خيانة زوجي ! انا في حالة صدمه يارب تبرد على قلبي

بنات بختصر لكم سالفتي قد مااقدر انا لي ست سنين متزوجه والحمدلله عندي طفلين ومثل اغلب المتزوجات اول سنه من زواجنا لاتخلو من المشاكل واهمها اكتشافي لخيانته مع كم بنت بالواتساب ومازلنا الى اليوم بالمشاكل اليوميه المعروفه بين الازواج بس الفرق اني صرت اطنش كثير واتغاضى علشان اريح راسي وايضا مثل اغلب المتزوجات زعلت فتره بسبب خيانته ونسيت كل شي او تناسيت بمعنى اصح لان ظروف اهلي ماتسمح باكثر من كذا مع العلم اني علمت اهلي واهله بحركاته لاني كنت طالبه الطلاق وهو انكر انه يلعب من وراي وانه الرجل الشريف اللي يخاف ربه ومايغلط ومازال لهذي اللحظه ينكر انه يلعب ويشوف اني متبليه عليه وظالمته لاني للاسف مامسكت عليه دليل واضح ولا صورت شي وانا لما شفته كذا كنت اهوّن على نفسي واقول مرده بيمل ويتوب
بس للاسف زاد الموضوع عن حده وهذي الفتره لاحظت تغيير كبير فيه وسرحانه او جرأته بمعنى اصح
لانه صار يسولف بالواتساب وانا موجوده بالبيت واحيانا كبيره اكون جنبه عند التلفزيون مثلاً ،
مع انه يقول انه مايحب الواتساب ودايم يطنشني اذا ارسلت له شي ضروري وهو متصل وبعدها يقول انه ماقرا شي ويقول لي وهو معصب اذا تبين شي اتصلي لا ترسلين !
وانا متاكده انه يصير قاري كلامي من دون لايفتح المحادثه
طبعا بتقولون كيف عرفت انه نفس الشخص اللي يسولف معها
لاني وانا جنبه شفت "صورة العرض" بالوتساب نفسها اللي له كم يوم يسولف معها وكان اخرها اليوم الفجر وهو ماانتبه لهذا الشي !
وبعدها قمت ببرود بنام وهو مستغرب !
قال فجاه بتنامين اليوم خميس ووووالخ
هو لاحظ انه فيه شي حاول يهدي ويجس النبض وانا مابينت له اني شفت شي بس احس كان واضح علي الضيقه !
وكمل سهران عند التلفزيون او على الجوال بمعنى اصح !

نقطه اخيرة علشان مااظلمه هو مايقصر من ناحية المصروف ويمثل قد مايقدر انه "الزوج المثالي" او يمكن ضميره مأنبه من ناحيتي لانه على كلامه انا جداً طيبه واستاهل كل خير 😔


انا ماادري البرود اللي انا فيه من اثار الصدمة او ان ربي مطمني باسمه وللا مثل كل مره عارفه ان هذا الانسان مامنه امل يتغير !!!!!


الله يسعدكم اللي مرت بمثل حالتي كيف تصرفت وخلت هالمصيبه لصالحها؟
مع اني مااتمنى اللي احس فيه حتى للكفار بس الحمدلله على كل حال 😭
اعتذر عن الاطاله بس حاولت ابيّن الشي المهم طمعاً بمساعدتكم ودعاكم لي لاني تعبانه
وعجزت انام من التفكير💔
الله لايحملنا مالا نطيق ويرحمنا برحمته الواسعه
ادعولي حبيباتي الله يمسح على قلبي الحزين 😔