دياي محشي ومشوي بالفرن على طريقتي الخاصه .

السلام عليكم

مراحب ياهلا بنات

اليوم مسويه حق البيت دياي بالفرن على طريقتي الخاصه وعجبت ابوي وايد وكل البيت ،،،
مره من المرات يوم كنا صغار ابوي جاب لنا دجاج مشوي وكله يجيب لنا منه وطعمه رهيب هو محشي ومشوي ،،، عاد الحين هالمطعم صار مايسوي مشاوي بس سندويتشات ،،، كان تعرفونه يابنات البحرين عندنا اياه المطعم اسمه سندويتشات الاهالي كان يبيع بعد مشويات ايام اول ،،،

عاد من زمان وانا كله ابي اسوي مثله لكن فيني كسل ،، اليوم جتني الهمه وشريت المكونات ،،، وفكرت فكرت وعصرت عقلي لين اكتشفت الطريقه كيف سواها

وهاكم المقادير

دجاجه وزن 1000 جرام مغسوله منظفه بس لاتقطعينها كامله لانج بتحشينها
ثلاث فصوص ثوم + قرن فلفل اخضر حار + كركم + عصير نص ليمونه
الحشوه :
بصله كبيره مقطعه جوانح
نصف حزمة بقدونس مقطع
ربع حزمة كزبرا خضرا
ملعقة طعام سماق
نصف فلفل رومي اخضر مقطع جوليان
واحد فلفل اخضر حار بس اللي يجي حجمه كبير شوي مش الصغير وايد لان الصغير وايد حار اتمنى فهمتوا شنو طلبت
زيت شوي
ملح فلفل اسود

الطريقة
خذي الثوم مع الفلفل الحار دقيهم دق لين ينعجنون مع بعض مع شوي ملح
بعدين اعصري على الدجاجه نص الليمونه ومرري الليمون عليها بكل جهه ثم خذي المعجون اللي دقيتيه وافركيها به من داخل وبره ،،، ورشي عليها البهارات المذكوره وادعكيها زين

الحشوه الحين اخلطي الخضروات المذكوره مع البقدونس المفروم والسماق والبهارات ورشي عليهم شوي زيت واحشي بهم الدجاجه
صكي فتحة الدجاجه باعواد صغيره ورصيهم في صينية الفرن ورشي على الدجاجه شوي زيت وباقي الحشو اذا زاد وزعيه فوق الدجاجه وفي جوانبها
غطيها بالمنيوم وحطيها بالفرن وبعد ماتنضج شيلي اللالمنيوم عنها وحمريها من فوق

وهني وعوافي على قلبكم