طبعا الكل معروف عنده دقوس الطماط
ويقدم للغدا مع كافة انواع الرز
مثل المجبوس
والمطبق
والرز الابيض
والبرياني
لكن الفاتح للشهيه اكثر هو دقوس الباذنجان وانا بصراحه ما استغني عنه بغداي اليومي
وطريقته سهله
المقادير :
باذنجانه وحده كبيره
2 فص ثوم
ملح
معجون طماط
قليل من الزيت
واذا حابه حطي فلفل اخضر حار مقطع
وفلفل اسود وقليل من البهارات
الطريقه :
تشوى الباذنجانه اما بالفرن او على النار حتى يصبح لونها اسود وتتقشر قليلا
وتحسين ان من داخلها نضج وصار لين
نخليها لما تبرد ونقشرها وناخذ اللي داخلها ونفرمه بالشوكه
نضع القدر على النار وفيه القليل من الزيت
ونضع فوقه الباذنجان مع الملح ومعجون الطماط والثوم والفلفل الحار
ونقلبه قليلا على النار حتى يتجانس مع بعض
بالاخر راح يطلع معانا دقوس باذنجان ولا الذ
وبالعافيه
جربوه وراح تاكلون بدل الطبق من الرز طبقين هههههههههههه ما يصلح حق اللي تسوي الرجيم لانه من جد يفتح الشهيه
ام عزيزان @am_aazyzan
فنانة عالم حواء
يلزم عليك تسجيل الدخول أولًا لكتابة تعليق.
BINTalnoor
•
شكرا يا حبيبتي على الدقوس الشهي وتسلم الايادي
الصفحة الأخيرة