دعوة للمشاركة ، تعالوا نسعد بعض ونترك بصمة خير

السلام عليكم ورحمة الله ..


كيفكم حبيباتي ان شاء الله بخير ..
كثيير بالقسم مشاكل و قصص مؤلمة ، هذا الموضوع ابغى نتشارك فيه .. كيف نسعد اللي حولنا ! كيف ندخل السرور لأنفسهم ! كيف نكون ايجابيين ..
اش اعمال الخير اللي تحرصون عليها (من باب التعامل مع الناس) لان الله عز وجل يحب المحسنين ..
وفي حال احسنا للغير النتيجة راح تكون رضا لله و ممكن يكون سبب بتيسير امورنا وفرج لهمومنا ..
تعالوا نقترح على بعض اساليب لطيفة تدخل البهجة للي حولنا ، سواء اهلك او الصديقات او حتى الناس الغريبة عنك .. كل ما كان الشخص لطيف مع اللي حوله
كل ما كان الرضا يملا قلبه ، فقط اربطوها بحسن نية وانك تبغون فيها وجه لله عشان تؤجرين عليها ..
الكثير يلازم منا الصدقة سواء بالمال او بالتبسم للاخرين او بالرحمة على الحيوانات ، لازم ابدا ما نستهين بأي شي نقدمه ما نستصغره لان مافي احد يعرف عظم اجره عند الله
لان ربي يضاعف الحسنة بعشر امثالها ما بالك لو ساعدتي احد او اخرجتيه من حزنه او فرجتي كربته بشكل او بأخر بشكل غير مباشر ..
حتى هنا بالمنتدى لو كل وحده تحتسب الاجر بكل رد تضيفه وهي نيتها اسعاد صاحبة الموضوع و غرضها تعينها وتشد من ازرها صدقوني ربي راح يكتب لها الاجر لان هذا من حسن الخلق
ومافي امر يثقل الميزان كحسن الخلق مع الاخرين مستوعبين الانسان يثقل ميزانه حسن الخلق مافي عبادة ايسر منها فقط نوزن كل كلمة تخرج من افواهنا هل راح تجرح الشخص
هل راح تحزنه هل راح تكدره اذا كانت ايه نتوقف اذا كانت لازم تقال من باب الحق وتوعية الشخص نحاول نجيبها بألطف طريقة ممكنه بدون اهانه او تجريح تذكرو قل خيرا او اصمت


شاركونا اساليب تسعد اللي حولك .. اي فكره اكتبوها ..
مجرد امثله ( شخص اعرف ان خاطره بشي مره بس ماديته مو كويسه اوفره له كهدية / مثال اخر ، اصحي بدري يوم وجهزي فطور كامل لاهلك ورتبيه ونسقيه ودلعيهم فيه صدقيني راح يسعدهم / مثال اخر ، عطري دواليب اهلك وبخريها و كمان سجادة الصلاة او مثلا اشتري مفرش جديد لغرفتهم ورتبيه وخليهم يدخلون ويحصلو كرت يعبر عن حبك لهم وسعادتك فيهم / مثال اخر اذا كنت تعرفين احد يمر كرب وهم ادعميه بشكل مباشر ارسلي رسائل تقوي يقينه بالله تذكره بفضل الدعاء والذكر وايضا رسائل ايجابيه ترفع من معنوياته ، وممكن تدعميه بشكل غير مباشر ويكون خبيئة بينك وبين ربك تتصدقين وتنوين فيها ربي يفرج عن هالشخص وايضا الدعاء بظهر الغيب / مثال اخر ، شوفي العماله اللي عندك في البيت سولفي معاهم وحاولي تدخلين حياتها لا يغلف علاقتك فيهم جمود الخادم و المخدوم لا ابدا حسسيها انها فرد من العائلة مو عامله منزلية / مثال خذي اطفال عائلتك وفرحيهم بزياره سريعه للسوبر ماركت وخليهم يتسوقون حددي مبلغ لك طفل وخليه يلتزم فيه منها يتعلم انه يوازن مشترياته مقابل المبلغ ومنها يثق بنفسه ويحس بالمسؤوليه ولا يخفاك اجر ادخال السرور لانفسهم الاطفال احباب الله / مثال اخر لما تكوني بالجامعه بالمدرسة بالعمل بأي مكان وتشوفي شخص على غير طبيعته وحزين ومهموم بادريه بلطف واسألي بلباقه اش فيه من باب المواساه وليس من باب الفضول )
هذا اللي جا ببالي .. وتذكروا طول عمرنا بالمدارس يكررو علينا حديثين .. الاول ( مثل المؤمنين في توادهم وتراحمهم وتعاطفهم مثل الجسد إذا اشتكى شيئا تداعى له سائر الجسد بالسهر والحمى ) الثاني ( المؤمن للمؤمن كالبنيان يشد بعضه بعضا ، وشبك بين أصابعه ) جميل نحس ببعض ونداري بعض ونهتم ببعض ..


انتظر مشاركاتكم واحتسبوا فيها الاجر .. عذرا اذا الاسلوب مو مرتب لكن المهم الفائدة : )