خيانة زوجي لي دمرتني

السلام عليكم ورحمة الله وبركاته
أخواتي بحكيكم قصتي وأتمنى من أي وحده ماتبخل علي برايئها أو نصيحتها مهما كانت لأني بجد محتاااجتها كثيييير
أنا أكبر أخواتي حنا خمس بنات أنا الوحيده المتزوجه تزوجت وعمري 30 سنه ، تزوجت واحد من برا جماعتنا لأن جماعتنا مايخطبون من أبوي بسبب مشاكل كثيير أبوي كان السبب فيها بين جماعتنا نفرت الناس منا وصاروا جماعتنا مبعدينا عنهم ، المهم أبوي كمان ضيع فلوسه على صفقات وتجارات فاشله وخسر كل أمواله حتى بيت ماعنده لكن الحمد لله ربي عوضنا بوظايف أنا وأخوي وأختي يعني الحمد لله حالتنا الماديه نوعا ما صارت أفضل من أول عشان ما أطول عليكم المشاكل اللي صارت بحياتنا خلتني انسانه معدومة الثقه في نفسها انسانه جبانه وماتقدر تاخذ حقها انسانه تعيش مع الرهاب الاجتماعي لكن الحمد لله الرهاب خف عن أول كثيير وتحسنت مع الوظيفه ،
المهم تزوجت انسان طالب دراسات عليا يدرس برا أكبر مني باربع سنوات من عائله مرتاحه ماديا انسان مر بتجربة زواج سابقه وعنده طفل يعيش مع أمه ، زوجي في بداية حياتنا عيشني في حب ونعيم ماكنت أتخيل اني ممكن أعيشه كنت أظن ان ربي عوضني عن كل الأيام الصعبه والمشاكل والبؤس اللي شفته بحياتي حنون لأخر درجه وطييب ومرررح جدااا وكان محسسني اني أجمل أنثى في الدنيا وأنو ربي عوضه عن زواجه الأول كنت مستحيييييل أشك فيه لحظه انه ممكن يخوني بكلمه أو نظره ، مرت السنه الأولى من حياتي معاه بين جده وبريطانيا يعني يجي جده فتره ويرجع لدراسته وأنا كنت في عملي في جده السنه الثانيه طلب مني اني اخذ اجازة وأطلع معاه أخذت اجازة وطلعت معاه وهناك بدأت أكتشف خيانته لي وبدأت أراقبه لين تأكدت انو متزوج بالسر زواج عرفي وانو كان يطلع من عندي يقول بيروح لاصحابه وهو يكون معاها ،،،
بكييييت وقتها وأنا في غربه وأكتشف ان زوجي حبيبي أغلى الناس على قلبي يخووني ،، تخيلوا هناك مالي أي أحد لا صديقات ولا صاحبات ولا أحد كنت عايشه في الشقه ما اطلع منها ابدا الا يكون هو معاي وكل اسبوعين أو ثلاثه مره يعني تركت أهلي ووظيفتي وحياتي وضحيت عشاانه وعايشه بوحده عشان أساعده وأكون معاه ،
الى الان هو مايعرف اني اكتشفت خيانته وتعامله معاي زي ماهو حنون وطيب وماديا مريحني على الأخر حتى حب ورومانسية مايقصر بس أنا كرررررررهته الان انا في جده عند أهلي اجازة وهو هناك أنا حتى ماعاد أقدر أكلمه ولا أخليه يلمسني ماعاد أقدر أتحمل شوفته قدامي هو حاس اني متغيره بس مو عارف ليش أو اش السبب لأنه ذكي جدا وعرف كيف يخبي عني فترة طويلة ومستحيل يصدق اني كشفته
حكيتكم مشكلتي لأني مااقدر على المواجهه تعبانه بكلم أبوي يطلب لي الطلاق وأرتاح حتى بدون مااقوله السبب ،،
ساعدوني بنصيحة اش أعمل ولو واجهتته اش أقوله وهل صح اني أدخل أبوي بالموضوع أو أهلي أو أطلب الطلاق منه مباشرة
الله يفرج هم كل من ترد علي ,,