دورت زي قصتي ما لقيت....اول مشاركاتي

السلام عليكم
كيفكم يا بنات
انا قرات معظم مشاكل المنتدى اني الاقي زي قصتي عشان اقرا حلول لها ما لقيت...ما تخيلت اني ممكن احكي لحد مشكلتي بس الي شجعني اني لقيت معظم ردودكم على مشاكل البنات مشجعة ومعظمكم عندو خبرة
امكن في منكم ما يعتبر مشكلتي مشكلة بس والله انها عاملة زي كابوس بحياتي
انا مخطوبة لشب محترم ومتدين ووسيم جدا وضعه الاجتماعي منيح وظيفته كتير منيحة لكن انا مش قادرة احبه
هو بحبني حب جنوني وهادا مخليني مش عارفة امثل الحب بكل الاوقات
انا بحس حالي طول الوقت بكذب وبمثل اني بحبه واني متيمة فيه وانا بجد مش حاسة بشي
بعد ما يطلع من عندي بحس انو الدنيا ضاقت واني بحتقر حالي عشان كذبت عليه
المشكلة ما عندي سبب واحد يخليني ما احبه ...الكل بحسدني عليه والكل بحكي انو ربنا راضي علي انو رزقني بشب زيه عشان هيك مش قادرة احكي لحد حتى لاقرب الناس لي لانهم حيحكو لي اني بتبطر ومش عاجبني العجب
والله مش عارفة شو اعمل خايفة استمر معه واضطر امثل حتى بعد الزواج وتضل حياتي هيك
عارفين يا بنات من حبه لي بحس متى بكون مضايقة او مزعوجة
احيانا بتصل علي وبحكي لي انت بخير؟؟ وانا بجد بكون كتير مضايقة ومخنوقة ولما بساله ليش اتصل بالوقت هادا بقول حس انو قلبه بجعه يعني اكيد انا مش بخير
يااااااااااااااربي والله مش عارفة شو اعمل
خايفة اظلمه معي وكمان خايفة اظلم حالي
انا من اول رمضان وبدعي ربنا يزرع محبته بقلبي
بس والله يا بنات اني مش قادرة رغم اني حاولت
بالله عليكم تدعو لي وانصحوني شو اعمل
انتو بس بعد ربنا الي بتعرفو بمشكلتي
ربنا يخفف على كل بنات المسلمين ويرزقهم ازواج صالحين ويحبب لهم ازواجهم ويحبب ازواجهم فيهم يا رببببببببببببببببببببببببب ويرزقهم الذرية الصالحة