دعيت على زوجي وندمت 💔

السلام عليكم ورحمه الله وبركاته
كيفكم حوائيات؟
بصراحه موضوعي غريب بس والله العظيم القصه حقيقية ..


عشان تفهمون القصة
انا واخوي ماخذين اخ واخت فهمتوا؟
يعني اخت زوجي تصير زوجه اخوي..




اول من تزوج طبعا اخوي اخذ بنتهم وعاشو ٥ سنين تقريبا سوا قبل اتزوج انا والب خطبني زوجه اخوي
علاقتنا مره مره حلوه وزي الاخوات وماعمري غلطت عليها ولا عمرها غلطت علي..
بدت المشكله قبل سنه ونص تقريبا من الان..
بعد زواجي بسنتين حملت وجبت بنوته وعمرها الحين ٣ سنين
واخوي زوجته ما حملت وماكان فيه مشكله ابدا بهالخصوص ولا عمرنا تدخلنا بينهم ابدا ويعلم الله ان اخوي يحبها ويموت فيها وامي لما يجيها مكسور ويبي عيال دائما تقوله الله يرزقكم بس لا تخرب سعادتك لو انت مبسوط ومرتاح وربي بيرزقكم وكان حتى معارض الانابيب وكل شي ومقتنع ان يا زوجته تحمل طبيعي يا انه بيرضى بالي قسمه الله له..
مرت السنين وكملوا ١٠ سنين متزوجين واخوي وصل للاربعينات فجأة قرر انه يبي عيال، قال انه يبي احد يشيله لما يكبر، وقال لزوجته انه يحبها ويبيها بس من حقه يجيه عيال وحلف لها ماتكون الثانية اكثر من ام عيال..
لكنها زعلت (ومن حقها) وراحت لاهلها وقالت انه لو تزوج تبي تتطلق (ومن حقها كمان)، حاولنا كثير نقرب وجهات النظر الين رضت بزواجه بشرط بيت ملك باسمها عشان ما يطلعونها عياله منه بعدين ووافق اخوي وكتب دور من بيته باسمها مقابل رجعتها له، وتزوج وجاه بنت الله يصلحها لهم ..
وبدت غيره زوجته وتعبها ولا تنلام والله العظيم ما الومها، بدت تتعب نفسيا وتبكي وتاذي نفسها ومره زعلت لانها شافت تعلق زوجها ببنته وحست انها تهمشت..


لكن وش الصدمة؟
الصدمة ان ام زوجي (ام البنت) قررت تزوج زوجي انتقاما من اخوي!!!؟؟
اول ما قالت له هو رفض وقال ان احنا مالنا دخل بينهم ينخرب بيتنا وان حياتنا كويسه وقالها عشان تسكت ان ماعنده فلوس يفتح بيتين..
لكنها استمرت تزن عليه واسمع من الناس انها تروح المناسبات وتخطب له ! وانا سكتت وماسويت شي لان ماكان فيه اكثر من مجرد كلام وكنت ادري ان زوجي مو مقتنع بالسالفة ووقتها كان عمر بنتي حول السنه تقريبا..
مرت الايام ويجي يوم الا ام زوجي جاتني عصريه بكامل الكشخه والاناقة واستقبلتها وتقهوينا ويطلع زوجي كاشخ وريحه العطر ع بعد كيلو وشافني وارتبك وقال انه معزوم هو وامه..
مارديت ولما لبست امه العباية قالت لي (اليوم كتب كتابة ادعي له بالتوفيق) انا ما رديت عليها ولفيت عليه هو وقلت له بالحرف (الله يهبها بين عيونك) دعوه باللهجة الجنوبية معناها تقريبا ان الله يردها لك بين عيونك..
وطلع زعلان مره وراح وخلا امه كان رايح لبيت العروس وامه نزلت لزوجها تروح معه (انا ساكنه فوقهم) وقفلت جوالي وصليت ودعيت عليه من كل قلبي ان الله ينتقم منه ويحرق قلبه وبعدها هديت وشغلت فلم وقهوه وروقان ومعد سالت عنه، قفلت باب الشقة عشان مايرجع ومارجع وانبسطت انه ما فكر حتى يرجع وبعد يوم كامل فتحت جوالي الاقي مكالمات بالهبل من اهلي ومن اهله وقلت اكيد ع سالفه الزواج فكلمت امي اول وحده ابي اطمنها علي الا هي تقولي
كيفك؟ رحتي المستشفى ولا باقي؟
انا انهبلت وش المستشفى!!! قالت ولا شي ولا شي وقفلت بوجهي ورجعت ادق واحلفها تعلمني وش السالفة
قالت زوجك سوا حادث امس وهو بالمستشفى!
كلمت ابوه واكد لي الموضوع ورحت له المستشفى وكان بالعناية وجلس فيها شهر وكنا نزوره وكان صاحي ويتفاعل بس ما يتلكم لان بفمه انبوبة التنفس..
بعد ما فكوا الانبوبة وبدأ العلاج الطبيعي والتأهيلي قالوا لنا ان الاصابة اثرت على الدماغ وصار عنده مشكله بالنطق والكلام، يتكلم بس كلامه ثقيل ثقيييييييل، وفقد الاحساس بوحده من رجلينه من غير الاصابات بالراس وكسر الوجنه والخ..
تقريبا صار معاق، واحتاج علاج نفسي مع الجسدي وبقي فتره طويله جدا بالمستشفى قبل يطلع البيت وتبدا مشكله اكبر، يبي مصعد ويبي سياره مخصصه لحالته ويبي مراعاه
وانا نفسي عاااااافته ورب البيت عفته من يوم ما سمع لامه وظلمني بسبب اخته وانا مالي ذنب
جلست فتره اسلك وامشي له بس وربي كل ما شفته اذكر ثقته وهو ماشي قدامي بيخطب وانا ماسويت له شي!
وامه معد تكلمني وعلمت الناس كلهم اني دعيت عليه!
انا ندمت اني دعيت عليه لان مايستاهل الموضوع بالرغم من القهر وتمنيت لو اني بس تحسبت وتركت جزاءهم على الله بس ماقدرت وقتها اكلني القهر اكل..


والحين بعد ما مر سنه ونص عالحادث وتقريبا تعود هو على وضعه وحياته، انا معد ابي اكمل معه ابدا، عفته وقلبي عافه واخذته وانا صغيره عمري ١٨ ومابي اضيع عمري على واحد تخلى عني بكلمه من امه بدون ما اغلط عليه!
يعلم الله لولا حركته الاخيرة لو كان جاني مشلول وبغيبوبه لاشيله في عيوني لاخر عمري، بس بعد حركته ماقدرت وهو يعاملني معامله وصخه جدا الحين لاني دعيت عليه وحاطني سبب الي جاه ناسي ظلمه لي!!


ومابي منه ولا شي الا نفقه بنته فقط..


ضميري مأنبني على دعوتي عليه بنفس الوقت مابي تانيب الضمير يجبرني اتحمله بعد فعايله، شوروا علي بدووون تجريييح