درجاتي انخسفت ..

الله يهديك اختي لا توسوسين

والله الناس ما عاد صارت تشوف البكارويوس شي كل العالم صارت ماجستير ودكتوراه

وسعي صدرك ولا تفكرين بالحسد

طبيعي الجامعة كل ما ارتفعتي بسنوات الدراسة اصتصعبت الدراسة اكثر

شدي حيلك والله يوفقك حبيبتي

هههههه كل شي عين
يابت لا توسوسين عندك اذكار الصباح والمساء والرقيه الشرعيه ماراح يضرك شي إلا ماكتب الله لك لو يجيك مليون عيون
إذا مرره خايفة حافظي على اذكارك
هالزمن مافيه شي يخبي يمدينهم يدرون عنك كل شي صارت الاسمااء على النت تكتب اسمك في قوقل يطلع كل شي عنك في الجامعة والتخصص
يوم القبول ماطلعت اسمك 😃
بنت عمي ماقالت انها دخلت الماجستير خوفا من العين زيك انا بصدفه شفت اسمها والتخصص بعد:tongue1::
الحين البكالوريوس ولا شي 😂

مادري بس فعلا احس حتى بنات القرى عندنا بديرتنا مع انهم معروفين بالحسد والعين
ًيدرسون بناتهم جامعه ومتوفقات

اسمعي انتي سيطر عليك تفكير ان عرف وان بنحسد واثر عليك التفكير وضعف اداءك بالمذاكره

وهذا سبب نزول معدلك او يمكن فعلا المواد صعبه

اذا مره مره متخوفه ارقي نفسك واذكارك وان شاءالله خير

ماشاءالله عليك كيف قدرتي تخبين مدة سنوات ذي انك بجامعه 😁

انا احس لو مكانك اقلها الجماعه والناس الي حولي يعرفون احس صعب امسك لساني لان ذا شيء يومي اروح له اكيد بتطرق له بالسواليف

شدي حيلك المستوى الجاي وباذن الله خير

لا موادي من اسهل المواد حتى صحباتي قالو كدا لاني ماامشي ع الخطه

يوم كنت اذاكر كنت انسى بسرعه كل كلمه وكل حررف

من جد صح كلامكم الواحد لازم يرقي نفسه باستمرار ويقرا الاذكار مقصره بهالناحيه

بس ياعسل كيف طلع اسم قريبتك بالنت انا بحثت اسمي مافي ...

السلام عليكم ورحمة الله وبركاته...
حياك الله أختي الكريمة "لوتي عسوله" في البداية اسمحي لي أجاوب على سؤالك و أزيد عليه رغبة في زيادة النفع (لكل من تقرأ من الطالبات ) بإذن الله فاعذريني غاليتي وتحمليني بارك الله فيك..
العين حق وما نقدر ننكرها والرسول- صلى الله عليه وسلم- يقول: ( العين تدخل الرجل القبر ، وتدخل الجمل القدر ) ( السلسلة الصحيحة - 1249 )
فطالما أنك شاكة أن تغير حالك في الدراسة ممكن يكون سببه العين فارقي نفسك بالرقية الشرعية من الكتاب والسنة والزمي أذكار الصباح والمساء و أذكار الصلوات والصلاة على وقتها والدعاء الدعاء والله يفتح عليك برحمته إن شاء الله ..
لكن مع هذا عزيزتي لا تعلقين سبب نزول درجاتك على العين فقط ! حصني نفسك و صارحي نفسك بعد لو فيه أسباب ثانية تصلحينها، و جربي تغيرين خطتك في المذاكرة وتضاعفين جهودك حتى لو كانت المواد سهلة ،و هذه بعض النصائح بتوفيق الله عسى الله أن ينفع بها:
- الآن استمتعي بإجازتك و أول مايبدأ الفصل الجاي إن شاء الله ابدئي مذاكرة من أول يوم تاخذون فيه محاضرات ، و إذا قدرتي تقرئين المحاضرة الجديدة قبل لا تاخذينها أفضل بعد..
- ركزي في الشرح زين وسجلي الملاحظات وارجعي لها عند المذاكرة..
- لا تحفظين شي إلا بعد ما تفهمينه زين لأنك لو حفظتي من غير لا تفهمين صح ما راح يثبت كثير لابد من الفهم + الحفظ..
- كرري الحفظ مرة واثنين وثلاثة وأربعة ، كل ماراجعتي أكثر كل ما ثبت الحفظ أكثر بإذن الله..
- اسألي عن طريقة أسئلة الدكاترة قبل الإختبار، ولو قدرتي تحصلين على أسئلة السنوات الماضية لنفس دكاترتكم أفضل بعد علشان إذا خلصتي مذاكرة تختبرين نفسك وتتدربين على طريقة الأسئلة..
- بعد كل محاضرة تذاكرينها لخصيها غيب بأسلوبك علشان يثبت أكثر..
- ألحي على الله بالدعاء أنه-سبحانه- ييسر لك أمورك ويفتح عليك في مذاكرتك وينفعك بها، و أكثري من الإستغفار فهو يفتح الأقفال بإذن الله ..
- توكلي على الله وحده و تأكدي أن ربي ما يضيع تعبك إن شاء الله و ألغي من من بالك العبارات السلبية فبدلاً من قولك أنسى بسرعة قولي ذاكرتي قوية بإذن الله والله بيثبت حفظي إن شاء الله ...
أسأل الله لك التوفيق و السداد و أن يسهل عليك كل عسير و أن يرزقك أعلى الدرجات في الدنيا والآخرة و إيانا و جميع المسلمين ...اللهم آمين.
وعذراً على الإطالة..