خلونا نفرفش شوي مع هدايا الولاده

قوه بنات اخباركم بما اني مليت من المواضيع في ذا القسم ومليت من جنس الجنين تخفيف الام الولاده ومتى اولد وانا تعبانه خلونا نفرفش شوي:) وكل وحده تقول وش اغرب هديه جتها او افخم هديه او مثل حالتي جتني وحده من صديقاتي وكانت جايبه هديه مغلفه وشكلها فخم مره وخواتي الصغار متحمسين وبنتي متحمسه ودها تشوفها وبيني وبينكم انا كنت متحمسه بعد لان زوجها غني مره وهي نفسها غنيه ومن زمان ما شفتها وكانت كل ما تتكلم عن حياتهم والهدايا اللي تهديها صديقاتها الثانيات اقول ما شا لله عليها المهم اول ما طلعت صديقتي بنتي وخواتي ركض على الهديه يوم فتحوها تحطمو لانها كم بدله باين عليهم رخيصات مرررره ومقاساتهم كبيره مره على العموم جزاها الله خير بس كل ماتذكر شكل بنتي وخواتي وهم متحطمين اضحك من قلبي عليهم اما احسن هديه فكانت سواره ذهب يالله يابنات اتحفونا بالمواقف اللي صارت لكم وخلونا نضحك شوي عطونا افخم هديه وابيخ هديه وموقف ثاني صار لي مع الهدايا ايام زواجي عمتي عمت ابوي حرمه كبيره مره من تزوجت وهي تقول شاريه لك ساعه ابعطيك اياها ونسيتها بالبيت وانا اقول ليش ياعمه مكلفه على نفسك المهم مر كم شهر وتزوج عمي وعطت عمتي زوجته الساعه اللي كانت بتعطيني اياها وكانت رابطتها بكيس مستشفى حكومي وقالت هاذي هديه اول بعطيها فلانه واللحين خلاص كم لها متزوجه خوذيها انتي وطلعنا من عندها ميتين من الضحك انا انحرجت وزوجة عمي منحرجه مع ان الساعه قيمتها ما تعدا خمسين ريال تذكرو مواقفكم واسدحوها خلونا نضحك