بسرعة وما حسيتي فيه
حتقومي وانتي راضية عن نفسك مطمئنة مبتهجة منتفعة
و زي ما في الانترنت أشياء بطالة ..فيه أشياء كثييير مفيدة ومرة مسلية
تعرفو مين هوا الرجل الذي لم يحرق باريس؟؟ -
تعرفو مين هما الأوبريجنال؟؟-
تعرفو مين أول امرأة لبست الحلق؟؟-
تعرفو عجائب الدنيا السبع الجديدة ؟؟-
تعرفو شي عن مرض بروجيريا (الله يجيرنا)؟؟-
ابحثو عنها في جوجل
طيب سمعتو عن كتاب (المائة الأوائل) لمايكل هارت ،اللي كان فيه رسولنا أول المائة وعلل الكاتب قائلا: (ان اختيار محمد ليكون الأول في قائمة أهم رجال التاريخ قد يدهش القراء، ولكنه الرجل الوحيد في التاريخ كله الذي نجح أعلى نجاح على المستويين الديني والدنيوي)..ء
طيب سمعتو عن كتاب (الدول الفاشلة) لنعوم تشومسكي، اللي انتقد فيه أمريكا وتزعمها قيادة العالم من غير وجه حق
طيب سمعتو عن كتاب( شوربة الدجاج لحياة المراهقين) لجاك ، ومارك، وكمبرلي
وحتلقو كثير كتب تناسب ميولكم و أعماركم بس انتم زورو المكتبة
الحين خلونا نبدأ أول خطواتنا
Delete نروح للصور ونعملها
و من حياتنا نكنسل كل شي مو مفيد
وندعي ربنا انه يسامح ويغفر ، ومن أمثالنا يزيد
و نوصل هذا الايميل لأكثر من صندوق بريد
كل ما سبق هو رأيي الخاص ، و لأني بشر قد أكون أخطأت فصححولي، وقد أكون أصبت فادعولي
NORA
نورة 111 @nor_111_1
عضوة جديدة
يلزم عليك تسجيل الدخول أولًا لكتابة تعليق.
الصفحة الأخيرة
الله يسعدك ياشيخه كلامك درر..
الله يجعلك ذخر للأسلام والمسلمين..:)