دعائي استجاب .. الله أكبر ليس كمثله شيء

السلام عليكم ورحمة الله وبركاته

شخباركم وش مسوين

كتآبتي للموضوع لسبب واحد فقط

وهو المدح ل لله عز وجل واظهار لكرمه وفضله ونعمه التي لاتحصى ولا تعد

أبدأ ب قصتي


الحمدلله تخرجت من ثانوي وكان معدل الثانوي حقي كامل ولله الحمد - ماشاء الله -
لكن اللي دمرني وخسف نسبتي اختبار الحظ!! القدرات والتحصيلي :biggrin2:
سجلت بأكثر من جامعه وكان أبوي رافض رفض تام موضوع الواسطه !
مع أنه كثير من أبناء عائلتي ماسكين مناصبي وابوي قريب منهم ويدخلوني الجامعه اللي أبي
والكليه والتخصص اللي أبيه
مع أني كنت رافضه ايضا موضوع الواسطه لكن لقيت انه هذا الشي اللي تقدرين
تدخلين فيه الجامعه وككككككل البنات
معتمدين على موضوع الواسطه لدرجة يوم استلمنا الشهادات كل وحده شهادتها عند فلان الفلاني
الا أنا ابوي رافض ويقول رزقي عند الله :smile:

توكلت على ربي لكن ماأسميه توكّل كنت مو مهتمه لموضوع الجامعه
واقول بنقبل بنقبل
نزلت الجامعه اللي بمنطقتنا)دفعععع
والدفع نسبها مرررررررررررررره مررررررررره عاليه :confused:
ونزلت دفع جامعة قريبه من مطنقتنا واللي كنت ابيها وبشده !
وخلصت وكانوا برضوا يبون نسب عاليه ! :slider:!!
بعدها بديت اصحى لنفسي يابنننننت :eek:
لا اعتمدتي على احد من الناس ولا على رب الناس !!
كنت طول الاجازة من فرح ل فرح وحفلات وموسيقى وغناء
وافلام وجمعات وحشش في خلق الله! :unhappy:
مع أني فترة ثاني ثانوي التزمت وتبت الى الله
لكنّي رجعت مره ثانيه !!

صحيت على نفسي ووعيت
ووقتها كنت بالرياض وراجعت الاميره نوره وسعود وكلهم قالوا اذا فضى مقاعد بنكلمك !

قلت يابنت اصحي على نفسك انتي وش سويتي
لامن دنيتك ودراستك ولاهي اخرتك !

قررت التوبه ورجعت الى الله وكان في نفسي الآخره ورضا ربي
وماحطيت سبب رججوعي ل الله عشان الجامعه
اهم شي كان عندي رضا الله
تبت ل الله صرت اطول في صلاتي حافظت على اذكاري
تركت الغناء وتركت المسلسلات

وكان هالكلام يوم 1 رمضان
فاخترت التوبه في وقت عباده وهذا بيعيني كثير
لأني بشغل نفسي عن المعاصي

تبت ل الله الحمدلله
ووكلت امر جامعتي ل ربي وحسنت فيه

طبعا الفرص اللي بالجامعات اللي عندنا تقفلت الا اني للحين ادعي ربي
وكان خاطري بجامعة الاميره نوره - الاسباب كثيره ومابي اذكرها كي لاينقلب الموضوع الى نقاش لها -
كانت الفرصه الاخيره لي

توكلت على ربي وحسنت الظن فيه
كنت ادعيه بكل وقت خصوصا قبل الافطار
وبين الأذان والأقامه وفي السجود
والاستغار في كل وقت

وكنت حاسنه الظن بالله بشكل ماتتخيلونه
كنت واثقه ان ربي راح يبشرني بالقبول
من شدة وثوقي وأملي بالله لأحد سألني انقبلتي ؟ في قرارة نفسي اقول
ايه بإذن اللي ماتنام عينه بانقبل وبيصير خير لي

والله يابنات اسججد وادعي واهم شي قلبك مع الله
من شدة تفائلي كنت لاسلمت امسك جوالي اقول اكيد ربي استجاب لي وارسلولي مسجج عن القبول !!


أدعي وأدعي وأدعي وأدعي
الى أن جاء يوم السبت اللي ادخل على الموقع
الالكتروني الموحد واشوفني انقبلت بسعود بفضل من الله وكرمه ورحمته
آه من فرحتي مدري كم سجدة شكر
الحمدلله حمددددددددددددداددا كثيرا طيبا مباركا
الحمدلله الحمدلله أعظم من كلماتي وشكري

شوي الا تدق علي صديقتي وتقول انقبلت بنورة وهي اقل مني بالنسبه
وعرفت أنه النسب العاليه حولوها لسعود والاقل خذوها نوره

قلت باخذ بالاسباب وبعزم على اصراري وبعتمد على نفسي
كنت طول الوقت ادعي ان ربي يسخر لي
ولله الحمد اقبلوني بعد خطاب من سعود
مع أني تعبت هذاك اليوم رايحه وجايه

الا ان القبول يوم جاني بعد تعب كبير
كان له فرحه خاصه
وخصوصن انه صار موضوع دخولي للجامعه بدون واسطة احد او فضل من احد
وربي جمعني مع صديقاتي وقريباتي في الجامعه وهذا اللي مريحني في موضوع الغربه


الحمدلله حمدا كثيرا
والله يابنات ربي كريم ولي تجارب كثيره مع الدعاء المستجاب الحمدلله
وخصوصا برمضان

يابنات ربي كريم وغني عن العالمين
توكلوا على الله وحسنوا نواياكم
واعملوا بالاسباب واستخيروا
صدقوني من افضل الاشياء اللي شفته


موضوعي للثناء على الله ومدحه عز جلاله
ارجوا عدم التطرق لموضوع الجامعه

دعواتكم لي بأن ربي يوفقني ويشرح صدري
ويجعل استجابته لدعائي
استجابة نعمه وعطاء
لا نغمه وبلاء
ويثبت قلبي ع الهدايه ويهديني للطريق المستقيم


الله أكبر ليس كمثله شي
الله أكبر رب السموات والارض
الله اكبر الله اكبر الله اكبر
الحمدلله حمدا كثيرا طيبا مباركا فيه
الحمدلله
اللهم لك الحمد حتى ترضى ولك الحمد اذا رضيت
ولك الحمد بعد الرضى