دورتي وعلاقتها بالالتهابات وتأخر الحمل .. أفيدوني افادكم الله

السلام عليكم
اخواتي حبيت اعرض لكم قصتي مع دورتي و اطلب منكم المشورة لعل احد منكم يفيدني
و اسمحولي اذكر لكم قصتي من البداية حصلت لي بعد الو لادة الاولى و عانيت منها والحين صرت اشوفها تنعاد معاي و خايفة اعيش نفس التجربة ...
اليكم القصة
انا أول ما تزوجت تأخر حملي لكن الحمدلله ماكانت عندي مشاكل بالدورة يعني كانت تنزل عادي مدتها 6 ايام و اطهر بسرعة وبعديها بحوالي سنة ونصف حملت
لكن بعد ما جبت بنتي الأولى بعملية صارت الدورة خفيفة و كل ما جالها شهر تخف اكثر عن قبل كنت أحس ان الدورة تنحبس يعني مثل ما تقولون عندي سدد مع اني كنت اشرب خلطات بس مافي فايدة
المهم بعد 6 شهور من الولادة صار ينزل مني دم أسود أثناء الدورة بدل مايكون أحمر دليل على ان الدم منحبس و ما ينزل أول بأول ..في البداية كان ينزل دم اسود في بداية الدورة وبعدين أحمر وبعدين بالنهاية أسود....لكن الدورات الأخيرة صارت طول مدة الدورة ينزل دم أسود
وطبعا كل مرة يقل الدم و تقل أيام الدورة لدرجة انها صارت تجيني يوم واحد فقط و الدم قليل جدا لدرجة اني ما ألبس فوطة و انتم بكرامة ،، كنت البس الكيرفري اللي يجي زي الورقة للاستخدام اليومي ...
والمشكلة بعد انه بعد ما تنزل الدورة تظل تنزل مني كدرة سوداء لين ايام التبويض حتى افرازات التبويض تجي ملونة و سودا
والمصيبة انه كل ما قل الدم لاحظت انه تستويلي التهابات في فترة بعد الدورة و تختفي بعد التبويض و شوي شوي صارت تزيد ايام الالتهابات...يعني في البداية كانت الاتهابات تاخذ 4 ايام مثلا بعدين اسبوع بعدين 10 ايام و في نهاية المطاف صارت تلازمني طوول الشهر و استمرت ملازمتني مدة طويلة يمكن 9 شهور و الله أعلم بالعذاب اللي عشته مافي داعي اكتب شيء المهم انه مافاد معي لا أدوية ولا تحاميل ولا حبوب ولا علاجات و كل ما اكلم طبيبة عن الدم الاسوود و قلة ايام الدورة علطووول يجاوبوني عادي!! وطبعا ماخليت شي ماشربته زعتر مرامية حبة سوداء عسل رشاد+تمر+زيت زيتون ، جرجير بقدونس ، محلب، مردقوش، زنجبيل ..جربت حط مطارة ساخنة ،، جربت اربط بطني و اشياء اشياء كثيرة حتى ما اذكرها
المهم حملي تأخر و كنت اشك اني أحمل بس الجنين ينزل لانه كانت تجيني اعراض غريبة قبل الدورة بـ 10 ايام الام وغثيان و الخ ..المهم بعد ما داومت ع البقرة قررت مرة احلل قبل ما تجي الدورة ولما حللت اكتشفت اني حامل و طيران رحت للدكتورة وعطتني مثبت حبوب .. بس لما جا موعد الدورة صار ينزل مني دم الله اعلم شو هاذا نزيف أم بقايا دورة ا لمهم انه استمر ينزل معي لين يمكن الشهر الخامس أو السادس..المهم استمرت الالتهابات تقرريبا طول فترة الحمل بس كل ما جالها يوم تخف خاصة لما كان ينزل مني الدم فترة الحمل كنت أحس ان الالتهابات تخف
المهم هالشي خلاني أشك انه هالدم كان منحبس و سبب لي التهابات....وكلما نزل كلما خفت الاتهابات و بعد العملية لاثانية الحمدلله مافي التهابات
المهم الحين بعد ما جبت بنتي الثانية صار لي نفس الشيء بالضبط أول ما ولدت جتني الدورة عادي 5 ايام و نظفت علطول ماشاء الله لكن كل شهر تسوء الدورة والآن رجعت لنفس المسلسل دم أسود ، دورة قليلة جدا ، التهابات و كلما جا شهر كلما زادتالاتهابات
وبصراحة ما أبي اعيش نفس العذاب اللي عشته كابوس ما أبيه يتكرر حياتي كانت جحيم بسبب التهابات كنت عصبية جدا اضرب بنتي وهي طفلة من كثل ماأحس اني مولعة نار بسبب الاتهابات و دايما مشاكل بيني وبين زوجي بسبب عصبيتي

رجاء الللي تعرف علاج تفيدني لاني ما خليت اعشاب ماشربتها و رحت لطبيبات شاطرات ما افادوني
وللعلم أصلا الدكاترة لما اقولهم ان الدورة تجي يوم واحد و ينزل دم اسود أصلا يعرفون انه مو طبيعي بس ما عندهم حل للموضوع علشان كذا يقولولي عادي والدليل على هاذا اني بعد ما حملت جبت طاري الدورة للدكتورة (وهاذي وحدة منهم اللي كانت تقوللي عادي انها تجي يوم واحد) المهم لما ذكرتها بدورتي و استغربت جدا وقالتلي ايش هالدورة؟ معقولة؟ يوم واحد؟؟ شو هالكلام...والخ....يعني استغربت جدا و ما صدقتني مع انها قبل كانت تطمنني تقولي عاااادي ...

رجاء بنات اللي تعرف عن حالتي أو مرت بحالتي أو تعرف حل تفيدني تراني جربت خلطات كثيرة مذكورة بالمنتدى حتى نسيت اساميها لكن مافي فايدة احس ان عندي مشكلة بس محد يعرفها غير الله و جزاكم الله خيرا