دعوة إلى الأمهات والمعلمات بمناسبة قرب بداية العام الدراسى الجديد

السلام عليكم و رحمة الله و بركاته

حبيبتي ام ياسمين

موضوعك مهم جدا جدا و فعلا جاي في وقته بما ان الدراسة على الابواب. شوفي انا حاتكلم معاكي من خبرتي كمدرسة سابقة درست لكل الاعمار من سن 3 سنوات لسن 60 سنة يعني على المعاش. بس الموضوع حيحتاج مننا حلقات عشان نقدر نتكلم فمتزهقيش لو قلت كلمتين و سكت شوية، بس كل ما اكون فاضية حاقولك شوية، اوكي؟؟؟

أول حاجة عشان تبدأي الدراسة مع أي شخص في أي مرحلة عمرية و خصوصا الاطفال، هي اعدادهم نفسيا للدراسة. يعني لازم في البداية منتكلمش عن الكتابة و القراءة و غيرها لكن لازم نتصاحب على الطالب او الطالبة و نفتح معاهم حوار عن هواياتهم و مواهبهم و نعرف بيفكروا ازاي عشان نعرف ندخل لهم منين. متستغربيش كلامي لكن لكل انسان مدخل نقدر عن طريقه نعرف المعلومة توصل منين و تثبت ازاي. فانتي ابتدي من دلوقت تفتحي حوار مع بنتك تعمليه من خلالها الحروف بطريقة مبسطة جدا. يعني مثلا حنبدأ بالابجدية العربية لانها لغتها الام، يبقى تشوفي اي حاجة حواليكي في البيت بتبدأ بحروف الهجاء و تبدأي تعلميها حرف حرف مع انها تشوف الكلمة اللي تمثله، ولو مفيش في البيت حاجة تمثل الحرف عندك الصور من الجرايد او المجلات او الكتب. مثلا حنبدأ بحرف الالف يبقي ابدأ أعملها نطقه مع صورة لشكله بانك ترسمي لها حرف الف كبير على ورقة و مش مهم انها تتعلمه في وقت قصير لا اصبري عليها يعني النهاردة اخدنا الف أرنب نفضل نغني في الحكاية دي طول اليوم و لما بابي يرجع من الشغل شوف يا بابي عرفنا الف أرنب و شكله كذا و لما جدو ييجي يزورنا شوف يا جدو عرفنا الف أرنب و هكذا و اما تلاقي انها بدأت تحفظه ادخلي على الحرف الجديد بكلمته و صورته و بنفس الاسلوب. و كل مرة نراجع الحرفين سوا مش الجديد بس، يعني ركزي على الجديد يوم كامل و من تاني يوم نبدأ نربط الاتنين سوا و هكذا في بقية الحروف. و اهم حاجة توضحي اد ايه هي شاطرة و حفظت، و بلاش لو نسيت تزعلي و تقولي ايه ده لحقتي تنسي و ازاي تنسي و الكلام ده، خليكي صبورة و بالك طويل و متزهقيش

و غدا للحوار بقية :)

شكراً يا نودى على مشاركتك الجميلة
انا قصدى لو حد يلاقى تدريبات أفكار مسائل وأنشطة حاجات متنوعة تساعد بشكل أو فى آخر بجعل التعليم شئ مختلف وظريف أنا عندى افكار كتير واريد المشاركة

مبروك عليكى موضوعك يا ام ياسمين:icon28: وهو فعلا موضوع ممتاز ويهم كل ام ..ربنا يباركلك فى يا سمين وتفرحى بيها وهى متفوقة و عروسة طب انا اولادى لسة صغننين فى بيبى كلاس ينفع اشارك ؟؟؟؟

0 بس يا نودى انا سمعاكى )

ايوة يا نودى اول نصيحة هى الصبر فى هذا السن وخصوصا فى تعليم الكتابة ...بس على فكرة يا ام ياسمين دلوقتى فية فى السوق جميع وسائل الايضاح و بطريقة مجسمة وملونة جميلة ..ممكن تستعينى بيهم وتعلقيهم على الحيطة ...وانا كنت بستخدم مع اولادى الكاسيت كنت بسجل الحرف بصوتى والكلمة بتاعته واشغله لحد ما بيتحفظ بسرعة وبعدين اغير الكلمة

فى أنتظار الجديد