دارت رووسنا من دوراتكم ياوزارة

السلام عليكم ورحمة الله وبركاته
بدخل في الموضوع على طول بدون مقدمات
بخصوص قرار الوزارة فرض عقوبات صارمة على المعلمين والمعلمات المتغيبين عن الدورات
أولا أنا معلمة وحالي مثل حال كثير من المعلمات تهمنا الطالبة أكثر من المنهج خاصة صغار السن لأننا نعتبرهم أمانة عندنا وأي شي يؤثر عليهم في المدرسة حنا اللي نتحمل مسؤوليته ونخاف عليهم لا من مرض ولا من إصابة لان اغلب المدرسات أمهات فيحسون بإحساس الأهالي ولو ادري أن في دوراتهم خير لي وللطالبة لاجيها اركض
وأنا حاضرتها حاضرتها مهو خوف من الوزارة ولا من عقوباتها بس شي في الذمة ولازم نبريه


و يوم تجي الوزارة وتقول فيه دورات فحنا عارفين الوزارة وخبزها وعارفين دوراتها وياما أكلنا هواء من الدورات
تجيس وحدة ترطن ترطن عليتس الين ينفجر راستس يا من لاب توب هذا إذا كانت تجاري التطور على قولها ولا من كتاب كان عندي يوم كنت بالكلية اومن اوراق مرسلتها لها الوزارة وتقول لها الله لايهينتس بلغي المعلمات هالكلمتين وفي أخر الدورة تقول لخصوا لي المنهج ولا أكتبوا لي تقرير او حضرو لي درس نموذجي وكثر خيرها اذا قالت اكتبوا عيوب المنهج ومزاياه

فعلشان كذا ابصم بالمليون انا دوراتهم بتكون مثلها مثل غيرها بس المرة هاذي يمكن يرسلون لنا وحدة لابسة بالطوا واتحداهم اذا تجاوزت دوراتهم الساعتين

غير كذا لييييييييش نداوم قبلهم بثلاثة أسابيع مايكف داومنا بعدهم بشهر ومن غيرصنعة ماتقدرون تعطون دوراتكم قبل الدراسة بأسبوع


غير إني أكاد اجزم إن المعلمين والمعلمات عندهم اطلاع على أعراض الافلونزا وطرق الوقاية وكيفية التصرف أكثر من الوزارة نفسها لان هذا حال الشعب كله ما شفنا نشرات توعوية والتلفزيون لاهي بأخبار العالم ولا شفنا برنامج واحد يوجه أو يتكلم عن افلونزا الخنازير ومع كذا الناس عارفة كل شئ و ما احتاجت احد

وأيضا يا وزارتنا الكريمة ليش الإجراءات على المعلمين فقط وين الإجراءات المتبعة للوقاية من الأمراض المفروض إنها تكون في كل مدرسة

الدوامات قربت شفنا احد منكن جاء وقال المدارس راح تعقم يوميا بعد الدوام او قال راح تعطى كل مدرسة حقائب علاجية اقل شي مقياس للحرارة او قال بتخصص معقمات للاماكن العامة يكفي المقصف راح يكون مركز للوباء خاص انه أكثر مكان تجمع للطلاب اللي ما قدرتوا توفرون لهم وجبات زي الناس

أو راح يكون هناك معقم لكل طالب ومعلم وغيرها من الاجراءت اللي تقدرون عليها ولا بس جيدين في تهديد المعلمين والمعلمات

ياوزارتنا في شئ أعظم من الدورات التفتوا يمه....... شوفوا المناهج اللي مكانك احفر و وكل يوم مطلعين خبر في الجريدة تم طباعة مناهج جديدة تلعبون علينا؟! تغيرون الغلاف وتحطون تاريخ السنة الدراسية الجديدة وتقول مناهج جديدة !!!

او المباني اللي لو تقدر تشتكي بكت من حالها اللي هي فيه ونصها بيوت مستاجرة عاد من كثرنا الحين و و و

بس وش نقول وش نخلي الله المستعان والله الحامي أن شاء وعسى الله لا يحوجنا لكم ولا غيركم

واخرا وليس أخيرا لا تجيني وحدة وتقول احمدي ربتس غيرتس ما لقاها ترى من الحين أقول لها لا تعلميني كيف احمد ربي واتشكره ونقطينا باسكاتس رجاء واللي تدعي المثالية ترى من الحين عاذرينها من الرد

وأعذروني على قساوة الفاظي بس من جد ماعاد درينا من وين نلقاها

ودمتم بود