دخلو غرفه وسكروا الباب وخلوني بالصاله !!

انا وزوجي عايشين في منطقه غير منطقه اهلي واهله .. قبل تبدا الاجازه بكم يوم استاذنته اروح لاهلي وهو بيلحقني بدايه الاجازه لاهله
طبعا اول ماوصلت الرياض رحت لاهل زوجي وسلمت وبعدها رحت لاهلي جلست عندهم يومين . في اليوم الثالث وهو اليوم اللي بيجي فيه زوجي وكمان اخته من منطقتنا . دقت علي ام زوجي تسالني متي بجي . قلت لها اذا وصل زوجي ان شالله .. قالت لي بنتي بتوصل المغرب تعالي . قلت لا ياخاله بخليكم تجلسون من بعض وتاخذون راحتكم من زمان ماشفتم بعض واذاوصل زوجي بجي ان شالله .. زعلت ام زوجي من كلمتي وقالت لي ليه تقولين كذا احنا اهل ومابينا اسرار واحنا عايله وحده ..
المهم زوجي وصل متاخر وانا نمت عند اهلي واليوم الثاني جيتهم .. مع ان المفروض اجلس عند اهلي الاجازه قصيره واهلي عندهم ظرف يحتم اني اجلس عندهم وزوجي توني جايه منه من يومين وهو جاي يشوف اهله مو جاي عشاني ..
لما رحت لهم كان عندهم وحده من قرايبهم جلست شوي تقهوينا علي السريع وبعدها تعشينا عادي جدا مافي الخواطر شي .. فجاه لقيت نفسي لحالي مع الاطفال في الصاله .. زوجي راح يجلس مع خوانه .. وامه واخته وقريبتهم سكرو علي نفسهم الغرفه وسوالف وخلوني لحالي !!!
ليه نادوني اذا عندهم اسرار .. ليه امه تلزم علي تعالي تعالي وانا مالي احترام عندهم ...
جلسه ساعه ساعتين بعدها طقيت من قهري وانا بين الاطفال يتهاوشون ويتضاربون .. دقيت علي زوجي وقلت له انا ماجيت عشان اجلس لحالي انت عند خوانك .. واهلك مسكرين علي نفسهم الغرفه كان جلست عند امي احسن لي
دقايق الا اسمع صوته يسال عن امه وقالوا له انهم بالغرفه .. طلع لي بغرفتي وقال ليش زعلانه ؟ لقت من قله الاحترام .. انا ماعرف اهلك ليش يعاملوني كذا امس تقولي مابينا اسرار وتلزم علي اجي واليوم اشوف عكس الكلام .. خلاص مابي احد يشره علي لاانت ولا اهلك مو اول مره يسون الحركه فيني وانا ساكته لو وحده ثانيه من سلفاتي محد خلاهم لان السنتهم طويله ...
انا الحين قررت بكره الصباح اول ما اقوم اروح لامي واخليهم ؟ وقررت ماسكت عن اللي صار وابي نصايحكم لاني تعبت اداريهم وتعبت من المشاكل .. انا ابي السلام والراحه النفسيه بس حركتهم قهرتني ومن الحره عجزت انام ... وودي اذا قالت لي ام زوجي شي ارد وافهمها اني زعلانه
ودعواتكم لامي ان الورم اللي بصدرها يكون حميد