الله يعطيك العافية على الموضوع الحلو .. وأسمحي لي أضيف الي عندي

الي استفدت منه استفادة كبيرة جداً كان البندانات.. لأني الحمدلله أتنقب.. فكان النقاب يصدع برأسي بشكل.. ولما لبست لثام صرت اضطر أحط الحجاب عند حواجبي فتطلع رقبتي وحالة.. المهم أن البندانات ساعدتني كثيــــــــر الحمدلله.. أخذتها من طيبة ب5 ريال الوحدة..

زي ما قلتي الدلة والإبريق والفناجيل والبالات مهمة

القهوة واشيائها..

أنا عن نفسي أفضل عن حوسة المطار والخرابيط أجمع الي أبيه أنا و زوجي ونرتبه في شنطه ونشحنه.. كلها أسبوع أسبوعين وهو واصلنا .. وإذا مستعجلين عليه اشحنوه قبل تسافرون بأسبوع ونص مثلاً تروحون تلقونه واصل.. وأريح لكم بعد من شغلة الوزن

الخطوط السعودية ياحبي لقلوبهم ما يدققون بالوزن كثير لكن جوا أمريكا ما فيه شيء اسمه معك شنطة غير الصغيرة الي تركبينها معك.. لكن إذا رحلتكم كونكت من دولة مالهم علاقة بالوزن.. هالشيء بس يتعبك وأنتِ رايحة السعودية يدققون مره في وزن الشناط (أقصد الخطوط الأمريكية الداخلية)..

طبعاً انتبهي تحطين أي سؤال بشنطتك الي بيدك أو الي بتركبينها معك الطيارة (الشنطة الصغيرة الي تحطينها فوق المقعد) لأنهم ببساطة راح يأخذونها ويرمونها بالزبالة تكرمين قدامك

الأكل الحمدلله متوفر بس فيه اشياء ممكن تأخذينها معك لأنه سبحان الله يصيبك حنين مب طبيعي على أكل بلدك.. مثلاً خوذي جالكسي اندومي(يفك أزمة) بهاراتنا مارس (مافيه جالكسي ولا مارس ولا باونتي بأمريكا) بتروحون وقت صيام ممكن تأخذون فيمتو.. التمر مهم جداً زي ما قالت وحدة من البنات راح تأكلينه حتى لو ما كنتي تأكلينه

جهازك احرصي ما يكون فيه برامج مب أصلية وإلا أفلام وأي شيء مب قانوني لأنه لو فتشوه وصار فيه شيء كذا وقتها مشكلة كبيرة

كريمات وعطور ومدري ايش تكفين لا تأخذين أي شيء تراه الي عندنا عندهم بس زيادة وزن وبهذلة بالشنطة

احرصي شناطك تكون قوية بس خفيفة عشان الوزن

اجهزة كهربائية استشوار وكذا نصيحة خوذي من هناك عشان أفياشهم لها شكل معين ما تجلسين تدورين أفياش ومدري ايش

لا تكثرين ملابس وجزم وشنط أولاً السوق هنا مليان والماركات أرخص وغير كذا ماراح تحتاجينها

خوذوا توصيلة رأسها أمريكي ثلاثي عشان جوالاتكم وكمبيوتراتكم أو أي أجهزة معكم رأسها مختلف

خوذي لك جزمة مريحة للمطار وحطي في شنطتك مناديل معقمة و مرطب صغيـــــــــر مره غالبا مايقولون شيء وحتى لو رموه يكون مب خسارة

خوذي معك سجادة أو 2
أوقات الصلاة سهل جداً تعرف من موقع islamic finder واتجاه القبلة إذا معكم آيفون من الموقع تعرفون اتجاه القبلة ومن الآيفون تحددونه.. وإلا خوذوا معكم بوصلة وإلا السجادة الي فيها اتجاه القبلة

ساعة الفجر حلوة لأنك ماراح تسمعين صوت الأذان وهالشيء يخليك من دون ما تحسين احيانا تفوتك وقت الصلاة

هذا الي طرى علي ولو تذكرت شيء ثاني رجعت إن شاء الله

الغربة فيها الحلو والمر.. يبي لها قوة وصبر.. نصيحة يا بنات.. تتمسكون بدينكم هناك وحافظوا على الصلاة والأذكار وعلى حجابكم.. الغربة امتحان حقيقي لك ولإيمانك.. مكان الواحد فيه يقدر يسوي أي شيء ما أحد يمنعه.. هنا يبين من يخاف الله ومن يخاف القانون..

الله يستر عليكم جميعاً وييسر أموركم..

يالله موضوك جا بوقته ..
أنا توي متزوجه وكلها كم يوم وراح اسافر مع زوجي ..
بدايات الموضوع كنت شايله هم بس بعد الزواج ربي يهونها عليك

طبعاً أكيد يزال الهم وترك الاهل شي صعب لكن بنسبة أقل عن قبل
حالياً أنا متحمسه للسفر رغم الصعوبات إللي عارفه أنها راح تواجهني
لكن لما تحطين إيجابيات السفر بكفه راح ترجح ..
السفر خطوه حلوه لك وله لو أنتِ مقتنعه فيها مئة بالمئه
راح يقربكم من بعض .. هناك مافي إلا أنتِ وهو يعني مالكم غير بعض
السفر يقرب الزوجين من بعض .. راح يكون لك كككل شي وأنتِ له كككل شي
وهذي اهم نقطة في السفر =)

الشيء الثاني الإعتماد على النفس
هناك راح يكون لك بيت لحالك .. أنتِ إللي راح تتدبرين امورك بنفسك
سواء بالطبخ بالتنظيف بالغسيل حتى في اتفه الأشياء إللي لو كنتِ بديرتك
على طول وبدون تفكير بترفعين الجوال وتدقين على امك او أختك عشان تدبرك
لكن هناك مافي هالاشياء يا ماما الجو غير والبعد ما يسمح لك كل شوي رافعه السماعه تستفسرين ..
وقتها ودك بس تسمعين اخبارهم .. فحاولوا من الان تأقلمون نفسكم على هالشي
الشغل صح صعب لكن راح تكونين محظوظه لان زوجك راح يداريك ويساعدك حتى في شغل البيت


ككل شي في بداياته صعب لكن السفر راح يطور من نفسك ويخليك أنسانه ثانيه
راح تلاقين زوجك هنااك مو بس زوج لكن أخ واب وصديق

نقطه مهمه أحب أذكرها .. الأعتماد على النفس شيء مهم جداً
لا تعتمدين على زوجك في كل امورك .. خليه يحس أنك أنتِ بعد قادره على تحمل المسؤوليه
خليه لما يجي يشاور أحد في اي موضوع يشاورك أنتِ ويلقى الجواب عندك
اموركم , إحتياجاتكم , مقاضي البيت ... الخ أنتِ ساعديه فيها وخلصيها
كوني له سند وعون

فيه جانب إيجابي أخر في السفر أكتساب ثقافات مختلفه
ومين ما وده يسافر ويشوف دنيا غير وعالم جديد وشعب مختلف
أتوقع الكل


نقطه مهمممه ويمكن أهم نقطه
لا تنسين نفسك مع الزحمه والاشغال .. طوري من لغتك وكملي دراستك
أشغلي نفسك بشي يفيدك ع الاقل ترجعين وأنتِ معك لغة
الشي لما تاخذينه من برا غير لما تدرسينه هنا

ميس فيلنق عافاك ربي
والله يجعل كل كلمه كتبتيها في ميزان حسناتك
اتمنى لو يكون الموضوع مرجع لكل بنت مغتربة راح يفيدنا ويساعدنا كثير والله
موفقه إن شاء الله والجميع

يعطيك العافيه miss
موضوعك مهم مره .. وبالذات للبنات الي ماحولهم تجارب غربه
بالنسبه لي, اخت زوجي كانت مغتربة قبلي .. عشان كذا ما تعتبت كثير بالتفكير

طبعا بعد تجربة 4 شهور غربه ببريطانيا ممكن اختصر اللسته بالاشياء هذي:

1- تمرثم تمر ثم تمر ,, حتى لو ماتاكلون التمر كثير .. بالغربة راح تاكلونه وتلحسون كراتينه بعد .. ما ادري هو شعور بالحنين للوطن ولا ايش .. مع اني بالسعودية ماكنت اكل الا تمرتين بالاسبوع ويمكن اقل ,, بس لما تغربت صرت احبه كثير .. والمشكلة انه الحين قرب يخلص وتوهقت ,, عشان كذا احرصوا تكثرون منه .

2- بيجامات قطنية داخليه .. لان البرد هنا يوصل لتحت الصفر

3-للبرادات وبالذات الي جايين وقت البرد و ما يلبسون عبايات بالسفر,, تحتاجون تجيبون كم بنطلون طلعات اكبر من مقاسكم بشوي عشان تقدرين تلبسين تحتها البيجامة القطن
معلومة ممكن تكون مو مهمه للكل , بس انا انسانه برااادة واحتاج ادبل بكل شي , والمشكلة كل شي كان على مقاسي بالملم فتشوفوني رجعت ادور بناطيل اكبر بشوي )

4- ملابس شتوية ( لا تخلين شي بخاطرك ) ابتداء من القلفزات لما الشرابات

5- مترجم الكتروني صغير للشنطة ,, وهذا شي ما حسبت حسابه واعتمدت على ثقافتي وتندمت

6- المحولات الصغيره ( القسامات - الافياش) ,, لان الفتحات عندهم ببريطانيا ماتجي الا 3 فقط

7- طاحونة مولينكس صغيرة للقهوة , اذا كنتي من النوع الي يحب القهوة والهيل Fresh يعني تحبين تطحنينها بنفسك اول بأول.

8- اهم شي أدوية البرد .. لان هنا مايصرفون لك .. فاذا كنتي تعرفين علاجاتك الي تحتاجينها لنزلات البرد جيبي منها وكثري .

9- محفظة قروش صغيره ,, عشان ماتبحلين بقروشك وتصيرين تنطلينها بالشنطة ولا تحطينها بعلبة النظارات

اما باقي الاشياء , راح تلقونها هنا وبأفضل كواليتي كمان لا تشيلون هم

وبكذآ خلصنآ الموضوع والنسخ وان شاء الله استفدتوا

مشكوووووووورة