... دجتنــا اليوم أنا وبناتــي.. بالعثيم مول.. صدف ,/, ومواقف ...

بسم الله الرحمن الرحيم

سلام الله عليكم ورحمة الله وبركاته


هذا ياطويلات العمر على طاعته ان شاءلله


يوم الخميس هذا يوم التنفس والدجة والفله العائلية <<مابقى احد من عالم حواء إلا ودرى

وكـ العادة يجي وقت الانتخابات ..كلن يرشح مكان نروح له


تقسموا بناتي الى اربع احزاب

حزب اخر العنقود :يبي مجمع الدانه عشان الملاهي,,,ولقي طلبها استنكار ورفض شديد<<<والسبب كله شيعه :icon8:

الثانيه طالبت بـ الراشد ولقي هذا الطلب استغراب واثارت الشكوك تجاهي من ابوهم <<شك بأن هناك قريشات مخبيتها عنه <<<:S_45:

الحزب الثالث : تبي تروح العثيم مول <<من اسبوع وهي تلح علي تبيه..لان اخواتها راحوه الاسبوع اللي راح واثنوا على الملاهي حقتهم <<يبون يحرونها ..وجات على راسي

الحزب الكبيرة : فضلت النوم تحت البطانيه وقالت مابي اروح معكم ابي ارتاح <<<تبي ترتاح يعني مسوين لها قلق وممكن تتطالب بـ اسقاط النظام مثلا ؟؟؟ :unhappy:

الحزب الضعيف واللي هو انا ..كان خاطري اروح الكورنيش واخذ قهوتي وتمرتي وكتكاتي واشم هواء وجلس على العشب الاخضر <<لكن حامض على بوزي <<حزب طايح حظه :crap:



تم انتخاب العثيم مول

رحنا وفرررر على الملاهي......

بس يختي هالبزارين قد ما تدفعين لهم مايرضيهم البوز شبرين <<<

المهم يأذن المغرب ونروح المصلى...وهنا الموقف اللي احزني

طبعآ والحمدلله المسجد مليان مصليات.......وحده منهم دخلت وصلت...وشكلها جديه حيل

وتجي وحده معها بنتين صغنونات يززننون ام 4 والثانيه ام 6 سنين

واول ماحطت امهم الشنطه وتبي تصلي قبل تكبر قالت(( هيا بلا ازعاج فاهمين ؟؟؟؟؟؟؟؟ )) <<انذار شديد اللهجة

قالوا العسولت تيب ماما......<< امهم الصراحه باااااااااااين انها عصبيه

وبناتها والله اني اشوفهم عاادي مافيهم شقاوة غير طبيعية عاديين ياحلوهم

الام تكبر من هنا

البنات يناظرون في بعض من هنا <<ناوين على خير هههههه

تقوم الصغيره وتحوس وتركض ..الكبيره عاقله وحاسبه حساب قرصة الاذن بعدين

الام تسجد...تجي الصغيره تطلع على ظهر امها .......وربي اني قلت في قلبي يارب ماتهاوشها امها

ومامداني اتمنى هالامنية إلا الأم تشد بنتها من يدها وتدفها بعيد

البنت تضحك يا لباااااااا ضحكتها ..واضحك من ضحكتها العسل وناديتها ابي اشغلها عن امها شوي ..ماجاتني

تسجد الام مره ثانيه..االبنت تقمز على ظهر امها وتضحك..الام تسحب بنتها من يدها بقوه وهي معصصصصصصصصبه

وتدفها


تدرون من تذكرت؟؟؟

تذكرت حنية وطيبة الرسول عليه الصلاة والسلام حديث شداد بن الهاد ـ رضي الله ـ عنه أنه رأى الحسن أو الحسين على ظهر النبي صلى الله عليه وسلم وهو ساجد، فأطال السجود، فلما قضيت الصلاة قال الناس: يا رسول الله, إنك سجدت بين ظهراني صلاتك هذه سجدة قد أطلتها فظننا أنه قد حدث أمر أو أنه يوحى إليك. قال: ].
ياحبيبي يا رسول الله

وساعة مانزل الحسن والحسين من على ظهر الرسول صلى الله عليه وسلم قام وكمل صلاته عادي


هنا انا حزنت وربي حزنت :frown:

وكان ودي اقرب منها واذكرها بأن موقفها هذا مر على الرسول صلى الله عليه وسلم وماكان منه إلا انه تحمل لاجل حفيده

رحمة منه عليه ولان اللعب فطره في الصغار ..وغير كذا هي سنة نتعبد الله فيها ولها أجر .

لكن الصراحة ماقدرت كانت عصبيه جدآ,,
وخفت تجيني حذفه من شنطتها على نخاعي فأيضرب ماتبقى عندي من فيوز :icon19:

انا مالوم الام ابد ابد ابد...

لاني متأكده انها احن واطيب على بناتها من اي احد ثاني..والتمس لها العذر

لكن احزنني ليش احنا مش وسيعين الصدر مع عيالنا

و نعصب على عيالنا على اتفه شي ((وخاصة البكر مسكين ضحية التجارب الاولى من التربيه وعدم الخبرة )

الحرمة اللي كانت تصلي جنبها قالتلها هذيلا عيالك..؟

قالت ايه..قالت يختي مايصير كذا عيالك يلعبون بالمسجد ويأذون الناس ومن هالحكي...
فألتفتت لها وردت عليها <<ماسمعت وش قالت لها

فاقمت الحرمة معصبة وغيرت المكان وهي تقول وش هذا عيب كذا الصراحة..وهي تناظر فيني

وانا اقولها صغار يا شيخه ,,و عيالها وين تحطهم مساكين

طلعت ام البنتين وهي تقرص في أذن هذي وتسحب شعر هذي <<حزنتني الكبيره ماسويت شي واخذت المقسوم ضعيفه <<

شفتوا ماقلت لكم البكر دايم مضطهد ومتحمل تقلبات مزاج أمه !!؟ : (



خلصنا من الصلاة ..ورحنا تعشينا

الا هم يعلنون ان فيه محاظرة..((فعاليات ركاز الشرقية)..ومجهزين المسرح والكراسي والانوار

عاد انا فرحت قلت من زمان ماحضرت محاظرات.... و وزعوا علينا اوراق فيها تواريخ واسماء الشيوخ

وكانت المفاجئة ان الشيخ نيبل العوضي هو اللي بيلقي علينا المحاظرة,,,,فرحت كثير

وطول جلستنا ننتظر متى يشرف...وبناتي ماغير ماما منهو الشيخ واوصفي شكله وايش برنامجه واي قناة <<يووووه ياكثر القرقره


وشوي الا هم يوزعون علينا سي ديات لشيخ غازي الشمري...الصراحة خاب أملي ولايهون الشيخ غازي

لاني كنت فرحانه بالشيخ نبيل العوضي..

المهم يتقدم المقدم والشيخ غازي ومعه الاستاذ مشهور الشريف<<اتوقع كذا اسمه

وبصراحة عمل جو الشيخ غازي جزاه الله خير

من المواقف:

الشيخ غازي يذكر لنا حديث وطلب من الجمهور ان يكمل اخر جملتين في الحديث


محد رفع يده إلا أنا و وحده قدامي رفعت يدها قبلي...

يوم قال الشيخ له الف ريال اللي يجاوب الصاله كلها رفعت يدها هههههههههههه ابوك يا الفلوس تهز النفوس :icon19:

حتى الحريم اللي جنبي كلهم التفتوا عليّ..

و يسألوني وش الجواب وشهو وشهو <<واضحك بيني وبين نفسي وقول خير متى المعرفه ههههههه

قامت الحرمة وقالت الجواب وتاخذ 1000 ريال <<عليها بالعافيه

الموقف الثاني الحلو برضه الشيخ غازي يقول حديث ويطلب من الجمهور التكمله وله 500

قام شايب وجاوب جواب غلط...لكن شيمة الشيخ ماخلته يرجع بو لحية بيضا يده فاضية

قال لك الـ500 اذا قلت كلام طيب لزوجتك....وتعالوا شوفوا الحكي الحلو اللي يطلع

يا الطيبه يا الغاليه يام عيالي ماقصرتي و و و

قال له الشيخ :انت تحب ام فلان...قال الشايب ايه احبها..وتقوم الصاله تصفيق

قاله الشيخ طيب ياخي قول احبك يام فلان........... قال احــــــــبك يام فلان

وتعالوا شوفوا التصفيق والتشجيع .



هنا كمان احزنني الوضع <<هذي الحرمة كئيبة ههههههه :icon20:

ليش كلمة احبك من الزوج لزوجته صعبه جدآ على اللسان

وتعتبر حدث غير عادي لو حصل وزلت من اللسان

يعني لازم ندفع قروش عشان نسمعها منهم

عني انا مافكرت ادفع ريال عشان كلمه ....هههههه اروح اصرفها على نفسي افضل :biggthump

/
/



اخيرآ وقبل انسى بعطيكم جدول المحاظرات اللي يبي يروح

الاثنين 16/4/1432:/ د أميمة الجلاهمة,,, و استاذه مريم الهاشم ,,/ وفرقة حلو الرتال الانشــاديه .
/الدمام,/برنامج محمد بن فهد,/ س30-6,,,,,,,,و س 00-8 م (( لنساء فقط ))



الاربعاء 18/4/1432: د الشيخ محمد العوضي ..و المنشد عمر العمير/
الجبيل ,,/ مركز الفناتير للمؤتمرات::/ س 30-8 م



الخميس19/4/1432 ::د الشيخ محمد العوضي,, والمنشد ماجد الزويدي..
الأحساء,,/ العثيم مول ./ س30-8م


الأربعاء 25/4/1432 : د.خالد الحليبي ,و المنشد عبدالعزيز المهنا
الأحساء,,/العثيم مول...س 30-8 م



الخميس 26/4/1432 : ركازيات,/ فرقة حلو الرتال الإنشــادية./
الدمام./ برنامج الامير محمد بن فهد./ س 30-9 ص,,,, س 00-2 م (( لنساء فقط ))


الخميس 26/4/1432 : د.غازي الشمري ,,و أ.مشهور الشريف
الدمام ,/ الشاطي مول ./30-8 م

لكم :26: