دعواتكم لي بالثبات وان الله يطمني على ولدي ويشرح صدري///احس إني باستخف

السلام عليكم ورحمة الله وبركاته
مسائكم خير وفي خير
خواتي الله لا يجعلكم تشوفون مكروه في ذريتكم
ويحفظهم لكم بصراحه مدري وش اقول بعد طيحة ولدي الصغير احس اني تعبانه نفسيا وجسديا استغفر الله يارب سامحني والله حسيت إني ضعيفة ايمان مدري ايش فيني بعد ماشفت ولدي وهو يطيح قدام عيني ومالحقت عليه إلا وهو في الارض احس إني ارتجف إلى الحين وعظامي مكسره وماني مرتاحه كل شوي اتفقد الولد واحس الشيطان اعوذ بالله منه بداء يوسوس لي يقولي الولد صار سمعه ثقيل والولد صار وجهه مصفر ومن تحت عيونه اخضر والبارح نزل مع المخاط حقه نقطة دم وزادت حالتي سوء من شفته ودقات قلبي كل مالها تزيد وكل ماتذكرت الموقف يجيني غثيان وباستفرغ مدري ليش ذا كله 
ياربي سامحني وقوني يارب طمني على ولدي 
ياخواتي مدري وش فيني ماخبرت نفسي إني ضعيفه الحمدلله على كل حال ابغى ابرر لنفسي ولتصرفاتي ومالقيت غير إني اقول يمكن  عشان انا تعبت مع ولدي الكبير سنين من المرض والمعاناه ومستشفيات وكثرت امراضه  وهذا ولدي الثاني مابغى يجيه شي يخليني افقده واندم طول حياتي على إني حطيته فوق الدولاب واللي تعبني زياده إنه صغير لسى ماكمل السنه رغم إني وديته المستشفى وفحصوه الممرضين والدكاتره قالو إن شاء الله إنه سليم بس راقبيه خلال اربع وعشرين ساعه 
بس الجوء اللي انا عايشته في البيت مره مايريحني ولدي كبير زايد ضربه لاخوه وطايحه فيه خصام وزوجي مره ماوقف بجنبي ولا واساني ولا حتى فكر يهدئ من روعتي وخوفي على ولدي إلا بالعكس طايح فيني تهديد وخصام تخيلوا البارح لمن نزل بقعة الدم من انف الولد اقوله يلا نوديه المستشفى نتطمن عليه يقولي انا ماني مسؤول عن غلط غيري شي يقهر والله فيني غيض وخوف مو طبيعي 
دعواتكم خواتي لي بالثبات ولولدي بالعافيه والله ماعندي حد افضفض له اهلي بديره ثانيه واهل زوجي مابغى اقولهم عشان مايلوموني لانهم لوامين 
يارب سامحني ويارب سلم ولدي من كل شر واحفظه وفرحني بصحته
ماعليش كثرت كلام بس والله هذا ولا شي باللي في قلبي ونفسيتي مزفته الله المستعان