تقوول صاحبة الموضوع ذكرت لنا احد الزميلات قصتها اللي صارت مع صديق زوجها .. وبصراحه متنا
عليها من الضحك .. موقف لاتحسد عليه ..زميلتي هذي ساكنه بشقه وكان زوجها عازم صديقه على قهوة وشاي بعد العشاء ..
تقول زميلتي ..
كنت بالصاله اناظر التلفزيون ولاحظت الوقت تأخر وانا فيني النوم ودايخة
..وكان زوجي وصديقه بالمجلس .. وشووي الا وأسمع باب الشقه ينفتح وكأن أحد طلع ..
قلت بنفسي أكيييييييييد هذا صديق زوجي طلع .. خلني اروح اضف البيالات والفناجين علشان يمديني اغسلها
وأنا عاد راسي مصدع ومدروخه .. وعلطول ادخل المجلس ..
واشووووف هالرجال اللي جالس .. وأفتح عيووني زين
.. اثاري الرجال هو صديق زوجي .. 
عاد انا تبوني بهالوقت ماتلقوني .. كن موية حارة منكبة على وجهي ..
الرجال ضعيف نزل شماغة ... وقااام يتنحنح <<< وشو عقبه يالاخو
ومن حلاتي كنت لابسة بجامة البيت قصيره .. يعني شاف الوجة والعصاقيل ..
وبعدها رحت للصاله وانا انتفض وشوي بصيح ..
وماسمعت الا صكة الباب واثاري زوجي اللي كان طالع ..
وبعد نص ساعة أو أقل الا زوجي يدخل ويقول تعالي ضفي مواعينتس
وشكل صديقه ماقاله عن هالموقف .. وأول ماشفته قعدت أصيح .. وهو مستغرب ويسألني وشفيني ..<<كاد المريب ان يقول خذوني !!!
ويوم علمته بالقصه .. الا وهو يمسك راسه ويمعط شعره ..و يسب ويشتم فيني ..
يالمصرقعه يالمطفووووقه ماتنتظرين الين ادخل عليتس .. كلها ثواني رحت اجيب المفاتيح ناسيهن بالسياره ... مير ياسرعتس بهالدخله كنتس ضب ..
كل هذا عجلة بغسل البيالات جعلتس تغلسين ميتة .. ماتصبرين يمال الضعفه .. لا وطالعتن هالعصاقيل من زينهن ..
وانا أقول وش بلا الرجال يوم رجعت له كان مرتبك ويتعلثم بالحكي .. من الفشيلة ماقدر يحكي لي .. ياجعلتس.... و ...
وانا أقووله ..
اجل تطلع ولاتقولي انه فيه رجال غريب بالبيت على الاقل دق جوال قل بطلع دقيقة وبرجع .. انا على بالي يوم سمعت صكة الباب ان صديقك طلع ..
المهم
كلمة مني وكلمة منه وطقاااق وهواش .. ونمت ذيك الليلة وانا دمعتي على خدي ..
طبعا .. احنا ضحكنا على موقفها من جد محرررج بقووه ..
والمسكينه تقول لنا .. تهقون شاف شيء .. ولا وحده تقولها .. عاد يمه من الرجال نظره وحده تفصفصك من فوقك لتحتك .. والثانية تقولها .. لا أن شاء الله يمكن من الروعه بدخلتك مامداه يشوف شيء ..
طبعا انا أستئذنتها بنشر هالموقف .. قالت بس بشرط تحطين هالنصيحه فيه ..
ان الوحده تتركد قبل تدخل المجلس وتسمع اذا فيه صوت رجال او لا.. ولاتصير مطفوقه مثلي ..
والمفروض على الزوج اذا بيطلع يدخل ويقول لزوجته أو يدق عليها جوال .. ترا بطلع برا أجيب حاجة أو بدخل دورة المياة الله يكرمكم ..
قد تكون تفاصيل تافهه بس كثير مواقف تحصل معها ...
بما أنكم قريتم هالقصه ياليت بالمررررره تتحفوونا بمواقف محرجة مثل هالموقف
منقول للمتعه والفائده وياليت اللي قد حصل معه زي هاالموقف
__________________