اخواتي العزيزات استفدت من منتداكم الرائع الكثيييير
وحبيت تستفيدون مني
وعلى فكره فيه بعض الافكار من عضوات منتدانا بس للاسف ما اذكرهم
طبختي اليوم هي دجاج كورما مثل اللي عند مطاعم كوبر شندني الهنديه الشهيره وانتو جربو واحكمو بنفسكم
المقادير:
دجاجه مقطعه قطع صغيره بدون جلد
بصل وطماط وثوم مقطعه قطع كبيره
بهارات عدله ( مسمار وهيل وورق غار وكزبره حب )
بهارات هنديه
قشطة خفق المراعي اللي 250 مل
صوص كورما
قطعه صغيره زبده
كزبره خضراء مفرومه تقريبا نصف كأس
وهذي صورة المقادير
الكزبره ماكانت عندي وتراها ضرووووووووري يابنات لانها تعطي طعم خياااااال
والسكاكين مالها داعي في الصوره بس شغالتنا حطتها تقول صوريها مع المقادير وقولي هذا سكين كوييييس احسن سكين عندنا ولا حبيت اكسر بخاطرها
وهذي صورة البهارات العدله من قريب
وهذي صورة البهارات الهنديه
وهذي صورة صوص الكورما انا اشتريته من اسواق المزرعه وسعره تقريبا 10 ريال
وهذي صورة كريمة الخفق
الطريقه:
في البدايه نحط الدجاج مع شوييية زيت في قدر ونقلبها لين يصير لونها ابيض مثل الصوره
ونشيلها من القدر ونحط مكانها البصل والطماط والثوم مع بعض وشوية زيت ونحمسها لين تصير لينه ونحطها في خلاط الطماط ونخلطها زين وممكن اضافة فنجال ماء عشان تنخلط زين في الخلاط وعقبها ارجعها في القدر وارجع الدجاج معها واحط الملح والبهارات العدله والهنديه وماجي اذا تحبين ( وعلى فكره احلى لو تحطين فلفل بارد بس انا نسيته ) ونحط عليها 3 ملاعق كبيره من صوص الكورما تقريبا ثلث او نص العلبه
ونحركها لين تتجانس مكوناتها ونضيف نص كوب ماء وتصير بهذا الشكل
وبعد عشر دقائق نحط كريمة الخفق كلها او ثلاث ارباعها
ونغطي القدر لين تنضج الدجاجه واذا شفتي ان فيه حاجه للماء اضيفي القليل
وقبل ما نطفي عليها النار نحط الكزبره وكم حبة فلفل حار عشان ماتبين حرارته اذا طول وهو يطبخ ونحط قطعة زبده تقريبا ملعقه صغيره عشان تضيف نكهة الزبده على الصالونه
وتصير بهذا الشكل في الاخير
سامحوني ماصورتها بعد التقديم لاني كنت مستعجله
واسفه على التصوير اللي مو واضح لانه من الجوال
وعلى فكره تقدم من خبز او مع رز
في الحالتين خياااااااااااااااااال
اللي تقدر تصغر الصور بكون لها من الشاكرين