خواتي يادلالي

بسم الله الرحمن الرحيم
والصلاة والسلام على رسول الله
كل عام وانتم بخير ياخواتي وأسأل الله أن يعد علينا رمضان أعوام عديدة وأزمنة مديدة
السلام عليكم ورحمة الله وبركاته

اليوم موضوعي مهم جداً ياخواتي عن الخوات وعلاقتهم ببعض

اقصد بعلاقتهم يعني روحهم تكون ع بعض. يساعدون بعض

يتمنون الخير لبعض مافي حسد ولاغيرة ولاشوفة نفس

لان هالأيام صراحة نسمع قطيعة بين الخوات حسد

وهذا ما يصير وأنتم خوات

راح اقولكم عن خواتي كلهم وكيف حنا ع قلوب بعض صحيح تصير مشاكل وخلافات

بس نرجع لبعض ونتصلح

حنا تسع بنات. 3متزوجات وواحدة مطلقة الله يعوضها خير ويفتح على بصيرتها وخمس بالبيت

الأخت الكبيرة /
ماهما كتبت وكتبت فلن أوفيها حقها أختي هذه عمرها تقربياً39
معاقة تمشي ع عكازة يابنات مهي متزوجة يابنات تحسبون أنها زعلانة ولامتضايقة ولا تعيش حالة نفسية عشان ما تزوجت ومعاقة لالالالا وألف لا والله ان خواتي اللي تزوجن كلهم هي توديهم لأفخم الأسواق وأغلى المحلات وتروح تقضي لهم بكل سعادة وحب يابنات لمن يكون في مناسبة او طلعة او زواج. نروح لغرفتها ونأخذ أشياء المناسبات منها مثلآ شنطة ساعة اكسسورات عطر هي عشان غرفتها كبيرة ماشاء الله تحسين انك داخلة سوق والله يابنات أعزكم الله الى درجة لما تجنيا الدورة نروح نقول لها نبي فوط وتعطينا لانها تجيب فوط بالكرتون وتحطها فوق عندها بالغرفة .....حتى في حريم يقولون فلانة ع خواتها كأنها أمهم مهي أختهم هذي أختي حبيبتي عجزت توفيها الكلمات والحروف......
الأخت اللي بعدها/
يا لبى قلبها والله عمرها طويل توها دخلت علي الغرفة وانا قاعدة اكتب طبعاً هي مهي متزوجة يابنات ما عندها شعور سيء او إحساس معدوم انها مهي متزوجة بالعكس عايشةحياتها تروح للأسواق وتمشي مؤ معناها أنا ما تزوجت خلاص أحزن وأبكي وأتعب نفسي واللي حولي
هي ياقلبي جتها ارض وجبت لامي ثلاجة ال جي. وجبت لأخوي آيباد اللي قاعدة اكتب فيه الحين
وجبت لثلاثة من عيال خواتي أيبادت وحطت فيهم شرائح انترنت وكل شوي تروح وتنزل لهم احدث الألعاب هي طيبة وتمزح وتضحك بس شوووويات فيها عصبية الله يخليها لنا
أختي أم تركي /
هي متزوجة وساكنة بالرياض عنها ولدين وبنت ربي يساعدها ويرزقها غنى النفس والمال
طيوبة كثيييير وتحب اهلها اكثر من زوجها هههههههههه
أختي أم عبدالله /مطلقة
ربي يعوضها خير ويفتح ع بصيرتها
أختي أم بسام/
طيبة وهي موظفة فلوسها لأهلها امس تقولي يالله قد ايش أنا مبسوطة عشان أنا عندكم
وربي هي تدفع لي رسوم الجامعة 3000ريال ياااارب تجزيني وارد لها ربع اللي سويته لنا وجبت لنااا لاب توب قبل تقربيآ خمس سنين. بس خلاااااص ياعمي رااااح زماااان اللاب توب الحين آيبادت وايفونات ههههه إيه صح هذي أختي تبي شيء يحرك وزنها لانها نقصت عشرة كيلو ووقفت بعده ماتحرك وزنها وش اللي يحرك الوزن<<<<<<موضوع آخر
أختي أم محمد/
حامل وربي يهون عليها أنا احبها لأني تجيب لي أغراض الحلى وشكولاتات وتسوي لنا اكل لذيذ
وطبعآ عشانها أختي فلذلك أنا احبها وهي ع راسسسي
اممممممممم
خلصنا من الكبار الحين نجي للصغار وانا من ضمنهم هههههه
أختي تووووني /
ربي يساعدها وينول لها مرادها اليوووم راح يجيها حافز يالبى تووووني والله
ياانا مجهزة ورقة طول وعرض أغراض وطلبات وحركات قلت لها لازم اليوم تجيبينها
هههههه
اخوي الغالي /
محمد لبى قلبه هو مهو متزوج بس أنا احب اسميه ابو صقر السنة الماضية مرة كنا نتفرج الحجاج
بالتلفزيون عاد هو قال إن شاء الله السنة الجاية تكون معي ام صقر. وينك يا ام صقر تعااالي هههههه هذا اخوي ياعمري تعرض لحادث قبل 6سنين تقريبًا هذا الحادث ياخواتي غير ميزان حياته حتى حنا تعبنا يااارب انك تهديه وتصلحه أمانة يابنات ادعوا له
أختي سوسو/
الله يصلحها شقية وماتنام تحب تواصل يومين. تكلم صديقاتي بالمسن وانا قول لها ماشي ماشي ياسوسو هي بعد اليوم راح يجيها حافز لانها هي وتوني سجلوا بيوم واحد

الصغنونة الأمورة آخر العنقود /
مالكة الإبداع مريومة
قسم تاريخ المستوى الثالث بالجامعة احب خواااتي واعشققققهم. صحيح والله تصير مشاكل
بس مردنا لبعض في الاخير


ياخواتي والله أني ما كتبت هالموضوع الا عشان اللي صايرونسمع فيه هالأيام

يااارب قال وش أخت تسلف أختها ياكبرها عند ربي أنتم خوات وش تسلف ما تسلف

ذاك اليوم اقول لأختي تووووني اذا جاك حافز راح اتسلف منك. 100ريال وعاد تطلعك

ذاك النظرة الحادة مع الناعمة وتضحك

انتم خوات ياخيتي. حتى اذا هي غلطت سامحيها حنا في شهر الخير

كوني انتي المبادرة. الله عزوجل يرفع اعمال العباد. كل اثنين وخميس الا المتخاصمين

ويقول الله ردو أعمالهم حتى يتصالحون

لا تقولين كرامة وعزة نفس. هذي خليها ع وحدة ثانية أماااا أختك لاااا
لا تقولين عيالها يضربون عيالي. بالله من جدك انتي بزران يفرقون بينك وبين أختك. بكره يكبرون العيال ولا عليهم

بكره لو قالوا لك. فلانة ماتت. صدقيني بتكونين انتي اكبر ندمانة وماراح تسامحين نفسك ابد


أختكم ومحبتكم / مالكة الإبداع
بحفظ من عينيه لاتنام