مساء الخير على أحلى وأغلى ناس
قمرنا الغالي
رجعت بعد المعمعة وحاسة بالتقصير
الكل بيشكر وبيمدح في تطبيقاته الا أنا لسه ماطبقتش حاجة غير البسبوسة
والله زعلانة من نفسي بس اعمل ايه ربنا عالم بالحال لسه الضيوف ماشين امبارح ورجعنا النهارده للمدرسة ولخمتها
الحمد لله
تسلمي على البيتزا اللذيذة من شكلها واكيد الطعم ألذ
ان شاء الله النهارده اعمل البوريك وكعب الغزال وانزلهم
تسلمي من كل شر ولاعدمناك يارب
محبتي للجميع

زولة حبيبتي : وحشاني بس الحمد لله اتطمنت عليكي انك بخير ربنا يجعل بيتك دايما عامر وفي انتظار تطبيقاتك ياقمر

اهلا ليلى امبارح عملت عجينة بوريك تانى وقسمت المقدار نصين
عملت منه بوريك وكعب غزال وحشيت كم واحده لحم للتجربة
حلو كتير ربنا ما يحرمنا منك ياسكر وعسل
وعملت البسبوسة بس غلطت كم غلطة
1-الميه كترت شوية
2-الصينية مقاس 26 اعتقدت بالاول انها كويسة وبعدين لما استوت
البسبوسة سمكها كان سميك
3-الشربات سبته عالنار وقت اطول من دقيقتين
4-قطعت البسبوسة وهى سخنه
ههههههههههه شدى ودانى براحتك لانى ما ركزتش بالدرس
بس كلناها وطعمها حلو

هههههه انا جايالك علشان مش بتسمعي الكلام بس ولايهمك لو لسة البسبوسة عندك ليها حل لاني مش بحب رمي النعمة حتي لو طبيخ كل صنف له الحل ونعمله نيو لوك ويتاكل
شوفي ياقمر انقلي البسبوسة في سلطانية واعجنيها وهاتي ورق جلاش افردي الورقة وادهنيها سمن خفيف وحطي ورقة تانية عليها وحطي من البسبوسة المتعجنة جزء علي شكل شريط زي لما عملنا كعب الغزال بس بكمية اكبر وابرمي ورق الجلاش ورصيه في صينية لحد لما تخلصي الكمية وقطعيها مسافات متساوية بس مش للاخر ودخليها الفرن علي نار متوسطة لحد لما تبقي دهبي (بس اوعي تنسيها )ولما تطلع رشي عليها سكر بودرة وكملي تقطيعا وباذن الله حتاكلي صنف حلويات جديد ولذيذ ومش حترمي حاجة

هههههههههههههه مش بئولك عسل وسكر
بائى نصها تقريبا ها جرب طريقتك وارد عليك
وانا زيك مش بحب ارمى النعمة والميزان شاهد ههههههه
لا بجد حتى بطبخ اقل الكميات عشان مارميش حاجة
ربنا يرزقك كل ماتتمنى ياليلى