السلام عليكم ورحمة الله وبركاته
مبارح ساويت داوود باشا وحبيت تشاركوني الطريقة
الاكلة اصولها تركية وبالغالب بتتساوى بالفرن متل الكفتة
لكن انا بساويها مع مرقة ورز
والاكلة سهلة كتير يعني بعملها لما ما يكون الي مراق للطبيخ
فيه اكلات بساويهم وانا مغمضة وهاي منهم :35:
وطعمها طيب ولزيز
يلا عالمطبخ
المقادير
لحم مفروم الكمية اللي بتناسب عيلتك
بصلة مفرومة ناعم كتير
شوية بقدونس مفروم ناعم
بصلة وسط مقطعة جوانح
بطاطا مقطعة مكعبات متوسطة
عصير طماطم
صلصة بندورة
زيت
ملح وفلفل وبهار وقرفة
الطريقة
بعد ما تغسلي اللحم المفروم بتصفيها منيح من المي وبتعصريها حتى ما يبقى فيها مي
والا بعدين بتفرط معك بالقلي
بتضيفي البصل والبقدونس المفروم فوق اللحم
ضيفي ملح وفلفل وبهار وقرفة وملعقة زيت ذرة واخلطي اللحمة منيح
بلللي ايدك بشوية مي واعملي كرات من اللحم وعلى كيفك
ازا بتحبي الكرات كبيرة والا صغيرة انا بحبها وسط
نقطع البطاطا الى مكعبات
ضيفي زيت بكمية منيحة للطنجرة وبعدين ضيفي البطاطا للزيت وقلبيها حتى
تاخد لون حلو ارفعيها وصفيها من الزيت
في نفس الزيت ضيفي كرات اللحم للزيت واقليها على الوجهين
وما بدنا نسويها فقط تاخد لون حلو
انشلي كرات اللحم وصفيها من الزيت وفي نفس الزيت بنضيف البصل الجوانح وبنخليه يتدبل شوي
حبيباتي لا تردوا لحتى يكمل الموضوع
هلا ضيفي صلصة البندورة انا بحب اضيفها في هاي المرحلة وممكن
تضيفيها بعد ما تحطي عصير الطماطم
اخلطي الصلصة مع البصل وقلبي شوي
في هاي المرحلة تخلصي من اغلب الزيت ما فيه اله داعي يضل بالطبيخ
رجعي كرات اللحم والبطاطا للطنجرة وسكري الغطاء وهزي الطنجرة
حتى يختلط كل ما فيها وحاولي ما تفتتي اللحم او البطاطا
ضيفي عصير الطماطم وقلبي المكونات بحذر مع بعض
و ضيفي شوية مي حسب انت ما بتحبي ازا بدك المرق خفيف
ضيفي مي اكتر وازا سميك مي اقل
بس تغلي ضيفي الملح والفلفل الاسود وذوقي الطعم وبعدين غطي الطنجرة
واتركيها عنار هادية حتى تستوي اللحمة والبطاطا وانتبهي ما بتحتاج وقت كتير
لا تتركي البطاطا تنهري وتدوب يعني ممكن ربع ساعة مش اكتر وممكن تفتحي
وحدة من الكرات وتشوفي ازا استوت مع البطاطا اطفي النار وهيك صارت بعد
ما استوت وتسبكت الصلصة انا بعملها صلصة سميكة شوي مو خفيفة
قدميها مع الرز الابيض بالشعيرية او مع الرز اللي بتحبيه
وهاد الصحن لاول وحدة ترد
وصحتين وهنا عقلوبكم يا حلوين
انتظر رأيكم يا حلوات