دام الوظيفه عند سوسن وميسون .. للشاعر ساقي الشوق

بنات هذي قصيده اعجبتني.. وان شاء الله تعجبكم..

اسمي مواطن جامعي طيب وزين *-* كني ابخطب عندكم واتغلون
عندي شهادة طايحة ابجبدي اسنين *-* عشش عليها شيء له ست عيون
لو للشهادة لسان قالت على وين *-* ناوي توديني .. تلف فيني الكون؟؟
من كثر ما صورتها غارق بدين *-* للهندي راعي المطبعة صرت مديون


لا ليلي ليل ولا نهاري نوى يبين *-* دقيت راسي لين ما صرت مينون
مطلوب خبره ع الاقل في مجالين *-* والا تجينا بواسطة وسير مدهون
والا انثبر في بيتك افرك بكفين *-* يومك يشابه امسك وعيش مغبون
تعدادنا اوياهم اربعه ملايين *-* واهل البلد للحين ما صارو مليون
ويلاه من باكر اذا وضعنا الحين *-* وحنا اقل من الربع حالنا شيكون


واللي ابتسم حظه والله مسكين *-* حصل وظيفه بس في وين تدرون
ساكن في راس الخيمة حطوه في العين *-* واللي سكن في الذيد في السلع مدفون
يشوف هله بس في الاسبوع يومين *-* واذا حسبتوا الدرب كم ساعة تبكون
يعني في كل احواله ذاق الامرين *-* شغال محزون وبلا شغل محزون


والاجنبي اللي راتبه فوق عشرين*-* فله وسيارة وتذاكر .. وطاعون
عنده بدل كل شيء ع الراتب الفين *-* حتى بدل معجون اسنان وصابون
ومن بعد ما يجمع من بلادي ملايين *-* ويربي من القعدة على الكرسي بطون
ويصير في بلاده غني وعنده برجين *-* يرحل وهو جاحد وكم مثله ملعون


وحتى الجماعه قوم مدحت ونسرين *-* مردهم لبلادهم لو يطولون
يرضون بشوية دراهم وشفتين *-* صبح وعصر لو حتى في الليل يرضون
بس لو سمعتوا همسهم بينهم بين *-* وسط القهاوي يلعنون ويسبون
لا تحسبوني عنصري كلنا من طين *-* والخل لو عاتب محبينه يمون


داري وانا اولى بها من الغريبين *-* ما يوصلون لحبها لو يموتون
و( الأقربون اولى ) .. كلام من الدين *-* ما يبته من شعري مع الهام وظنون
ولد البلد ما يبغي لبلاده الشين *-* بالروح بالدم يفتديها ولا يخون
لكن سؤاله يوم قلتوا له توطين *-* يا كيف بيد الغرب توظيفه يكون


شعارهم معروف راجعنا بعدين *-* وباين من التأجيل انهم يخافون
اذا معك خبره .. يا اهلين وسهلين *-* واذا شهاده بس .. عنك يصدون
ما عندنا شاغر وبطلنا تعيين *-* ولو تحرق الهاتف ترى ما يردون
من وين اجيب الخبره من وين من وين ؟؟ *-* دام الوظيفه عند سوسن وميسون


عندي بمطبخ بيتنا خبره سنتين *-* تنفع اذا صاروا المطاعم يوطنون؟؟
والا اهاجر وآخذ الخبرة في الصين *-* صح العيون صغار لكن يقدرون
سؤال يادار .. صراحة بترضين ؟؟ *-* اني اسافر واطلب الغرب لي عون
وسؤال يا ناس على الراس والعين ؟؟ *-* صدق الوظايف واسطة وسير مدهون
اما الجواب الشافي يجيني الحين *-* او هاتوا تأشيرة اذا كنتوا ترضون

ساقي الشوق