دلوني..محتارة مع زوجي...

صباح الخير

بنات انا سبق وطرحت لكم مشكلتي مع زوجي
اللي هي (انه مايشتغل)
وراح اقولكم باختصار كتذكير فقط
انا تزوجت من 3 سنوات برجل طيب ولكنه كان يعمل براتب ضعيف فماوافقت عليه عشان مادياته ضعيفه، لكن تحت اصرار الاهل باخلاقه وطيبته وافقت ،والى اليوم ماني منتدمه على زواجي منه
لكن المشكلة بعد زواجي اكتشفت انه مايشتغل مع العلم انه اثناء ماتقدم لي اهلي سالوا عنه بمقر عمله وكلهم اشادوا به ومدحوه
لكن بعد زواجي منه طلع يشتغل على بند بالحكومه وهالبند الغي لوجود من موظفين من الديوان ،وهنا بدات مأساتي معه، طلع من شركة لشركة ومن مكان لمكان والى الان مااستقر بمكان والى الان ماهو قادر يصرف علي ولاعلى بنتي
قبل 8 اشهر قدم على شركة كبيرة ومعروفه واعطوه دورة 6 اشهر بعدها طلبوا منه انه يسافر لمدينة ثانية للعمل وسافرت انا معه وداوم هناك شهرين ولاصرفوا له ولاريال وكل يوم بكره ورجعنا هنا طبعا قبل السفر سلمنا شقتنا واثاثنا بعناه كله ورجعنا بلا اي مال
انا جلست في بيت اهلي وهو في بيت اهله ومانشوف بعض الا بالسيارة لما نطلع مشوار او لما اوزر اهله او العكس
صار لنا على هالحال اربعه اشهر والان هو يبحث عن عمل ومافي جيبه ولاريال وانا تعبت من هالحياة بجد وصبرت كثيررر وهو يماطل بعد لكن اشهد الله انه تعامله احسن مايمكن ومافيه عيب الا الماده
المشكلة اانه الاربعاء الماضي مواعدني انه ياخذني انا وبنته ويدبر فلوس ونطلع بشقه مفروشه يومين لانا نبي نجلس مع بعض وكان مواعدني بهالطلعه من قبل اسبوع وكنت اعد وامحي لها وفرحانه كثير
وخاصة انها بيوم الاربعاء وانا معزومه بعزيمة كبيرة ومتشيكه وراح يشوف كل زيني
يوم الثلاثاء سالته بكرة راح نطلع شقه؟ قال ان شاء الله
قلت قلي بدري عشان اجهز نفسي والاربعاء العصر سالته بنطلع؟ قال الى الان ماادري المهم وقبل لايجي ياخذني من بيت اهلي عشان يوديني للعزيمة دق بالطريق وقال جهزي اغراضك بعد ماتخلص العزيمة بنطلع لشقه قلت الان مايمدي بعد مانرجع بجهزها وماكان فرحان زي عادته
طلعت من العزيمة وركبت معاه، وقالي ماراح نطلع لشقه ماقدرت ادبر فلوس، قلت اوكي وانا معصبه مو لازم مو اول مره تسويها لكن توبه مااعاد اطلب منك ان حنا نطلع ولاراح اطلع اصلا الا ببيت خاص فيني وانت لاتطلب مني لاني ماراح اوافق وبس جلسنا طول الطريق ساكتين وبعد ماوصلنا لبيت اهلي (جلست ابكي دون صوت بس هو حس اني ابكي وماقال شي وهذي عادتي كل ماطلعت معاه ورجعت لبيت اهلي لازم ابكي عند الباب لاني اتخيل اني ابي اروح معاه لبيتي واحس ان بيت اهلي مو بيتي بيتي هو اللي يجمعني معاه)
المهم دخلت للبيت وارسلت له مسجات كثيره وكلها بالصميم من ضمنها ان كل زوجه مع زوجها الان الا انت وحسبي الله على من شار عليك تاخذني
ومارد علي

والصباح طلعنا للبر مع اهلي وبعد ارسلت له اني طالعه وكل خواتي مع ازواجهم الا انا لحالي دونك وبعض الكلمات اللي تضيق صدره
ومارد
بعدها ارسلت قلت(لاترد وطنش بقوة لكن بيجيك يوم تتمنى تسمع صوتي )
وبعدها ارسل لي كلمة وحده بس((احبك))
وبالليل مادق ولاشي وجيت ارسلت له(ماتوقعتك كذا حتى بنتك ماتسال وشلونها) رد علي قال(مافي يدي شي اقدمه لكم انا لاشي) وعرفت انه محطم ونفسيته زفت وهذا طبعه لما تحصل مشكله يغيب وماادري عنه
الان انا يابنات تعبت من حياتي معاه بس مازلت احبه وابيه وانا سويت كثير عشانه حتى بعت ذهبي كله عشان مايحتاج لاحد وكنت اشتغل بحكم انه ماعنده شهاده واعطيه راتبي كله ولما نحتاج شي كنت اخذ من اهلي واعطيه وماقصرت بصبري وجمايلي معاه وهو يستاهل بس احسه مو متحمس للعمل مدري ليه وانا الان مااشتغل عشان ماتقولون انه متكل عليك
المهم انا فكرت بحلين:
الاول: اطنشه وماارد عليه لو اتصل واحرمه من بنته فتره
الثاني: اكلم اخوي يناديه عندنا بالبيت ونجلس انا وهو واخوي نتفاهم انه لازم يبحث عن عمل او نفترق افضل
وشرايكم؟