خلوني افضفض يمكن ارتاح

لي صديقه عزيزه وغاليه جدا
منزلتها لقلبي قريبه
مثل اختي تقدرون تقولون
سنين طويله قضيتها معها ومن اجمل السنين


طبعا كبرنا مع بعض ودرسنا مع بعض وكانت احلامنا نتوظف سوا ونستمر في علاقتنا الى الابد


اللي حصل اني الفتره الاخيره صرت اتحسس كثير او ما ادري يمكن اكون ع حق او مايكون معي الحق
صديقتي هذه تزوجت وفرحت لها من كل قلبي وقمت بواجبها وساعدتها ووقفت جنبها في كل مراحل تجهيزها الى اخر لحضه وكانت لما تراسلني وتبلغني عن اي شي يصير
مثلا تقول قررنا انا وزوجي نسافر المكان الفلاني قولي ماشاء الله
او تقول زواجي راح يكون بالقاعه الفلانيه قولي ماشاء الله !
كانت دايم اذا بتخبرني اي خبر تقول اذكري الله
رغم ان ذكر الله على لساني على طول
هل خايفه اني بحسدها او بصكها عين!
ذي مثل اختي ذي قرررررريبه لقلبي
ذيييي سعادتها هي سعادتي!!


حاولت اتجاهل هالامر وكنت اقول ماعليه البنت تذكرني بالله عادي


لكن في امر ثاني ضايقني وممكن هالشي خلا عندي حساسيه منها
قبل خطبتها كانت دايم تلمح لي شرايك يافلانه اخطبك لابوي! وانا كنت اخذ الموضوع ضحك واستهبال ماكنت اخذه بجديه
رغم انها تكرره لي دايم هالطاري
مع العلم ابوها مزواج يعني ماتبيني ضره على امها
في عنده حريم غير امها


الحاصل انها بعد ماتزوجت وخلصت رجعت فتحت لي هالطاري! وانا هنا جدا تنرفزت
كنت بقول تخطبيني انا لشايييب كبر جدي!!
بس خفت اجرحها او اغلط على ابوها


بس جد موضوعها نرفزني
هل علشان عمري صار بالثلاثين تشوف ان فرص الزواج قلت عندي؟
مع العلم هي بعمري وجاها شاب اعزب
!!
يعني مادري كيف قلبها يقوللها كذا
كيف تخطبني انا لابوها وهو كبير سن وغير كذا عنده حريم وانا اصلا كبر بناته!!!!
الموضوع مهين بالنسبه لي وجارح جدا




رغم اني ماحمل بقلبي لها الا كل حب واخلاص
ودايم اخصص لها وقت ادعي لها
وكنت دايم ادعي ربي يرزقها زوج صالح يسعدها


بس مادري هل الموضوع فعلا منرفز
والا انا اللي صايره حساسه؟
لاني لما اجلس مع نفسي اقول ممكن اكون اتحسس لان اشوف صديقاتي كلهم تزوجو واستقرو وعندهم اولادو اللي لاهيه بوظيفتها وانا فاضيه لاشغله ولا مشغله؟




لاحول ولاقوه الا بالله
الحمد لله حتى يبلغ الحمد مبتغاه