خترت لكم كبداية.. هي عمل شنط صغيرة متعددة الإستعمالات.. إما تكون بوك (محفظة).. شنطة مكياج.. أقلام... أي شي آخر..
(العمل يحتاج لمكينة خياطة)
طبعا المكينة لخياطة القماش.. لكن التزيين ممكن باليد.. قطع جوخ صغيرة وخيوط تطريز وخرز أو ازارير
راح أنزل بعض الصور من مواقع أجنبية، ثم أنزل صورتي الخاصة للي سويتها فيها خرز في الواجهة، وطبعا كل وحدة وألوانها اللي تحبها وأفكارها .. يعني نعطي الفكرة الأساسية والإبداع عليكم
درس توضيحي
الطريقة من موقع أجنبي.. ترجمته لكم.. ومنه تعلمت تركيب السحاب بطريقة سهلة جدا
تابعوا الخطوات بتركيز
اللي نحتاجه ....(4 قطع من القماش بنفس الحجم، خليهم مكويين أفضل)
2 خارجي.. و 2 داخلي (البطانة)... 1 سحاب (زيبر)
حطي السحاب بالمعكوس على قطعة القماش الخارجية في وضعها الصحيح (يعني القماش وجهه الصحيح لأعلى).. نثبت السحاب بدبابيس مثلا.. ونخيط بالمكينة الجهة الفوقية للسحاب.
الحين، نحط البطانة الداخلية بالمعكوس (يعني القماش وجهه الصحيح لأسفل)، باضبط تكون الحافة العليا للقماش ملاصقة حافة السحاب (الزيبر)
ثبتيه بدبابيس
وخيطي بالمكينة على طول الجهة العليا للسحاب.. راح تكون الخياطة تلقائيا فوق خياطتك السابقة اللي سويتيها من شوي
الحين افتحي الطبقتين، بحيث انك تفصلين الطبقة الداخلية عن الخارجية
طبقي (طوي) الجهتين على بعض بحيث تكون الجهة الداخلية لكل منهم مواجهة للثاني من الداخل. والسحاب راح يكون بينهم كأنه ساندويتش وهو الخس .. حاولي تسحبينه وتخلين الطبقتين تمام على بعض
الحين لازم نسوي الطريقة نفسها للجهة الثانية من السحاب (الزيبر)، نحط القطعة الثانية اللي عندنا من القماش الخارجي.. على الجهة العليا للسحاب مثل ما هو واضح في الصورة.. (ما ننسى بأن الوجه الصحيح يكون لأعلى)
نخليهم على بعض بشكل مرتب.. ونخيط الجهة العلوية
هذا شكله بعد الخياطة
تابع
الحين، علشان نخيط القطعة الثانية من الجزء الداخلي، نقلب القطع اللي خياطناها بحيث تكون القطعة الداخلية الأولى وجهها لأعلى مثل ما هو موضح في الصورة، ثم نحط القطعة الثانية الداخلية فوقها بالمقلوب (يعني الوجة الصحيح للأسفل) وتكون حافة القماشة بالضبط ماشية مع حافة السحاب (الزيبر).
راح نلاحظ إن القماشتين البطانة يكون وجههم الصحيح مقابل بعض.. والسحاب يكون وجهه الصحيح للأسفل (يعني مقلوب)، خلي الحدود في وضعها الصحيح واستخدمي الدبابيس للتثبيت، وخيطي بالمكينه الجزء العلوي من السحاب.. ويصير السحاب مره ثانية كأنه خس بوسط الساندويش
هذي الصورة بعد الخياطة
الحين خطوة مهمة جدا، اقلبيهم.. مثل ما هو موضح بالصورة
وخلي السحاب مفتووووح (مهم جدا) لا تنسين !!!!!! تره بعدين ما ينفتح وتروح عليك!
الحين خذي كل قطعتين متشابهه، يعني القطعتين البطانة خليهم مقابلين (مواجهين) بعض.. والقماشة الخارجية كذلك بنفس الطريقة..
هذي صورة ثانية توضح الفكرة
بالدبابيس.. ثبتي البطانة مع بعض، والقطعة الخارجية مع بعض.
الحين ركزي معي (نقطة مهمة جدا جدا جدا) وسهلة جدا
نخيط بالمكينة الأطراف اليمين واليسار للبطانة والقاعدة للبطانة كذلك لكن مع ترك 4 أصابع، أو 3 انش بدون خياااطة في الوسط.. الصورة واااضحة، أما بالنسبة للقطعة الخارجية خيطيها كلها، يعني نخيط الأطراف اليمين واليسار مع القاعدة بدون ترك أي شي.
فكرة مفيدة وجربتها:
خيطي الأطراف انتي بشكل متواصل على السحاب كذلك عشان لا تتركين فراغ للسحاب.. يعني امشي فوقه بالمكينة من الجهتين.. فكرة سهله!... شوفي الصورة وراقبي الخياطة كيف صايرة
انا اوقات امشي مرتين عليهم عشان تكون ثابته، وانتم بكيفكم،
المهم، نقص القماش الزيادة، طبعا مع ترك تقريبا نص انش للحواف علشان لا ينسل الخيط والقماش
الحين اقلبي كل هذا للوجه الصحيح، من خلال الفتحة اللي تركتيها، لكن خليك حذره من الخيوط اللي بجانب الفتحه لا تنسل او تنفتح، خلي يدك خفيفه.. عالعمو إذا خيطتي عليها مره ثانية مثل ما سويت ما راح تحاتين هذي النقطة كثير
الحين خيطي الفتحه اللي بالبطانة.. (باليد) فيه البعض يختصر الوقت ويخيط فوقها بخيط يناسب لون البطانة وما يبين بشكل مرتب. بس طبعا لو نضم الحواف على بعض ونحاول نخيط بين الحواف بشكل مخفي عشان لا تبين.. فراح يكون أفضل بكثير، وهذي اللي اسويها... يعني تروحين بالإبره من الداخل.. من تغرزي في القطعة الأولى وتطلعي في الثانية وترجعي للأولى وادخلي في الثانية.. زي الزيجزاج (مدري اسمه بالعربي والله).. بس من الداخل وتكون الغرزه نآخذ منها كم خيط من القماش يعني مو نغرز في القماشه كلها علشان لا تبين الغرز.
خلاص الحين.. دخلي البطانه للداخل بشكل مرتب...
تم بعون الله وبحمده
أتمنى يكون الدرس حلو ومفييييد
ولا تنسوني من دعواااااااااتكم