سكرة هانم ماركة لاسو فى اى محل لانجيرى وعندك وسط البلد وقصر النيل وشارع محمد فريد مليانين هتلاقى حاطين فى الفترينه قمصان نوم مكتوب عليها لاسو يبقى المحل ده عنده منجات لاسو
وفى روكسى كمان عندك فى شارع بطرس غالى فى شارع عمودى عليه كده اللى بيطلع على الاهرام فى هناك كم محل لانجريهات على ايدك الشمال رضه عندهم لاسو

السلام عليكم و رحمة الله و بركاته

يا صباح الفل على احلى بنات و مدامات

صباح الفل يا اليانورا،اخبار الشغل ايه؟؟ انتي كمان وحشتينا يا قمر

صباح الخير يا لاروزا يا مطنشاني انتي!!! بانكشك بس يا قمر، طمنيني عاملة ايه في اجراءاتك؟؟ يا رب تكون كل حاجة ماشية تمام

سكرة هانم حبيبتي، وحشتيني جدا جدا جدا جدا (اربعة مش تلاتة زيك!!!) يا حبيبتي ربنا معاكي و يعدي كورس الحقن على خير بس انتي كمان حاولي تاخدي حديد من الاكل كتير يا سكرتي، سلامتك الف الف سلامة. اما بالنسبة للسؤال بتاعي، انتي عارفة اني دماغي منخل!!! انا ماشية بورقة و قلم عشان افكر نفسي بالحاجات اللي المفروض اعملها او اجيبها و بعدين مشكلة حياتي اني الاقي الورقة دي انا حطيتها فين بعد ما خلصت كتابة اصلا!!!!!! شوفي انا كنت فاكرة لما اتكلمنا انا و انتي عن الكريم ده بس فاكرة طشاش عشان كده سألت تاني، بس انتي مقولتيليش بيتحط قبل الميك اب و الا بعده، لان فيه ناس بيقولوا قبله و نا س بيقولوا بعده و ناس بيقولوا اخلطيه بكريم الاساس. معلش يا سكرتي قوليلي بيتحط امتى بالظبط. انا حاشوفك امتى بقى؟؟؟ وحشتيني انتي و السينامون و الكابتشينو!!!!!

منمووووووووووووونة، انتي قمر و سكر و شربات، عارفة ليه؟؟؟ لانك قلتي تقريبا معظم الكلام اللي كنت عاوزة اقوله بخصوص موضوع الشغل. على فكرة هي الحكاية بتفرق من واحدة للتانية لان فيه ناس ساعات مش بتعرف تستغل وقتها كويس حتى قبل الجواز و هي في بيوت اهلها و عشان كده المشكلة بتزيد لما بتروح بيت جوزها و بتلاقي عندها وقت فراغ كبير. اما بالنسبة للي بتعرف تستغل وقتها و تقضي شغل بيتها و تشوف ولادها و جوزها و احتياجاتهم قابلوني اصلا لو لقت وقت فراغ تشكي منه او حتى تحاول تعمل لنفسها هي حاجة فيه. عموما زي ما قلنا هي الحكاية تختلف من شخصية للتانية و انا اشجع تماما قعدة المرأة في بيتها و زي ما قالت منى و ام يوسف ممكن تشغلي نفسك بحاجات كتير اوي مفيدة و تتعلمي و تعلمي كمان

ريم احمد، يا قمر يا محتارة على طول انتي، تعالي يا ستي اما اقولك، همه بيقولوا الخطوط البيضا دي بتضيع لما يتدهنيها باستمرار بخل التفاح و بيقولوا ملوش ريحة لكن انا اشتريت نوع ريحته اجارك الله يا ريم!!!!! لا تطاق و مش باطيق نفسي بيه و لا دقيقة واحدة، بس فيه بنات كتير بتشكر فيه و بتقول انه بيضيع الخطوط البيضا بانك تدلكي اماكنها بيه و تسيبيه هو بينشف لوحده لانه بيطير. اما الكيعان و الركب السودا فادهنيها بزيت الزيتون و بكريم جليسوليد اللي في العلبة الحمرا، برضه دي من نصايح بنات كتير اوي اعرفهم. بس عاوزة رأيي انا شخصيا؟؟؟ يا بنتي متحطيش حكاية الخطوط و لا الركب و الكيعان دي في دماغك!!! جوزك مش حينفر منك عشان عندك خطين بيض و الا كوع غامق. المهم انك تكوني انسانة مهتمة بنظافتك الشخصية و دايما واخدة بالك من نفسك عشانك انتي قبل ما يكون عشانه حتى، اما مسألة ان الركبة غامقة شوية او فيه كام خط ابيض في الارداف و الكلام ده متخليهوش يعقدك و لا يكون هو ده الفيصل في ازاي جوزي يشوفني كده!! سيبك من القلق الزايد ده، بس زي ما قلتلك اهتمي بترطيب كوعك و ركبتك و جسمك كله دايما و انتي حتلاقي ان الحاجات دي بتقل لكن مش بتضيع تماما، و الف مبروك يا قمر، و احنا منتظرين اسئلتك دايما بس نفسي تبطلي قلق عشان تبقي احلى عروسة

سبانيش فلاور سان، كونيتشي وااااااا!!!!!! انتي شكلك دكتورة دمها عسل، ربنا يخليلك بناتك و جوزك و يخليكي ليهم و يهنيكم. شوفي يا ستي، متترعبيش و لا حاجة بس اعرفي الخلفية الثقافية للناس اللي بتتعاملي معاهم عشان تبقي منتبهة لتصرفاتهم و تصرفاتك. يعني اليابانيين مش بيسلموا على بعض بالايد و لا يبوسوا بعض و بالاحضان لان في ثقافتهم لمس الاخر ده زي التابو، لو ان اجيالهم الشابة اللي اتأثرت بالغرب اختلفت كتير دلوقت، لكن هي دي ثقافتهم مفيش لمس. كمان لا يمكن تسألي حد سؤال مباشر لان ده عيب!!! لازم تلفي و تدوري شوية، و كمان الرد لا يمكن يبقى مباشر لازم يكون فيه لف و دوران برضه لانه عيب تقولي حاجة مباشرة. يعني دي شوية حاجات اتعلمتها من تعاملي معاهم و حبيت انصحك بيها. و على فكرة، نصيحة و انتي هناك لو بتحبي الميك اب متفوتيش الفرصة و استخدمي من منتجات شيسيدو لانها مش موجودة هنا في مصر و انا شفتها مع بنات يابانيات هنا و هي ماركة تحفة خصوصا الشادو و الروجات و منتجات البشرة

هبة، انا اشتريت جرنال الحلوة النهاردة بس مش عارفة ابص فيه في الشغل، و للاسف فاتني العدد اللي فات، بس مش مشكلة لما اقرا ده حاقولكم استفدت ايه. هبة، فين اللينك بتاع موضوع البشرة؟؟ اوعي تكوني نسيتي تنزليه!!!!

احلام عصفور، وحشتيني جدا و الحمد لله انك بخير. انا مش بابقى عالمسنجر بالليل لان كارت الفاكس عندي تقريبا فيه مشكلة و لسه محدش اتعطف عليا عشان يركب لي واحد جديد، بس نفسي اتكلم معاكي جدا. تابعينا و بلاش تغطسي كتير عشان بتوحشينا يا بنت انتي

سلامي للجميع،

حبيبتى لاروز كفت ووفت

عايزة اوضح حاجة بس بالنسبة لعمل المرأة عمل المرأة مش الهدف الاساسى منه شغل وقت الفراغ لا فى ناس كتير عندهم طموحات يعنى بيكونوا بيشتغلوا و يحبوا يكتسبوا خبرة اكثر و يكون لهم وضع فى المجتمع لكن لو الواحدة بتشتغل علشان تقضى وقت فراغها بس يبقى غلط تقعد بيتها احسنلها لكن انا بأيد ان المرأة لازم يكون لها استقلال مادى كمان حتى لو زوجها بيتكفل بيها

صباح الخير على اجمل حلوين