دعواتكم لي بالصبر والثبات ... فقدت قرة عيني ولدي الحبيب محمد

السلام عليكم ورحمة الله وبركاته

اخواتي الحبيبات في عالم حواء في اليوم السابع من ذي الحجة وفي تمام الساعة الرابعة كانت لحظ وداع مؤلمة ودعنا فيها حبيبنا محمد بعد معاناة دامت سنتين ونصف من عمره مع مرض السرطان مات وعمره لم يتجاوز الثالثة بعد .... الحمد لله الحمد لله الحمد لله ... في الاسابيع الثلاث الاخيرة تعب مرة كثير وكان يتألم ويصيح في الليل اعطيني فيفا دول واعطيه يهدأ شوي ويرجع الالم اقوى كنت اصلي وادعي بحرقة والم (( يارب اختر له مافيه الخير ورضني بقضائك .. اللهم انك تعلم ولا اعلم فإن كانت الحياة خير له فأبقه واشفيه وان كان الموت خير له ورحمة مما هو فيه فأمته وصبرني يارب العالمين )) وكان الموت رحمة له والحمد لله

قصة ولدي باختصار للي ما يعرفها :

وانا حامل في الشهر الثامن عملت سونار وقالت الطبيبة الجنين عنده تضخم في الكلية اليسرى بعد الولادة يعمل سونار واشعة مقطعية

بعد الولادة عملناله اللازم من الفحوصات واللي اشرف عليها رئيس قسم الاشعة في مستشفى الحرس بالرياض وسبحان الله النتائج طلعت سليمة ومافيه شئ ... كبر حمودي الى عمر 7 اشهر لاحظت انتفاخ في بطنه وقساوة في الجهة اليسرى وكنا وقتها نقلنا من الرياض للمدينة وسبحان الله رجعنا الحرس وطلعت النتائج انه ورم كبير ولازم عملية استاصال للكلية فورا .. تمت العملية واستخرجوا الورم وكان وزنه 800 جرام بوزن جنين في الشهر الخامس من الحمل (( تخيلو كان شايل هذا الوزن وبدون الم سبحان الله )

بعد كذا الفحوصات اظهرت انه سليم وبعد 3 اشهر من العملية عملنا اشعة مقطعية للبطن وظهر سليم وكذلك بعد 6 اشهر (( يعني مرتين نعمل الفحوصات ويظهر سليم كل 3 اشهر )) بعدها ب3 اشهر عملنا الفحوصات وظهر الورم من جديد لكن هذي المرة منتشر في البطن والرئة وحاجب العين اليمين والساق اليسرى بدأ رحلة الكيماوي وكان عمره سنة و4 اشهر وعملو عملية اخرى شالو الورم الكبير اللي في البطن استمر الكيماوي لمدة 11 شهر وفي اخر شهر اخذ 14 جلسة اشعاع (( اخد الاشعاع على البطن والصدر اما الساق والعين كان باقي شي بسيط جدا من الورم وقال طبيب الاشعاع في التخصصي ما يحتاج اشعاع تروح ببقية جرعات الكيماوي وسبحان الله بعد نهاية فترة العلاج ب5 اشهر رجع الورم اللي في ساقه كبر واللي في العين وهنا كل المستشفيات سواء الحرس او التخصصي قالو مانقدر نعمله شي حبيبي كان يتألم وجلس اسبوع ما يمشي يتألم من ساقه الثانية اليمين حتى المسكنات ما كانت تفيد وطلع انه حتى اليمين ظهر فيها الورم

عملنا كل اللي نقدر عليه ما يشرب الا زمزم مقروء فيه كل ما سمعت عن علاج استخدمناه (( علاج حليب الابل مع البول بطرقة الدكتورة فاتن خورشيد ... علاج ام عبد الرحمن عبارة عن اعشاب مع حلبة ... علاج الباحثة الجزائرية جميلة سويكي )) غير العسل وحبة البركة وزيت الزيتون ماخليت شي القراءة الحمد لله ما تركنا الرقية الشرعية من بداية مرضة ... وكل ماتيسرت لنا رحنابه مكة ..
قبل وفاته بأسبوعين شاف ابوه واخوانه لابسين ثياب ورايحين صلاة الجمعة طلب مني البسه الثوب .. حبيبي لبسته الثوب والغترة وجلست امام التلفزيون فاتحة على المجد واتابع خطبة الجمعة قال لي حبيبي ابغى اروح عند الكعبة ما ابغى اروح المسجد وكأنه كان عارف انه بيودع وحب يودع الكعبة ... طبعا الاسبوع الثاني سافرنا مكة سوينل عمرة وغسلناه بزمزم بس هو اسبوع من رجعتنا من مكة ساءت حالته وبدأ الورم يخرج من العين تخيلو العين نازلة تحت مرة موباين الا طرف من العدسة وفيه لحمة خارجة تقريبا 1 سم على برا بحيث ماتنقفل العين وقت النوم وطبعا يخرج منها دم وصديد ((( الحمد لله الحمد لله اللي رحم ولدي من هذي الآلام كلها )) طبعا زوجي ما قصر رسل حتى لامريكا التقرير بس لان الورم منتشر في الجسم والدماغ رفضوا وقالو وفرو له عيشة هنية فأيامه معدودة ..
في يوم وفاته كان كثير التطليع حتى اعطيه الدوا المضاد للقئ وما ينفع يستفرغ على طول وما يرد على اكلمه ما يرد ناديت ابوه وضع السماعة واخذ يسمع نبضه (( ابوه طبيب)) بعدين اخذ المصحف وقعد يقرأ يس حسيت ان الولد رايح انسدحت جنبه اقبله قد ما اقدر وبعدين قال زوجي لبسيه اوديه المستشفى ياخذ محلول من كثر التطليع ممكن هبط السكر .. وداه الساعة 11 الصباح وطبعا رفض اني اروح معاه لان فيه اطفال في البيت ما اقدر اتركهم .. اتصلت الساعة 2 اطمن عليه قالي الحمد لله طيب ويتكلم حمدت ربي وشكرته وبعدين دقيت الساعة 3 مارد زوجي دقيت على ولدي الكبير ( 14 سنة ) وكان معاه قالى انه بعد المحلول حمر وجهه مرة ودخلوه غرفة وطلعوني برا وبعد 5 دقايق اتصل ابوه وقالي تعبان مرة قلت خلي اخوه معاه وتعال وديني عنده انا اجلس معاه قالي طيب اشوف ... بعد 10 دقايق وعلى صلاة العصر والسماء غيم وتمطر مطر خفيف هتان اتصل زوجي وقالي (((( عظم الله اجرك في محمد ))) الحمد لله ربي الهمني بعد ما قفلت السماعة اني اسجد واحمد ربي واشكره على اعظم نعمة انعمها علي وهي شفاعة ولدي لي يوم القيامة ..
وهذا بفضل الله ثم الدعاء طول فترة مرضه وانا ادعو ربي يلهمني الصبر والثبات عند المصيبة واستعيذ بالله من الجزع والسخط والحمد لله ..

معليش حبيباتي طولت كثير عليكم بس والله مافي غيركم بعد الله معي الان ودي اطلع اللي بقلبي

اخوه بصف ثاني ابتدائي يبكي ويشهق ويقولي ابغى اشوفه وهو كبير ليش مات ..

اليوم ثالث يوم بالعزا وودي اطلع ملابسه والله انه فيها اشياء جديدة ما لبسها حبيبي وعملت جاكيت كروشيه وما كملته له وكان يسألني وهو تعبان (( ماما ماخلصتي جاكيتي ))

وانا اجمع ملابسه لقيت تحت مخدة بنتي بصف رابع لقيت ملابسه اللي راح بيها للمستشفى قالت لاتطلعيها يا ماما ودي كل يوم قبل النوم اشمها ونام عليها احس ان محمد موجود قلت لها ما يسير لاني اعرف بنتي حساسة وحنونة اخذت الملابس بس نسيت الحزام وجيت الظهر لقيتها حاظنة الحزام وتبكي هديتها واعطيتها المصحف وقلت لها هذا افضل بكثير اكثري من القراءة تكثر حسناتك وربنا يجمعنا في الجنة معاه ..