خواتي يتدخلون بحياتي

سلام 
علومكم اخباركم وش مسوين. 


المهم
بدخل بالموضوع 

مشكلتي مع خواتي هم 4 وثلاث متزوجات باقي وحده والله من جد اتضايق منهم مرررره يعني من ناحيه كل شي
 ماشاء الله اصغر خواتي عمرها 32 وانا عمري 14 يعني فرق بيني وبينهم اذا جيت ابي اسولف معاهم مااحب سوالفهم والله من جد يعني يتكلمو بناس مااعرفهم اساساً
 زي لو اجلس مع صاحباتي تفكيرنا متقارب وعلى هذا يجلسو يطقطقو علي انتي نفسيه ومدري ايش واذا قلت لهم مااحب سوالفكم في فرق بين سني وسنكم يقولو متكبره ويزعلون يعني اش دخلني حتى كرهت الزواجات كرهت اروح عند احد بسببهم يحرجوني قدام الناس والله قهر واذا مارحت معاهم يقولون نفسيه اجلسي بالبيت احسن لك
والمدرسه تخيلو همم اللي يشترو اغراضي حتى المريول يشترولي واحد قد ايش كبره واذا قلت وسيع يخاصموني ويقولو كذابه احنا مانشوف كذا وربي شكلي يفشل نفسي افصل مريول واكشخ زي صاحباتي واروح المدرسه هم مايخلوني يقولو اذا شافوك المعلمات متكشخه بيهاوشونك واحنا مدرستنا والله العظيم مايقولو شي ووحده من خواتي متزوجه ولد خالتي وتروح عند خالتي وتشوف بنتها كيف تكشخ وتلبس يعني وش ناقصني عن غيري والله حياتي صارت ملكهم مو معطيني الثقه مررره يعني الحين امي الله يخليها قلت لها بفصل مريول قالت عادي روحي بس خواتي سمعوها قالو لا بعدين تدشر وتنحرف طيب ابي افهم وين الانحراف في اني بفصل مريول زي البنات والله اني اتمنى بعض الاحيان اختي اللي بقيت تتزوج واخذ راحتي 


يارب تفيدوني والله العظيم طفشت اللي قاهرني بالمدرسه ابي اكشخ زي البنات وكذا تخيلو من اولى ابتدائي للحين وانا بنفس تسريحه الشعر يعني لا تقولو يمكن مستوانا المادي مايسمح وربي بالعكس مستوانا مرتفع الحمدلله والله مو ناقصنا شي بس اللي قاهرني خواتي

واسسسفه طولت عليكم بس من جد ماني لاقيه احد يفهمني فقلت اقول مشكلتي هنا ان شاء الله يفيدوني