& دعيت لكم يابنات حواء في اطهربقاع الارض...وانا كلي فرح ويافرحي انقلب انكسار &

اهلين اخواتي
ماتصدقون فرحتي لماكتب لي ربي ازور الحرم
وكنت متعطشه اني اوقف بين يدي رب العباد ابعث له همومي
امنياتي
دعواتي
واسئله الخيرة من امري

وربي يابنات اني دعيت لكم من كل قلبي في الحرم ان ربي يرزق كل وحده من بنات عالم حواء
او من متصفحات عالم حواء مايسرها ويسعدها

والحمدلله على كل حال
سمعت بهالبقعه الطاهره خبر كدرني وتبلد للاسف احساسي
حاولت ادعي سبب لي هالخبر صدمه
لكن دوم اقول الحمدلله الحمدلله احمدلله اللهم عوضني خير

مدري كيف اوصف لكم شعوري
ماادري ليش كتبت لكم الموضوع
هل عشان اعبر لكم عن حبي لكم
هل عشان اطلب منكم تساعدوني بعد الله
بدعوه صادقه من قلوبكم
ماابي تكتبونها ردود ابيها من قلبكم لو دقيقه

من جد يابنات انا من داخلي محطمه
يجيني الامل لحظه ويجي الشيطان يوسوس لي اني ماراح احصل مبتغاي
لكن بسرعه اتذكر ان لي رب مايعجزه شئ
ادعوا لي ان ربي يخيب ظن الناس ان محد راح يقبل فيني الا رجل عاجز او كبير بالسن او مريض بسبب حالتي الصحية
ادعوا لي اني امشي بين الناس ويشوفوني متزوجه رجل ماينقصه شئ مو قصدي مركز ولافلوس قصدي باخلاقه بدال مايطالعوني بنظرة الشفقه وان الزواج لحالتي نادر
ادعوا لي تكفون ان امي وابوي يفرحون فيني ويشوفوني زوجه متهنيه بزوج بيتها
ويعزها ولايحسسها مثل ماحسسوها الناس بالنقص

الحمدلله عمر اهلي ماحسسوني بان الي حولي كل وحده تسهلت وانا على حالي
عمرهم مابينوا اهتمامهم اني اتزوج مع اني عارفه انهم مثل كل ام وابو ودهم يفرحون فيني

ومع كل هذا واثقه اني انسانه كامله وربي بيرزقني نتيجة صبري

يارب لاتجعل هالموضوع حجة علي
وان كنت اغضبتك بكلمة كتبتها فارحمني برحمتك ولكن المسلم عون لاخيه المسلم
وانا طلبت من اخواتي دعوة لعلها توافق وقت استجابه او من قلب طاهر فتقبلها وتكتب لها التحقق

بنات
ادري نصيبي جايني بالطريق واكيد خيره كل اموري وماتهاونت ابدا بدعائي وان شاء الله ربي بيحقق له عاجلا ام اجلا
لكن ادعوا لي بالصبر والرضى والقناعه واني افرح اهلي قريب
وماتخلص هالسنه
الا وانا زايره هالبقعه الطاهره وانا زوجة لخيرة عباده الصالحين

نفسي وامنيتي هالدعوه تتحقق لي

يـــــــــــــــــــــــــــــــــــــــــــــــــــــــــــــــــــــــــــــــــارب ياحي ياقيوم حقق مبتغاي وانت عالم بحالي
ومبغتى من دعت لي او قرات موضوعي

اختكم
دانة بوسط محارة