يامانت كريم يارب كتبت لنا عمر جديد
والله شفت الموت بعيوني وتشهدت ماكنت متخيله انو بشوف اهلي تاني او بشوف ولدي وزوجي يوووووه موقف عصيب وموت
انا ساكنه بدور ارضي بحي المساعد اللي بقويزه لما بدت تمطر انا كنت صاحيه واتفرج مبسووطه مره واصحي بزوجي قوم مطر يالله نخرج بس عشان ضرسه كان يعوره ومانام الا الفجر مارضي يقوم
وقمت اتنقل من شباك للتاني وسبحان الله بالعاده ادعي ياربي تزيدو وترحم عبيدو وزي كدا هالمره اقول لزوجي واهلي اول مره ادعي ياربي تجعلها سقيا رحمه مو سقيا عداب كأني حسيت انو بيسير لي شي
المهم اخدت لي ساعه عالشبابيك وبعدها نمت صحينا اول مابدت تدخل المويا من تحت بس كانت خفيفيه ومشينا الين مجلس الرجال وفتح زوجي الشباك وشاف السيارات وهيا رايحه سار يصرخ عليا السيارات راحت والاوادم
رجعنا لغرفة النوم لقينا مستوى المويا بدت تطلع امكن نص الساق شلت ولدي ووقفت عالسرير خفنا من فتح الباب انو يشيلنا المويا لانو متوقعين القوه
قام زوجي يبغى يكسر شباك غرفة النوم عيا معه وراح للمكيف كمان عيا والحمد لله انها مااتفتحت له لانو لو خرجنا برا كان رحنا
المهم انا ماسكه الجوال ادق على جاراتي اللي انتظار واللي مشغول شويا الا وحده تدق علي منهم هما على بالهم رحت عند اهلي بس انا قابلت وحده فيهم الفجر اخدت منها حبوب لانو زوجي كان تعبان مررررره فأكدت لهم انو انا موجوده بالبيت المهم لما دقت علي الحرمه سرت ابكي واصرخ الخقو علينا احنا بنموت وسكرنا زوجها مرابط بمكه واخو زوجها بجنبهم ساكن بس عادي ماجاهم شي لانهم بالدور اللي فوق المهم ارسلت بنت الجيران للدور اللي فوقهم كان ساكن صاحب البيت واخوه قالولهم ونزلو بسرعه احنا دحين المويا وصلنا امكن اعلى من النص لسى ماغطتناقال زوجي تعالي نروح عند الباب نشوف الوضع الا الدنيا خلاااااااااص بالغصب نمشي تقلنا مرررره
المهم جا زوجي بيفتح الباب اقله انتظر دحين المويا بتجي قويه بتاخدنا معاها قال امسكيني بقوه قلتله مقدر عشان رافعه ولدي فوق قالي حاولي المهم مسكت فيه والمويه امكن وصلت رقبتي جا بيفتح الباب الا الباب مصلب عيا ينفتح سار يصرخ يقول الباب ماينفتح انا هنا تشهدت خلاااااااااص توقعت باي لحظه باموت اتاري الجيران نزلو عند الباب بس كانو واقفين عند باب المجلس لانو انفتح من المويا وتوقعو انو بنخرج معاه يعني حتسحبنا المويا هناك بس لما سمعوا اصواتنا عند الباب سارو يصرخو ع زوجي افتح الباب قالهم عيا ينفتح وعرفنا انهم حيكسروه جنبنا شوي عن الباب الا وهما كسروه ودخلو قام دفعهم المويا جوه بس ثبتو وعلى طول مسكونا وانا افتكر انوولدي كنت رافعته لما مسكني واحد منهم وزوجي سار يسحبني قدام بيدي طبعا هنا انا شرقانه بالمويا يعني غطتني خلاص افتكرت انو ولدي مو بيدي تعالو شوفو كيف جتني زي الهيستريا اصرخ احسبه طاح من يدي اتاري شاله الرجال مني زوجي يقول لما سمعتك تنادي يقول انفجعت احسبو راح الا واشوفه بيد جارنا يقول اقلك هنا خلااص بس انا قربت انجن وماني سامعتهم ولاني قادره الف اشوف المهم سحبوني جاراتي من يد زوجي وطلعوني شقتهم وغطوني وانا اصرخ وين ولدي شوي الا دخلين فيه واحضنه وابكي وربي حسيت بكل شي وقتها باحساس الموت واحساس انو انكتب لنا عمر جديد كان كل شي فجأه وغريب وبلمح البصر سار يعني المويا غطتنا بظرف 10 دقايق
الحمد لله يارب على كرمك وانك نجيتنا من الموت انا وزوجي وولدي واللي ببطني يامنت كريم يارب
ودي قصتي ومعاصرتي للموت
واللي تعرف احد بالدفاع المدني تساعدني لانو لين دحين ماصرفولنا اعانه ادونا شقه وكل اللي ورانا وقدامنا راح والله الشقه اللي انا فيها مافيها شي نفسي اقوم اسوي شي ماني لاقيه وكمان حامل وتعبانه
اللي يسمع عن اي اعاشه او اعانه او جاء التعويض تكفون بلغوني عالخاص
ودعواتكم ليا ربي يعوضني مادام خرجنا بارواحنا كلو يتعوض ان شاء الله
ســــومه @somh_8
عضوة فعالة
يلزم عليك تسجيل الدخول أولًا لكتابة تعليق.
حمد لله على سلامتكم ياعمرري
الحمد لله ربي نجاكم الحمد لله
طيب ليه اول ماحسيتوا بالموية نص الساق ليه ما هربتوا للادوار اللي فوق ليه تأخرتوواا ؟
الحمد لله ربي نجاكم الحمد لله
طيب ليه اول ماحسيتوا بالموية نص الساق ليه ما هربتوا للادوار اللي فوق ليه تأخرتوواا ؟
المنظمة
•
الف الحمد لله على سلامتك يارب وعلى سلامة زوجك وولدك بس استغرب ما سمعتم اصوات السيارات وليه يوم شفتوا المويه ما طلعتوا على طول
مدري الله يعينك احس التفكير ينشل في هذي اللحظه
والف الحمد لله على سلامتك يارب وعقبال ما تبشرينا بولادتك
مدري الله يعينك احس التفكير ينشل في هذي اللحظه
والف الحمد لله على سلامتك يارب وعقبال ما تبشرينا بولادتك
الصفحة الأخيرة
الله يفرج همكم يارب ويعوضكم خير