يا سبحان الله اختي .. قصتك تشبه قصتي وايد ..

انا زوجي طلقني من شهرين بتأثير من أمه و اخته بعد سنه و اربع شهور من احلى ايام حياتنا لأني اجهضت مرتين .. بعدني حتى ما تعالجت و لا رحت اشوف سبب الاجهاض .. بنتي الاولى ماتت في بطني في 7 شهور و الجنين الثاني في 3 شهور .. طلقني بعد الاجهاض الثاني ب 5 ايام ..

كان يحبني موت .. و يقول لي انه بين فترة و فتره يصلي ركعتين شكر لله انه رزقه زوجه مثلي .. و بعد اجهاضي الاول حلف لي بأغلظ الإيمان انه اذا ما انجبنا فإنه ما يفكر يتزوج علي و راضي باللي الله يكتبه لنا حتى لو بدون عيال .. بعد الاجهاض الثاني .. كان متضايق وايد .. كلم امه و اخته الكبيرة (امه من دوله عربيه و ليست اماراتيه) فقالت له امه انها تبي تشوف عياله .. و اخته قالت له هنجوزك ست ستها اللي تجيب لك العيال .. انا رفضت فكرة الزوجه الثانيه متوقعه انه بيبقى على العشرة .. قام و طلقني .. بيتزوج وحده من بلد امه "بالرخيص" حسب كلامه ..

اول ايامي كانت معاناه ، لا ليلي ليل و لا نهاري نهار .. كنت بنجن خلاص .. ما آكل و لا أنام .. لدرجة انه في مناسبتين اضطريت آخذ ادوية منومه عشان اقدر انام .. و حسيت ان حياتي انتهت و انه دمرني .. و ما كنت افكر الا بالطلاق و موضوع الطلاق .. و كنت ابكي دايما ..

الحين شهرين من طلقني .. لكن و الحمدلله نفسيتي صارت وايد احسن ..و مع الايام بتصير احسن و احسن .. لأن الله عطانا نعمة النسيان .. و الحمدلله الله عطاك ولد تقر به عينك .. و اعلمي انه اذا ظلمك .. الله بياخذ بحقك منه.. انا عمتي زوجها الأول طلقها ظلم .. اول ولد جاه من زوجته الثانية كان طفل منغولي .. و زوجها الثاني بعد طلقها ظلم .. مات ابنه من زوجته المتوفاه في حادث بعد الطلاق على طول .. انتي دايما قولي "حسبي الله و نعم الوكيل" و الله بياخذ لك حقك منه ..
و دايما ادعي "اللهم آجرني في مصيبتي و اخلف لي خيرا منها" .. هذا الدعاء الرسول وصى فيه ام سلمه بعد ما مات عنها زوجها ابو سلمه و كان من خيرة الصحابه .. فقالت للرسول" و هل هناك من هو خيرا من ابو سلمه؟" طلب منها الرسول مرة اخرى ان تدعي به .. ظلت تدعي به لمدة اسبوع و هي ليست مقتنعه جدا بما تدعي به .. بعد الاسبوع بعث الرسول اليها بامرأة تخطبها له .. خطبها الرسول بأمر الهي اذ ان الله استجاب لدعائها وبعث لها من هو خيرا من ابو سلمه ..

صح للحين تجيني لحظات ابكي فيها و اتشاءم .. بس بشكل عام احاول اتفاءل قد ما اقدر و اقنع نفسي ان الله بيعوضني خير ان شاء الله ..

والله يصبرج .. قولي " لا حول و لا قوة الا بالله" و احتسبي الاجر عند الله.. و ان شاء الله مع الايام بتهدا نفسيتك .. و ان شاء الله يهتدي زوجك و يحس بغلطته و يرجع لك .. اكثري من قيام الليل في هذا الشهر الكريم و اكثري الدعاء في القيام .. و اذا كان لك خير في رجعتك له .. الله بيرجعك .. و اذا ما رجعتي له .. اعلمي انه ما فيه خير لك و ان الله كاتب لك الخير في مكان ثاني مع انسان ثاني يقدرك ..

لا حول و لا قوة الا بالله .. لا حول و لا قوة الا بالله ..