المشكله الوحيده اني صورت الخطوات بالموبايل بس طلعت مظلمه ..
علشان جذي بحط بعض من صوري و بعض من صور الموقع
هذي صورة الطبق
و هذي صورة لقطعة دجاجة من طبقي المظلمة لمجرد اللإثبات إني طبقته .. مو تخترعون :) بس ترا كان شكله أحل و لذيذ
جهزي مقدار 900 جرام إلى كيلو تقريبا من صدور الدجاج .. خسليها و اتركيها بالماي و الطحين شوي بعدين صفيها من الماي
مقادير التغطية :
- شريحة واحدة من التوست الأسمر بالطحين الكامل
- ربع كوب بقدونس مفروم
- نص كوب جبن برمزان مبشور ( يستبدل بثلاث ملاعق كبيرة جبن للي تبي سعرات حرارية أقل ) انا استخدمت 3 ملاعق كبار .. لأني ما بغيت طعم الجبن مركز
- رشة ملح .. لا تكثرون لان الجبن مالح
- نصف ملعقة صغيره ثوم باودر .. ممك استبداله بطازج بمقدار ملعقة كبيرة لأن الثوم الباودر مركز
- ملعقة صغيرة فلفل أسود
- نصف ملعقة صغيرة بهارات مخلوطه
حطي هالمقادير كلها بالخلاط لما تنخلط عدل
بعدين حطيها بصحن ..
ذوربي مقدار نصف كوب زبدة .. أو للسعرات الحرارية الأقل استبدلي الزبدة بنصف كوب حليب خالي الدسم
و غطسي قطع الدجاج بالزبده أو الحليب ثم بخليط التوست و الجبن و رصيهم بصينية فرن و انثري باقي خليط التوست على الدجاج إذا زاد منه .. و بعد صبي الزبدة إذا زادت .
و حرصي على ان الدجاج يكون جنب بعض علشان يستوي لا تحطين شي فوق شي .
و اذا عندج بابريكا ( فلفل حلو ) نثري على الدجاج مع شويــــــــــــة بهار ... و ممكن تستبدلين البابريكا بفلفل أسود
و دخليها الفرن بحرارة 175 درجة .. و لمدة ساعة تقريبا بدون لا تغطينه
بس فتحي الفرن من فتره لفتره و اخذي من الزبدة اللي على جنب و اسقي فيها الدجاج
و اذا لاحظتي ان الدجاج بدأ يتحمر قبل لا يستوي خطيه و لما يستوي رفعي الغطا علشان يتحمر
و أتمنى أن يعجبكم :)
بالعافيه مقدما
باين عليها لذيذه .. ومع البارميزان اكيد الذ :)