دلكه بيضا

اخواتي الغاليات
السلام عليكم ورحمة الله
في الاجازة الصيفيه رحت ملتقى البحر الصيفي المقام على شاطي جده المهم مسوين خيمه كبيره عبارة عن سوق نسائي طبعا في خيمة الحريم يعني مايدخلو الرجال لقيت سودانية تبيع دلكه سودانية بيضا اشتريتها وكالعادة اشتري خلطات وفي النهاية تخرب وما استعملها من الكسل واشتريت لاحتي معاي اختي استخدمتها وتقول ريحتها ترمس وحمص ورز قلتلها ما ادري لانه ماعرف الترمس والحمص ما احبه عشان كذا مالي خبره في الريحه طبعا استخدمها قبل يومين واليوم استخدمتها صراحه لاحظت فرق في لون الرقبه لانه تعرفوا وقت الحمل يتغير لون الرقبه وجربت ليمون وجلسرين وماعندي صبر مالقيت نتيجه لكن الان شفت الفرق وان شاء الله يوم عن يوم استخدمها واديكم النتيجه النهائية

ونسيت اقولكم طريقتها طبعا هي مطحونه مره بودرة وتأخذي مقدار بالملعقه وتخلطيها بموية ورد لما تتكون عند زي المهلبيه وبعدين تفرديها على جسمك وبعد ماتنشف تجيبي زيت زيتون تدلكي جسمك به وبعده تأخذي ليفه ويفضل لونها فاتح حتى تري اللي ينزل من جسمك وتقولي ماعمري استحميت من اللون اللي ينزل وتفركي جسمك لين تنزل البودرة وبعدها تتروشي بالصابونه وانا اتروشة بصابونه الكركم وبعدها بصابونه اخرى وتلاقي جسمك مشدود يدي ورقبتي احسها مشدوده كان الخلطه لسا ما غسلتها منها واللي تجربها تقولنا النتيجه وطبعا السودانيات سر مهنتهم ما يخبرو احد بمكوناتها ودمتم
اختكم شامه