السلام عليكم شوفي يا اختي الطلاق مو اخر الدنيا ولا اخر الحياة انا نفسي ناطرة اولد وبعدها راح أطلب الطلاق رسمي ومو معنى هذا اني اشجع على الططلاق بس احيانا يكون هو اخر الحلول الممكنة اللي تحافظ على كرامة الانسان اختي انتي غلطتي لما حطيتي كل همك انك تبين تتزوجين مثل باقي البنات وخلاص وبالتالي كانت النتيجة مو حلوة وهذا انتي قاعدة تغلطين نفس الغلطة وكل همك الحين انك تتزوجين مو مهم متزوج ارمل او مطلق المهم عندك يصلي ويعرف الله ويصونك اختي شيلي فكرة الحاحك على الزواج من راسك وخليها على الله انتي بس كثري الدعاء وقيام الليل وقراءة القرآن مع اترديد أذكار الصباح والمساء وانا خايفة انك من زود الحاحك تتزوجين اول واحد يتقدملك وتعيدين نفس الغلطة وتأكدي مو بس اهم شي ان الرجل يصلي ويعرف الله ويصونك لا لازم تعرفين ظروفه الأول يعني ليش بيتزوج ثاني مرة او ليش مطلق لنه ياما رجاجيل يعرفون الله وملتزمين لكن ماقدروا يعمرون مع حريمهم ولا قدروا يعدلون بين زوجاتهم فاياكي انكي تكونين السبب في خراب بيت زوجة ثانية وتأكدي بان الرجل بيكون خبيث أحيانا ويعلم بأن المطلقة تكون في حاجه بائسة لتغير كلمة مطلقة فبسهولة يرمي شباكه حواليها فخلي بالك زين من هالنوعية ولا تخلين هروبك من كلمة مطلقة يدفعك لعيش حياة بائسة تجملين فيها اسم زوجة والسلام . ماله داعي تحسين بالحزن من نظرات الغير ترى اكثر الحزن اللي انتي تحسين فيه يكون نابع أحيانا منك انتي نفسك فتحسين انك مظلومة ويتهيألك ان الناس تنظرلك بشفقة بس لا انتي خليكي قوية وحتى لو هم فعلا نظروا لك بهالطريقة لا تستسلمين ابني لك مستقبل وخلي لك حرفة او هواية وخلي الناس تنظر لك على انك قوية مايهزك شي وصدقيني لو انتي حسيتي انك قوية وووقتي بنفسك اكثر كل الناس راح تحس انك قوية وواثقة من نفسك انا اعرف حريم وايد بنوا نفسهم بعد الطلاق وصار لهم اسم رنان في المجتمع بعد ما كانوا مجرد نكرة وهم في ظل أزواجهم فحاولي بجد انك تكونين وحدة منهم وعلى فكرة وايد منهم تزوجوا ومن رجال ما شاء الله عليهم يعرفون الله ومركز وشخصية لأنهم حسوا انهم قاعدين يتزوجون من حريم لهم وود وكيان كبير مو من حريم منكسرين كل همهم انهم ما يكونون مطلقات وخلاص.

اللهم فرج كرب اختي أمل وهون عليها وارزقها بالزوج الصالح اللي يصونها ويعوض عليها بالخير ويعينها على طاعتك يا رب العالمين اللهم ارزقها بالذرية الصالحة من الزوج الصالح المناسب لها اللهم ارشدها الى الطريق الصحيح اللهم وفقها لما فيه الخير والصلاح لها عاجلا وآجلا اللهم وفقها لما تحبه وترضاه يا رب العباد . اختي دائما رددي لا اله الا أنت سبحانك اني كن من الظالمين