السلام عليكم ورحمة الله وبركاته
كيف حالكم فردا فردا
الحلقه الاولى
راح احكيلكم حلم حلمته من سته سنوات تقريبا وهالحلم يتكرر علي في السنه مرتين ثلاثه
كنت نحلم ان السماء كلها مليانه طايرات مثل الهليكوبتر يعني صغيره وفي وحده من الطائرات واضح ان فيها القذافي وكان يأشر للطايرات
بأن يقصفو المكان الفلاني والمكان الفلاني ياشر بأصبعه عالأماكن وأنا مع أهلي في بيت أهلي وانطل من الحوش ونشوف المنظر المرعب ونصيح ونصرخ واحنا خايفين يجي القصف في بيتنا طبعا الحلمه مش نفسها تتكرر بالزبط لا على اساس تابع الحلمه اللي قبلها يعني انه ثاني يوم مش نفس اليوم واحيانا اكون في المطبخ واسمع صوت القصف واطلع المهم الحلمه كلها رعب برعب كانها حقيقيه بس اخر حلمين كان فيهم شوي اختلاف الاول انا طلعنا وهربنا من البيت على رجلينا والقينا بيوت من بيوت جيرانا مقصوفات ومتهدمات والثانيه اننا كاننا مشينا لعماره وكأن العماره في بلده اجنبيه ومع هذا في شوية قصف وبعدين هدت الامور
اول مره حلمت هالحلم كنت متزوجه في كندا واخر حلم ممكن كان في بداية السنه اللي قامت فيها الثوره او نهاية السنه اللي قبلها وكنت ساكنه في بيت اهلي في ليبيا
وسبحان الله تحقق الحلم وشفتو كيف صار في ليبيا وانا حضرت القصف عند اهلي والبيوت اللي حلمت بيهن مقصوفات صارو يااما فيهن واحد ميت او مجروح وتدخل النيتو كان في الحلم الدوله الاجنبيه اللي كنا في عماره فيها
دنيانا غير مع قذافي الخير
طبعا سجل المذكور اعلاه حافل في ليبيا فمن مميزاته:
1. اطفال الايدز مساكين في سنة 1998وكانت اعمارهم بين ثلاثه شهور وسنتين ونصف وانتقل المرض لاهلهم وبصراحه من ذاك الوقت واحنا انخاف من تطعيمات القذافي مثلا في سنه فلانيه صار في تطعيم جديد ومهم وكذا مافي حد يمشي ياخذ التطعيم له او لاولاده لانه مافي ثقه.
2. أسر جميع الملتزمين والمتدينين وكل من اطلق لحيته ولبس ازار وعذبهم اشد عذاب في سجن ابو سليم وقتل اكثر من 1200 منهم وكان من بينهم عمي الله يرحمه في سنة 1996 وماابلغ عليهم الا في 2009 و2010 وبالنسبه لعمي بعد بحث وواسطات وركض عال سجون كي نعرف هو حي والا ميت عرفنا في عام 2003 انه من ضمن اللي قتلو في المجزره.
3. 11 قتيل يوم17فبراير2006 "تم اختيار نفس التاريخ للثوره"ذنبهم انهم تظاهرو غاضبين امام احدى السفارات وطبعا نظام القذافي مافيه تفاهم ولا غازات ولا شئ بل شعاره اقتل اقتل اقتل هو اصلا يبحث عالحاجه اللي تجيزله انه يقتل.
4. قصف الطائرة في طرابلس ، حروب تشاد و اوغندا .
5. قتل الاستاذ الجامعي عبد السلام ضو بعد ان تحصل على شهادة الماجستير وطلع وشاف الدنيا خير ثم بعد رجوعه لليبيا بثلاثة سنوات تقريبا فكر في انه يعمل شئ لليبيين اخذ لافته وكتب عليها مطالب عاديه يطالب بيها اي شعب ووقف بيها امام مقر باب العزيزيه مطالبا برؤية العقيد العقده فما كان جواب حراسه الا ان قالو اذهب في حال سبيلك فاصر ان يقابل السابق ذكره فقامو باطلاق اكثر من 20 رصاصه على جسده واقامو اهله العزاء في صمت وبدون ان يقولو لاحد لماذا مات ابنهم وللعلم هم يسكنون في نفس منطقتنا والاستاذ مدرسني في الجامعه.
يتبع انتظروني في الحلقه الثانيه
الحلقه الثانيه في الرد رقم12
nso0om @nso0om
عضوة فعالة
يلزم عليك تسجيل الدخول أولًا لكتابة تعليق.
فارواي
•
الله المستعان الله يعوضكم خيرا مما فقدتم كملي معاك
الحمدلله الذي اهلك القذافي واراح المسلمين منه .. نسأل الله ان يعوض اهل ليبيا خيرا منه
الصفحة الأخيرة