دموعي الحاره بتصير بعد ايام دم احمر

السلام عليكم ياأجمل حوائياااات 🌸🌸🌸
احبكم أحب أرواحكم الي تتنافس للمساعده ولإنقاذ المحتاجين وأشوفكم تسارعون وتمسحون دموع البآكين ومهما أتكلم وأمدح مااوفي حقكم
بموضوعي السابق الي تكلمت فيه عن الزواج من عاجز وماعنده علاقه ونعيش كأخت وصديقه!!
كانت اكبر أمنيه انتظرتها سنين ومااعتقد بتتحقق لو يوصل عمري 50 عااااام
أترجاااااكم يالربع ماتخلوني ماتتركوني بهمي وحزني وحيرتي 😔 انا سني الآن سن زواج مو صغيره والسنين تمر وتمر والوقت صار يجري بسرعه وانا اتخيل حالي وحدي بالبيت لاأنيس ولاعيال ...... 🌸🌸🌸مااظمن حياة ربعي لأقدر الله جا ظروف آش بيصير علي ؟؟؟؟ المرأه ضعيفه تحتاج سند وذراع تحتمي فيها وصدر لاوضعت راسهآ عليه يخفف من اهآت الدنيا واوجاعها
الإنسان اساسه ضعيف يحتاج مشاركة احد معه يحتاج شريك يكمل معه حياته ويحارب هو وياه شوك الأيام ......
جيتكم اترجاكم جيتكم مالي حيله جيتكم والدمع بعيني جيتكم وقلبي مطعون وجسد بلا روح
طلبتكم تساعدوني وتقفون معايه وقفة الأخت لأختها .....🌸🌸🌸
اريد حل ينهي معاناتي ويعالج وضعي الي ماادري كيف هو ؟؟!! انا بنفسي متعجبه من روحي .... اشوف البنات قدامي غير عني أشوفهم طبيعيات وعلى فطرة ربي .... انا من بينهم حالة شاذه ..... ابي افهم علتي بالظبط
ابي اعرف إِيش السبب ليه انا كذا ماني مثلهم
عسى فهمتوني يالاصحاب وفهمتوا جرحي
ويش اسآوي لمما بنات القرايب يعرسون وحدا ورا وحدا وانا مغبره بينهم واشوف كسرة عيون اميً وأبوي الي يتمنون يفرحون فيني ومايدرون عن الي بقلبي 💔 بعد ايام شهور سنين اذا دق باب بينتنا واحد مافيه عيب وكامل مكمل ورفضته!!! ويش بيقولون عني الناس ويش بيحسون فيه ربعي !!! انا بروحي بتحسر على عمري وبضل ابكي على وضعي المزري
اجل متى أصير زي بنات الخلق متى اتلهف وأتمنى وانتظر لحظة العرس ؟؟؟ اخاف أغامر واورط روحي مع ابن الناس وأظلم الرجال معي
الي تزوج ويبي حقه زي اي واحد غيره وتعب وخسر ومن بلوغه لين صار كبير وهو يحلم ويتمنى واجي فجأه اخرب وأكسر حلمه بيدي
ومدري ويش هي النتيجه ؟ طلاق سمعه خياس او معلقه ببيت اهلي او إِيش ؟ كفايه يكفي خيبت ظنون اهلي كل ماجا واحد طردته ومااريد اجرب حظي وأخذ واحد وليلة الدخله اتقفل على نفسي عشان مااريد يلمسني !!وضع يحزن بجدد
😔انا اختكم الصغيرة خذو بإيدي انصحوني قبل بكره قبل مااندم قد شعر راسي 😞