ذكرتوني بموقف حصل وانا والدة بعملية قيصرية وتعبانة لدرجة بعد الولادة بشهر عملت عملية جراحية ثانية وحالتي حاله ماعندي شغالة وبنتي عمرها سنتين والبيبي والصراخ
وكلمتني وحدة من اقارب زوجي قالتي نبغى نجي نزورك بس مانبغاك تتعبي نفسك ابدا بس نشرب عصير ونمشي انا انحرجت بالمرة لاني مره تعباااانة وما احب احد يزورني وما اتفنن بضيافتو خصوصا انها اول مرة يزوروني بس وافقت لانها الصراااحة ذووق
وكلمت الله يسعدها بعض الحريم على اساس يتجمعو في يوم واحد وارتاح من الاستقبال كل شوي واتفقو يجو بدون اطفال ويوم جو جات معاهم وحدة الله يسامحها باطفالها (يارب لو اقول جن قليلة وربي )
من يوم ما دخلو وهم من غرفة لغرفة وكنت منومة بنتي والبيبي في غرفتهم ما شوفه الا مصحينهم وبنتي مسكت نكد صارت تبكي عشانها صحيت لاقت ناس وهم مو متعودة عليهم والبيبي يبكي وانا اسكت فيهم واضيف الناس قهوة وحلى وهم يجمعو الحلى بيدينهم ويجروا في البيت والشكولاتة مدعسة في كل مكان وانا حالي حال اجري وراهم ولا اقابل ضيوفي الي جايين يوجبوني والكنب لونو ابيض صار بني وامهم شايفة وساكتة مندمجة مع الناس بالسوالف وكل ما اجيبهم يجلسو مع امهم تقولي خليهم ينبسطو بعيد عننا وانا بيتي نظام امريكي مفتوح على بعض ما اقدر احكرهم في مكان وهم من المطبخ للصالة لغرفة الضيوف لغرفة الاطفال ماسكين طواف والمعجنات في كل مكان اقسم بالله اني لقيت معجنات بالتونة في مخدة سرير البيبي ولقيت شكولاتة معفوسة وكيك بدرج مكتب زوجي وربي حسيت اني منهارة من التعب بس اجري وراهم وهي تقولي اجلسي معانا ما شفناك لاحقة على نظافة بيتك ياموسوسة
آآآآآآآآآآآه والكل لاحظ اهمالها لاطفالها لدرجة وحدة من الموجودات الله يسعدها اتصلت على زوجها يجي يمسك الاطفال بالشارع تخيلو وهي ولا حاسة ابدا وكل شوي تقولي بيتك الصراحة نظيف لدرجة مو منطقية احس انو غرفة عناية مركزة من كثر التعقيم (طيب مادام لاحظتي اني نظيفة انتبهي لطفالك ) وتقولي متى يمديك على كل هادا وانت والدة وتعبانة اكيد زوجك يساعدك اكيد عقدتي الرجال وصار مهوس بالنظافة زيك
يارب وانا كنت ابغى اموت من الالم احس الجرح مشدود وشي في سرتي يوجعني زي العرق المشدود ووجهي صار متغير ومو قادرة اضحك مع الناس الين راحو وجا زوجي انصدم يوم شاف البيت يقولي كانو اعصار ضرب البيت وانا بس ابكي وارفع الفوضى وهو يقولي ارتاحي وانا بكره اساعدك ننظف البيت وانا اقول ما اقدر انام والبيت بهادا الحال الفواحة الكربائية الي بالموية مكسورة والمويه مغرقة السيب والاكل بكل مكان وجلسنا ننظف بالبيت الين الفجر وكان يوم ثلاثاء ,,,,,,,,, طبعا نمت بعد صلاة فجر يوم الاربعاء وانا حاسة بالام مرة قوي بس قلت يمكن عشان تعبت نفسي الين جا يوم الخميس حسيت اني مو قادرة اتحمل الالم كل شوي يزيد فرحت المستشفى قالولي صار عندك فتاق بالسرة ولازم تعملي عمليه عشان اتحبس جزء من غشاء البطن في الفتاق وعملت عملية وبعدها توبة استقبل هادي الانسانة ببيتي حتى لو ايش لاني تعبت من عينها وتعبت من اهمالها وتعبت من طلباتها قسم بالله وانا اقدم قهوة عربي هي تقول بالله اعمليلي قهوة تركي بدون سكر ولمن قدمت شاهي قالتلي انا ابغى شاهي اخضر وشوي كنا جالسين نتكلم على شاهي لبتون بنكهة الخوخ الا تقولي بالله اعمليه خليني اشوف لو عجبني اخلي زوجي يجيب

مشكورين هالمرور يا حلوات
يعني اشين شين لاحظته هو الاطفال المشاغيبين
فعلا وربي هم اللي ما ينطاقون
صارت لقافه الحريم اهون عند حوسه الاطفال

بصراحة أنا لاحظت كثير من أمهات هالوقت مدلعة بزارينها دلع ماصخ..لدرجة أن الطفل جرئ جداً حتى على أمه يهاوشها وهو مابعد طلع من البيضة ,,والله ياودي أصكه بكف,, وهي ساكته تقولين مبسوطة
ولويسوي أي شئ وتقولين له ليش يابابا عيب زعلت ومدت بوزها,,

أما أقرب موقف في أيام عيد الفطر
جايه وكل همها أن عيالها يأكلون أكبر قدر من الشوكولاته بس جالسة تأخذ وتوزع وتفك لهم لدرجة واحد من عيالها قام يرجع
الله لايلومه من الحشي اللي حشته اياه أمه,,هذا وهم في خير
وكمان
في حريم تصدق عيالها لو يقول أي شئ يعني قدام عيني مسوي هالشئ وهو ينكره
وبالأخيرتصدقه هو وتكذبني هذا وأنا حرمة هذا كبري..يعني تنظر الى عيالها أنهم ملائكة مايغلطون لو ايش..

موووضوووع غايه الروووووووعه^_^

ياحبي للضيوف الحمد **** اني ماني حساسة من ضيوفي مثلكم يازينهم ويازين اطفالهم **** لايحرمني اياهم ع
بس اهم شي عندي يعطوني خبر قبل مايجون