خوي طلبني ولا أدري كيف ارد

السلام عليكم ورحمة الله وبركاته أنا عندي معرف ثاني بس لأن مابي أحد من الأقارب يعرفني
المهم بدخل بالسالفة على طول أنا ياطويلات الأعمار عندي أخ الفرق بيننا سنه ومن حنا صغار وحنا نمون على بعض وتخرج الحمد لله طبيب وتزوج طبعا أنا اللي اخترتها له والبنت حلوه وخلوقه ومتعلمه وكل الصفات الحلوه فيها ورزقهم الله بنوته زي العسل لكن صار ظروف خارجه عن إرادتهم الاثنين وصارت تجلس عند أهلها بالأشهر بعيد عن الرياض طبعا بأكثر من ألف كيلو وتجي عنده شهر وبعدين ترجع لهم وصار لهم على هالحال سنه ودوامه مره ربطه ماعنده وقت يروح لهم بس ينتظرها لين تجي. المهم فاتحني قبل كم يوم يقول أبي أتزوج بالسر 😮 أنا انصدمت وتكلمت عليه انك خاين ومدري ايش وراح من بيتنا زعلان.
اليوم جانا الغدا وفتح الموضوع مره ثانيه قال يابنت الحلال انا احبها وفيها كل شي لكن احب الله أكثر واخاف أخون الله صراحه هنا استغربت يعني هالرجال لهالدرجه مايقدر طيب المسكينه اش ذنبها يقول أبي اتزوج وحده أرمله اساعدها بتربية أطفالها ومنها تسترني وزوجتي مارح تدري عشان مااجرحها اللي فيها كافيها واصلا حنا متفقين ان الطفل الثاني نتبنى طفل معه وهي مو مقتنعه مره لكن إذا تزوجت أرمله بكفل أطفالها وهي تربيهم وإذا مالقيتي أرمله عادي مطلقه أهم شي وحده ماتتشرط كثير لأن هو عنده قرض ومديون في عقار. المشكله يابنات توهم عرسان ماصار لهم ثلاث سنوات وهو صغير بعمره باقي بدري على التعدد وحنا قبايل يعني لازم وحده معروف ابوها وجدها وهو يقول مافرق معي الكلام الفاضي هذا اهم شي تصلي الخمس بوقتها وشكلها مقبول وترضى بالسريه إذا تعدلت اموري أعلنت، قلت طيب دراستك لأن احتمال السنه الجايه طالع برا السعوديه يقول باخذها معي هي وأطفالها إذا رضت بدون طبعا تدري المسكينه ام بنته.
مدري ايش ارد عليه يقول برجع لك الويك اند الجاي وانا اصلا مااعرف خطابات ولا أثق فيهم ولا اقدر اجرح زوجته لأنها خويتي وزي أختي وأخاف يصير لي اللي يصير لها إذا ساعدته وخايفه عليه الولد شكله خلاص معزم ومقدر استشير زوجي اصلا مابي ادخل الفكره براسه اخوي يقول انتي عطيني الرقم ولا لك دخل وحلف أيمان كثيره مارح اقول لاحد اني تزوجت بمساعدتك.
شيرو علي اش اسوي بليز بدون تجريح.