دايم اسمع هالكلمه حبي نفسك حبي نفسك وش يقصدون

يقصد دلعى روحك بلبس جديد وعطورات و تسريحة حلوة


صيري دلوعة ولا تفكرين انك تدللى احد

والله انا نفسك الله يعيني ويعينك يا رب :)

يعني الدكتور قصده (طنشي تعيشي )
وانا بسراحه دايما اذا تضايقت افكر بالاخير واقول والله هالدنيا ماتسوى ان الواحد يصير حساس ويتضايق ويزعل وصدقيني انا حساسه مره مره بس من بديت افكر بنفسي
تحسنت نفسيتي للافضل وصاروا الناس مايسوون شي عندي خصوصا اللي يحاولون يضايقونك
وعندي قاعده تقول(طنش تعش تنتعش ياقلبي )
وسلامه عمرك يالغلا

انا حب النفس عندي او بقاموسي هو احترام الذات وتقديرها

لازم تعرفين انك شخص متفرد مستقله لوحدك لازم تبحرين مع نفسك شوي او بمعنى اخر اقراي ذاتك
مثلا اقعدي مع نفسك وكلميها انا فلانه عندي من المميزات كذا عندي من المواهب كذا عندي من القدرات كذا بعد كذا شوفي وش عندك من نعم مو عند غيرك واحمدي الله عليها وش تقتدرين تطورين من قدراتك وطوريها
لا تعتبرين نفسك انسانه هامشيه خلقت فقط لتتاثر بالناس وتسمع كلامهم وتجريحهم بدون مايكون لها الدور سوى الالم والاحباط

تاكدي ان عندك شي مو عند غيرك تقدرين تفيدين فيه الناس وتقدرين بعد تاثرين بالناس يكون لك دورك


بمعنى اخر العبي دورك صح اذا انت اخت ادي دورك صح واذا انتي ام ادي دورك صح واذا زوجه ادي دورك صح واذا اخطاتي فكل الناس تخطئ بالعكس انتي تكونين تعلمتي اهم شي انك تحترمين نفسك وتحبين تصرفاتك وماتجلدين نفسك بالانتقادات مو ضروري انسانه كامله لكن ضروري تكونين متوازنه




هذا حب النفس بتعريفي الشخصي
الله يوفقك

إنتي إذا حبيتي أحد وش تسوين ؟؟
ممكن تدليلينه
تنفذين الي يبيه
تحاولين ترضينه بكل ماتملكين
يعني ..
إرضي نفسك
لا تسوين الي تكرهه
أعطيها حريتها
لا تضايقينها
لاتسحي لأحد أن يجرحها
لاتسمحي لأحد أن يذلها
حاولي تريحينها
إذا عندك هواية مارسيها
إذا عندك عادات نافعه زاوليها
إذا كنتي تحبين الإجتماعات العائلية وقطعتيها إرجعيلها
فيه بعض البنات الاحظهم يهتمون بكلام الناس أكثر من نفسهم
يعني ماتلبس اللبس الفلاني عشان لايتريقون عليها مع العلم ان لبسها مافيه شي
ماتروح المكان الفلاني عشان لا يقولون ويقولون
هذي النوعيه تلقينهم نفسهم تعبانه مرررررة
ومع تكرار الضغط يتحول لكره للنفس
الرسول صلى الله عليه وسلم يقول ( إن لبدنك عليك حق )
وحقوق البدن كثيرة
وإذا نفذتيها راح تحبين نفسك صدق
من هالحقوق :
النظافة ، اللباس الحسن ، التطيب ، إستخدام الحواس في محلها
الغذاء الصحي ، التنفس الصحي
وركزي على ( التنفس الصحي ) تراه مهم
لاحظ الأطباء ان مرضى الإكتئاب يلقون عندهم نسبة الأكسجين منخفضه عن الناس الطبيعين
فحاولي تتنفسين لمدة خمس دقائق بطريقه صحيحه
وهي انك تاخذين نفس عميـــــــــــــــــق وتطلقينه ببطء

،
،
،


وإنتبهي النفس البشريه لاتمل من الطلب
وأحيانا تطغى النفس الأمارة بالسوء على النفس اللوامه
وهذا أمر لازم تحطينه بالإعتبار
عشان لاندخل في المحضورات
وبدل لاتعالجين كره النفس راح تصيرين تكرهين نفسك زياده
لأننا سبحان الله مزروع فينا كره الذنوب
ولن نجد الراحه بعد الذنب أبدا
وإذا أشبعتي الجانب الروحي من هالنفس
ستشعرين بالراحه التي تريدين
صلي كما لم تصلي من قبل
تلذذي بالدعاء
لاتدعي برفع اليد وتحريك اللسان فقط
لا
أشعري نفسك بلذة الدعاء
تصوري أنك أمام الله
إستشعري الموقف
وقتها ستشعرين باللذة المطلوبه
وستدعين وقتها بما تحتاجه نفسك

.
.
.


أحيانا عزيزتي أنصح من حولي وأنا أيضا
إذا أتت نوبه الإكتئاب
أو الشعور بالقهر أو الغضب أو حتى الحزن على أمر ما
جربي أن تستلمي لهذا الشعور
إكتئبي
وإحزني
وأبكي
وإنهاري
لكن بشرط
حددي لهذه المشاعر وقت معين
ساعه ، ساعتين ، بالكثير يوم كامل
ثم بعدها عودي لطبيعتك
ولا تتركي لهذا الشعور مجال أن يطول أكثر
راح تقولين ليه أسوي كذا؟
أنا أعتبر إن جسمي مثل كأس الماء
وكل الأحداث الي تصيرلي والمشاعر الي احسها
مثل الماء الي يصب في هذا الكأس
فلما أحس بالحزن يكون هذا الشعور إنتقل من الخارج لداخلي
طيب ليه أمنع إن هالشعور يطلع ؟
لازم أسلم نفسي له عشان يطلع
بعدها خلاص أحس انه راح عني ورجعت لحياتي الطبيعية
أما إني أترك هذا الشعور يســـــــــكن فيني
فهذا أمر مستحيل
وهذا سبب الإكتئاب المزمن
إننا نعيش مع مشاعرنا السلبية دون ان نترك لها مجال ان تخرج
عودي نفسك على هذه الطريقه وراح ترتاحين كثير
وراح تحبين نفسك :)
.
.
.

وإنتبهي يالغاليه
ترا حب النفس والغرور بينهم شعرة
وعشان تعرفين الفرق
ترا حب النفس مايحسسك بالضيق أو الذنب
بالعكس حبك لنفسك راح يحبب الناس فيك
أما الغرور إذا فعلتيه تحسين بألم داخلي بسببه
وراح يكره اناس فيك


أتمنى إني ماطولت عليك
بس تذكرت نفسي قبل
كنت مثلك
وماارتحت إلا لما فهمت نفسي
وحبيتها :)