داخله على الله ثم عليـــــــــكم رايكم ودعوتكم لي تكفووون ...

السلام عليكم ورحمة الله وبركاته

انا داخله على الله ثم عليكم ان تدلوني على الاختيار الصائب..

طبعا ابقولكم حكايتي من أول.. عشان تنفهم :(

تزوجت وانا عمري 18 سنه وانا الحين عمري 20

طبعا كنت وقتها جداً صغيره والمشكله اني اصغر خواتي واللي فوقي مابعد تزوجوا بس لقافه وحب استطلاع قلت خلني اعرس :icon28:

طبعا مرت اول يومين زواج على قولتهم سكر وتفاحه وباقي الايام شي فظيع بين كل دقيقه والثانيه مشكله مادري منين تطلع احاول بشتى الوسائل اني اتفاداها بس ماقدرت لأنها منه مو مني ودايم اخر المشكله انا اللي اخضع واتأسف والخطأ مو مني

يدقق بأتفه الاشياء يبي يسوي مشكله باللي هو به

اول شي قال انتي بارده وماتحسين وقام يتكلم علي وعلى أهلي

انا ارضى انه يتكلم عني لكن عن أهلي والله معصي واطلع بعدها بيت اهلي وراح يشكي لأبوي يقول انها اصلا ماتغار علي < عذر أقبح من ذنب

وصلح حالنا ورجعنا وبعدها بيوم صارت مشكله حسيت ان الرجال مو طبيعي مريض نفسياً يختلق شي من لاشي يتهمني بأشياء كثيره بكل ثانيه حسيت اني مااتحمل قلت يابنت بيتغير الحال لاجبتي له بيبي صغير يملا علينا الدنيا وننسى المشاكل ,,

وحملت ولله الحمد بعد زواجي بفتره قصيره والتسع شهور عشتها بهم تمنيت ان ربي ياخذ عمري وافتًك استغفر الله العظيم ..

كان يحرمني من أهلي بالشهرين والثلاث مااشوفهم كأني مو بنفس ديرتهم.

يحبني وانا متأكده من كذا واشوف مواقف اقول فيها هذا بيموت الا شوي علي ويسفرني لأي مكان انا ابيه لو باخر الدنيا ويوديني افخم المطاعم ولايبخل علي ولا بريال ومايرضى يلبسني الا احسن اللبس والماركات والاكسسوارات

بس تعذبت وربي تعذبت منه :(

وتعبت نفسيتي ...

وبعدها ولدت .. وكانت فرحتي بأني اروح لأهلي بالنفاس اكبر من فرحتي بالمولود من شوقي لهم ولشوفتهم وجلست عندهم 40 يوم بعدين رجعت لزوجي وبدت المشاكل من جديد وكبرت وصار يتهمني بالخيانه والكذب ويشك فيني وانا مالي بعد الله الا هو وولدي بس الشيطان يوسووس له ..
طبعا انا ساكنه مع اهله يعني انواع الحرمان وزيادة الطين بلّه وكلكم عارفين السكن مع اهل الزوج يعني ايش :icon33:

بس اهله اطيب منه بكثير وهم اللي ينسوني مشاكلي بطيبتهم واسكت عشانهم :D

وزادت المواضيع سوء وصار يمد يده وحتى عند اي احد ماعنده مشاكل وكنت ابنجن الا شوي ..

وطلعت من عنده حوالي 4 مرات زعلانه واكسر خشمي وارجع ولا كأنه صار شي :D
والخامسه ثابته طلعت بسبب كبير مره الرجال العاقل مايسويها ياليتها خيانه وياليتها سرقه وياليتها مخدرات وشراب الا شي اخس :(

جاني انهيار وحسيت الدنيا لفت فيني

وطلعت من عنده وهربت لبيت اهلي مع ولدي

بعدها بكم يوم على طول جتني ورقه من الشرطه تستدعي ابوي << يعني وصلها شرطه وكأني سارقه منه شي

وتحولت للمحكمه ومن جلسه لجلسه وبعدها سمعت انه تزوج وحده اكبر منه وماتزوجت والله ماكرهت هالشي لأنه ماحرك فيني

والزوجه الثانيه تحسرت معه وراحت بيت اهلها
وبعدها خلعني منه الشيخ بالطقاق ولله الحمد :icon28:

مع العلم انه ملك قبلي وطلَق بعد بس مابلَغني ولا دريت الا من وحده من الصديقات تعرف اللي كان ماخذها وكان يطلع ويرجع معها عادي وهي اللي غيرت رايها يوم طلع على حقيقته ولحقت على نفسها قبل الزواج :(
وعشت براحه ونعيم في بيت اهلي وولدي معي

بس مشكلته انه رجع مره ثانيه يترجااهلي وابوي انه يرجعني ووعده انه يحلف بالمصحف انه مايضايقني ولا يزعلني بشي ولا يقطعني عن اهلي

واحتك باخواني وصار يصادقهم بالروحات والجيات ويمدحونه ويقولون تعدل وصار جدا مسالم واللي كانوا يقولون متى تتطلقين وترتاحين صاروا الحين يقنعوني ارجع له ثانيه وانا مابيه ولا اطيقه بس دايم احس اني ابسوي ذنب بولدي ماودي يعيش واحنا مفترقين اخاف يضيع ومابي اغصب نفسي واعيش معه ماطيقه واقول بنفسي ولد واحد احسن من خمسه ولا سته :(

بنات تكفون طلبت رايكم ومشورتكم أرجع او لا ..

ادعوا لي ان مارجعت ان ربي يعوضني بأحسن منه اللي يسعدني وولدي وادعوا لي بالخير والصلاح الله يجزاكم خير
واي وحده قبل صلاتها تتذكر قصتي تدعيلي ان ربي يوفقني ويسعدني وولدي

الله يعطيكم العافيه ويوفقكم ....


وجوووه.