nso0om :

شفتي بالله بارك الله فيك تابعينا بارك الله فيك وفي ناس ياما مستفيده وعايشه في نعيم القذافي او انها عاشت كل عمرها في نظامه ورضت بالامر الوقاع ويقولوك المهم عايشين في الامن والامان بالنسبه لعائشه هي بنت ابيها وجاوباتك أوشي ونزيدك هي اكثر من مره تخطب في خطابات مثل ابيها في دول الخارج وتسبب في تعقيدات سياسيه نتيجه لتشجيعها لاحزاب معينه ونظرا لجهلهم بالسياسه مثلها مثل ابيها واخوتها. اما سؤالك الاخير فهذا غير صحيح اذا تم مداهمة بيتك ووجد فيها كتب دينيه لعلماء سنه معروفون فالسجن مصيرك والقذافي لايريد الناس ان تتدين حتى لاتعرف الحلال والحرام وتقول له لا حرام, والطريف في الامر بعد قيام الثوره اكتشف ان السلفيه يحرمون الخروج على ولي الامر فاصبحو مشائخه يسلطون الضوء على السلفيه ويزبدون كثيرا بعد ماكان اهتمامه بالصوفيه, كنت اقوللهم اذا انتصر القذافي راح يجبر الشعب كله انه يصبح سلفيه ويحفظه فتوات تحريم الخروج على ولي الامر خخخخخخخ. [quote=السيدة ملعقة 2009;71145824]وفيك بارك الله ....أنى ليبية من الزنتان مقيمة في سبها [/ quote] يووووووووو حسيت انك ساكنه في سبها لاتكوني من المنشيه وعرفتيني :22::icon28: بالجوده حبيبتي مرحبه بأهلنا من الزنتان:) حتى الفيديو في توقيعك مش طالع:( بارك الله فيك من أصلك الطيب لبى قلوبكم هااآه إن شاء الله تتزوجي ليبي متقي الله ومن الثوار بعد قولي آمين:icon28:

شفتي بالله بارك الله فيك تابعينا بارك الله فيك وفي ناس ياما مستفيده وعايشه في نعيم القذافي او...

نينا* :

انا للحين مابردت حرتي وزادت الاخت ام التريس الطين بله حسبي الله عليهم هال ؟؟؟؟؟؟؟؟؟؟ مدري وش اقول واللي يدافعون عنه يبي لهم يجلسون بدال الرجال اللي يضربونه بالكهرب عشان يعرف ان الله حق والقذافي ظالم وحابه اقول للكل ان الثوار كثر الله خيرهم كرموا القذافي بدفنه مع انه مايستحق بس مع ذلك غسلوه وكفنوه وصلو عليه ماصلى عليه الا 7 بس شفتوا لو كان فيه خير زعيمكم هذا كان لقيتوا مساجد ليبيا تصلي عليه اقل شي صلاة الغايب وكرموه بالدفن ووين بمكان محد يعرفه عشان ضعاف النفوس وهم قله بإذن الله ماينبشو بقبره مثل ماسوا الزفت بقبر عمر المختار ماأقول غير حسبي الله ونعم الوكيل بنات خلاص ياليت هالفتره تجيبوا اناشيد ليبيه فرحوني بعد القهر اللي بلعته من ناس داخله بس عشان ترفع الضغط ياللا بتشرط عليكم وبقول نزلوا اناشيد عادل المشيطي خخخخخخخ ماأعرف الا هو اي ليبي صوته حلو واناشيده حلوه نزلوها نبيها فرحه بعد الظلم اللي عشتوه وسمعناه منكم وقولن لي كيف قنواتكم بعد مقتل اللي مايتسمى وش تتفرجوا عليه الحين وقبل بعهده كان عندكم قنوات السعوديه وام بي سي ووكذا والا بس قنوات ليبيا بس

انا للحين مابردت حرتي وزادت الاخت ام التريس الطين بله حسبي الله عليهم هال ؟؟؟؟؟؟؟؟؟؟ مدري وش...

nso0om :

هذا أزمة الكلام بالتلفونات طبعا الشرق تحرر خلاص واحنا لازلنا ذاك الوقت WIDTH=400 HEIGHT=350 وهذا تقليد روعه لشاكير و رضوان WIDTH=400 HEIGHT=350 حبيت أحكيلكم على مواقف مرن علي في الثوره وياريت أي أحد عنده موقف يحطه *مره اول مادخل النيتو وقبل ماتطلع أي مظاهره في سبها كنت ماشيه عند ناس وكانت زوجة ابنهم من قبيلة القذاذفه ومن لما جلسنا وهي الجرذان عملو والجرذان سوو وإحنا نغير السالفه وهي ترجعنا لها والقائد مالقائد طبعا هي تظن اننا مؤيدين للقذافي, أنا الصراحه فار دمي طبعا فقلت لها قالو السوريين اللي بيقتل شعبو خاين , وهنا ولعت هي عالاخر وانا ماسكتلها و معايا أختي تسكت فيا ورجعت للبيت طبعا أختي حكت لأمي والكل لامني لو خبرت فيا والصراحه حتى انا خفت وبينما أنا جالسه ويجي مسج عالنقال من ليبيانا يقول أي أحد ينزعج من أحد يبلغ عنه فورا على الرقم كذا كذا خخخخخخ, طبعا خويتكم راحت فيها قلت حتى ان ماكان عندها نيه تخبر عليا شيشوها علي وقعدت كم يوم استنى وعدت على خير. * موقف ثاني كمان مع وحده متزوجه قذافي وزوجها في الامن الداخلي وهالمره عند وحده والده من جلست هالمرأه وهي الجرذان مالجرذان وفلان صفته وفلان عمل وإحنا ساكتين انا اغلي بس هي حرمه كبيره في السن وواصله وامي كمان معي وهي ماخلت ماتكلمت ,حتى قالت والشرقاويات صايعات بايعات شرفهن في تونس ومصر بخمسه دينار , أنا هنا خلاص كله ولا الاعراض قلتلها حرام عليك هذي اعراض ناس وهذا اسمه قذف المحصنات وانت عندك بناات اتقي الله , قامت امي قالت تراها نسووم متدينه ماتحب هذا الكلام , وطبعا دائما اسمع من امي احلى كلام لما نرجع اقوللها عادي وان جوو يقتلوني مش مشكله مش الموت احسن من حياه بدون ضئ وميه تقولي ياريتهم يقتلو هم ياخذوك معهم مايقتلوك قلتلها خلاص بينما هم واخذيني طلعو سلاح واقتلوني:hahaha: خخخخخ طبعا امي معاها حق وحتى الاستاذ االمعارض علي زيدان مره نبه على اهل سبها انهم مايطلعو اي مظاهرات لان وضعنا غير والمفروض ننتظر حتى يجينا السلاح وحكى عن القصف الكبير اللي صار عندنا وانا عندي الفيديو بس تصوير تلفزيون عندي عالكمبيوتر مالقيته في النت وماعرفت احطه. *وهذا موقف ثالث مش لي , مره جالسين في البيت وطبعا لان الكهرباء مقطوعه ينسمع كلام الشارع وكانت الحاله مزريه من قلت الماء, فنسمع في مرأه فايته بالشارع قاللها واحد من الجيران كيف حالكم وهي ماصدقت ردت عليه وروحها راح تطلع: فرقت حالنا كان غير يجي النيتو يقصفنا ويمسحنا من الوجود نفتكو من هالحياه هههه, طبعا كلنا مررنا بهالحاله بصراحه ماننلام لكن كان بخاطري اعرف من هي . *ومره في ليله من الليالي وقصف شديد علينا واحنا خايفين وساكتين وطبعا شبابنا في الشارع وكنت اسمع في طفل يبكي كثير طول وهو يبكي وانا اقول ياربييي مسكين شكله ابن جيراننا الصغير نايمين في السور من الحر وخايف من القصف لكن كيف نامو بره في السور, وبعد ساعه ممكن دخل اخويا من الشارع وقام بطرد القطه تصورو كانت قطه تبكي بكاء أطفال من الخوف سبحان الله يعني انا واختي وامي واخواني كلنا حسبناه ابن الجيران وانا للأن ماني مصدقه انها قطه. *وآخر موقف يوم قصف النيتو القوي كانو اخواني في الشارع هم والشباب وكان بجنبهم بيت مؤيدين للقذافي ومعلقين العلم الاخضر ومع قوة زلزلة القصف تفتح المرأه في الدور الثاني نافذتها وترمي صورة القذافي وتركض نازله هي وزوجها واولادها وهربو من القصف ,ههههه الظاهر لخبطت تظن الثوار وصلو خلاص. أنتظر تعليقاتكم ومنكم المزيد

هذا أزمة الكلام بالتلفونات طبعا الشرق تحرر خلاص واحنا لازلنا ذاك الوقت WIDTH=400...

السيدة ملعقة 2009 :

إيه والله كل مانتذكر الأخ اللي من الزاوية اللي حط جثة ولده تحت التكييف أيام وهو خايف انه يدفنه وينبشوا قبره ويطلعوا الجثة...ياريت كل من تدافع عن القذافي تقول شن شعورها لو كانت ام أوأب وولدك ميت قدام عينك ومش قادرة حتى تكرمي جثثه بالدفن ؟؟؟

إيه والله كل مانتذكر الأخ اللي من الزاوية اللي حط جثة ولده تحت التكييف أيام وهو خايف انه يدفنه...

بنت اغلى اثنين :

هههههههههههههههههههههههههههههه موتيني ضحك ربي يسعدك نسووووم .اقوى وحدة متاع اللي مؤيدين شكلهم يسحابوا الثوار وصلوا... ايييه دكرتيني بهالايام .. اني من المواقف اللي صارتلي ... وحدة معرفة وكنت ضايفتها في الفيس وفي الاحداث قبل لا يقطعوا النت كنت مشتركة في صفحة 17 فبراير فلنجعله يوم الغضب في ليبيا وكنت مدايرة حالة سب وهجوم عالقدافي وازلامه وكان في مجموعة كبيرة من الشباب والبنات وكنا واخدين راحتنا وهي كانت مؤيدة فتكتب في اشعار ودعاء لنصرة سيدها الله لا يرحمه ونخش عليها هجوم ..فهددتني انها تبلغ عني لو غلط في القائد حسب تعبيرها واني ركبني العناد وما بطلتش لين فصلوا النت وكل يوم نتخيل فيهم قابضين علية لكن الحمد لله ربي سلمني والقصة هادي ما كانش يعرفها الا اختي لانها كانت تشن في الهجوم معاي هههههه وبعد ما تحررت طرابلس حكيت عليها للعيلة انصدموا وقالولي قريب مشينا في داهية من عنادك وتصرفك الطائش :22:....وفي الفيس تعرضت لهلبة تهديدات لكن كنت نشوف في المجازر اللي تصير ونقول هدا اقل شيء نديره و كان ضاربني الحماس توة لما نرجع بداكرتي نقول كيف تصرفت هكي:35: ..وفي شباب هلللبة في طرابلس قبضوا عليهم عن طريق الفيس في الايام الاولى للثورة وكان يبلغوا فيهم ناس يعرفوهم:44:..... وحتى اهني في المنتدى وصلتني رسائل تهديد من بعض الطحلوبات اني ومجموعة من البنوتات اللي كنا نخشوا ونهاجموا ونلعنوا في القدافي وازلامه وافعالهم لكن ادارة المنتدى قامت بالواجب معاهم . الموقف الثاني...لما كان النيتو يضرب كنا نبدوا نزغرطوا ونكبروا وفرحانين وقالبين الدنيا ومرة كنت في حوش بوي وبدي النيتو يضرب واحني فرحانين ونكبروا وحوشنا عالرئيسي سمعونا جماعة الكتائب وجونا وواحني متنا من الخوف وشدوا بابا وزوجي ورفعوهم لكن بفضل الله عرفوا واحد في المركز طلعهم الصبح هما ومجموعة شباب لكن كانت هالليلة اصعب ليلة عشناها حالنا ما يعلم بيه الا ربي ما توقعناش ما زال نشوفوهم وبعد تحرير طرابلس عرفنا ان الشخص اللي طلعهم كان منشق لكن حسب الخطة انه ما يغادرش مكانه ويبقى في عمله وكان من الاشخاص اللي وزعوا السلاح على شباب المنطقةيوم تحرير طرابلس بارك الله فيه وفي امثاله ... واصعب فترة عشتها بالنسبة لية هي فترة رمضاااان لا ضي ولا مية وخوف ورعب واكثر حاجة كنت مرعوووبة منها هي الاغتصاب وكانوا الشباب يقوموا بعمليات نوعية فكنت كل يوم نستنى اني نفقد حد عزيز علية فترة كانت صعبة جدا جدا جدا حتى صغارنا عانوا فيها وكبرتهم قبل وقتهم لكن الحمد لله فرحنا بعدها وربي يكمل علينا فرحتنا ويحفظ الامن والامان في ليبيا الحبيبة ,, سامحوني صدعتكم لكن هدا شيء بسيط من اللي صارلنا في هالفترة وعانوا منها كل الليبيين والكارثة بعد هدا كله ما زال في ناس ادافع علي الطاغية :angry2:

هههههههههههههههههههههههههههههه موتيني ضحك ربي يسعدك نسووووم .اقوى وحدة متاع اللي مؤيدين شكلهم...